19
Silqinq xihael aeqnaol, ngael haelnaeq naeqmae myel e cholyaeq qiq miq mqmae ae'lye yotyel ha'lye gee e laoqmyel gaeqlael yae, gee:"Ha'li'lulyaq!
Jiul'en, rongqyaol, laqtaq mael laoq,
gilzuqmyel aedeeteel e Momil hhae.
2 Yoqhhaeq e shenqpanl mael laoq,
aeqdilmyel hhae, gongyil hhae;
yoqhhaeq laoq zhee henq e jilnyuq'ae shenqpanl biq kaol'ae,
yoqhhaeq ochoq nyegael neemaeba maellye
shilgail taq e cholyaeqhael yaol zonglba biq vae.
Momil yoqhhaeq e yaqhacheqzaq e cholyaeqhael'ae,
bal gaiqjiq gil biq'ae,
kaol jilnyuq'ae yaqhacheqzaq e cholyaeq yaol
siq bi yul e golsiq mael saelzaeqhoq biq hhae."
3 Yoqhhaeteel yol qiq pu gee:
"Ha'li'lulyaq!
Jilnyuq'ae pe e aeqhaoq mael,
haeqfu keellye haoqda hhae."
4 Zhangqlaoq niqqyel yuq hhaeq kaol yodyeq yuq yaeq laoq oqbaqbaq ga hhei, kaol zongmae duqtyel taq'ae zhol e Momil'ae heel biq, gee:
"Amen. Ha'li'lulyaq!"
Aeqyol yolyaeq e yulyaeq mulzaeq mael
5 Aeqnaol, zongmae duqtyel ae'lye yotyel duyi, gee:
"Momil e yaqhacheqzaq e cholyaeqhael o,
yoqhhaeq'ae zun eiq zunjinl gu eiq gu biq e tyuhael laoq,
heeq haoq, nil haoq, gilzuqmyel
aedeeteel e Momil'ae laqma deiqqei biq maoqhhae!"
6 Ngaeq'ae haelnaeq naeqmae myel e cholyaeq qiq miq e yotyel laoqmyel gaeqlael yae, eelcuqhael yul e yotyel laoqmyel dul'ae, mqziq ziqmae yotyel laoqmyel eiq dul'ae, gee:
"Ha'li'lulyaq!
Hhaoqsongl, aedeeteel e Momil,
Hhael'onglzaeq zaeqli qiq hhaeq laoq,
zongmae geiq vae kaol'ae.
7 Aedeeteel laoq hhaol maoq lo maoqhhae,
kaol rongqyaol mael yoqhhaeq'ae biq biq;
aeqyol yolyaeq e yulyaeq mulzaeq e naohaeq keel vae,
yoqhhaeq e yaeqmiq alsheq eiq aeqyoyoq paeqgaelsael meeq aeqwae,
8 Momil yoqhhaeq'ae bachi'lye zheelniqlye e keeldaelnil e
ziq e aelhongq biq hhei biq kaol bi dumda hhei:
Keeldaelnil e ziq e aelhongq xilmael laoq
senltuqhael meeq e zongl mael'ae."
9 Mqmae yosongl ngaeq'ae gee laeq: "Nol cuga hhei maoqhhae: Aeqyol yolyaeq e yulyaeq mael bael mulzaeq lael lye gul yo biq e cholyaeqhael laoq geeqlongq meeq vae!" Yoqhhaeq ngaeq'ae gee laeq: "Xihael laoq gilzuqmyel Momil e aeqdilmyel e saeziq'ae." 10 Ngael laoq yoqhhaeq e aeqkeel yiqsi'ae oqbaqbaq ga hheikaol yoqhhaeq'ae heel biq maoqlye zongl lil. Yoqhhaeq ngaeq'ae gee laeq: "Aeqdilmyel xilnye maeq zongl hhaeq'ae! Ngael kaol nol, kaol Yesu gae'lye zoqzenlkei e aqsseq aeqnil tyuhael laoq gilzuqmyel yaqhacheqzaq e cholyaeq geiq hhae. Nol Momil'ae heel biq maoqhhae." Yesu'ae zoqzenl bael kei biq e cholyaeqhael'ae laoq peqlal maoqlye mael geedu e yohael zhol kaol'ae.
Maoqpul ziq hhei e mqmae yosongl
11 Ngael mqmae pong lael mol aeqwae. Maoqpul qiq yaeq mol du'lal, aeqmaoq taq'ae ziq hhei e tyutaeq'ae laoq "zaqgiq maqgiq", "aeqdilmyel" lye gul biq hhae, yoqhhaeq gongyil maellye shenqpanl kaol daqzhangldiq hhae. 12 Yoqhhaeq e ma'ne mael laoq miqhulm laoqmyel hhae, vuqduq taq'ae laoq zongmae vuqcongq haelnaeqmyel congq hhei hhae; yoqhhaeq e aeqhhaol taq'ae cholmil qiq mal cuda hhei hhae, yoqhhaeq aeqyoyoq maoqlaol qiq hhaeq eiq maeq loq'ae; 13 Yoqhhaeq vae siq mael'ae deiqneq gol e aelhongq dum hhei hhae; yoqhhaeq e cholmil mael laoq "Momil e saeziq" lye gul biq hhae. 14 Mqmae taq e junduilhael, gilzuqmyel maoqpul ziq hheikaol zhee pul zhee shol e keeldaelnil e ziq e aelhonq dum hhei aeqmyel yoqhhaeq'ae cho'lyeq hhae. 15 Yoqhhaeq e myeqbongq ae'lye taxillye maejyel mye du hhei, kaol goqjahael'ae diq biq. Yoqhhaeq sulm zaeqngeeq maellye yoqhhaeteel'ae guanqtyeq biq maoqlye hhae, kaol hhael'onglzaeq zaeqli Momil e faqhoq guaeq'ei kei mael dailbiaoq e zilbaeq deiqduzaq e eelzhol mael'ae nuq biq maoqlye hhae. 16 Yoqhhaeq e aelhongq mael'ae kaol aeqpaeq taq'ae "Zongmaehael e Zongmae, hhaoqsonglhael e Hhaoqsongl" lye cholmil cuda hhei hhae. 17 Ngael laoq baeqjyelboq e mqmae yosongl qiq hhaeq neelmae onglci'ae haoqtul deelhhei yol mol aeqwae, kaol mqmae e haeqzilhael'ae yotyel ha'lye gul biq: "Noteel eeqlael gil kaol Momil e baqwanq wanqmae zaeq lael gil, 18 Zaeq maoqlye mael laoq, zongmaehael e saeqzil, dangbinkeihael e yoheeqhael e saeqzil, aqha yobohael e saeqzil, aeqmaoq kaol aeqmaoq ziqhael e saeqzil, haelzhol e zilyoq e cholyaeqhael, hhaeq'ongq ongqzaeq e cholyaeqhael, maduq zhee zahael kaol ochoq maeq fu'qiq'ongl e cholyaeqhael e saeqzilhael ngeelvae."
19 Ngael byeljyeq tyu qiq yaeq kaol milcaeq taq e zongmaehael, kaol yoqhhaeteel e junduilhael deel'eeq laeq mol aeqwae, kaol maoqpul ziq hhei e cholyaeq kaol yoqhhaeq e junduil nyegael daqzhangldiq maoqlye zongl hhae. 20 Byeljyeq tyu qiq yaeq bi deiqtyeq vae; byeljyeq tyu qiq yaeq e yiqsi'ae maeqdaeqhhaeq e silqinq zongl maellye cholyaeq'ae cheeqmu biq, kaol yoqhhaeteel'ae byeljyeq e jilhaol mael bi diq da hhei, kaol byeljyeq e molkol mael'ae bi heel e jaq xianzhi tyutaeq yaol eiq bael deiqtyeq biq vae. Yoqhhae niq nulhhaeq yaol yodyeq myel liuqhuangq doq e aeqzaeq doq e hobong vae bi beiqdo vae, 21 Baeqjyelboq e cholyaeqhael yaol laoq maoqpul ziq e cholyaeq e myeqbongq ae'lye mye du hhei e niqboqmyel ta e maejyel maellye xyeq vae; haeqzilhael laoq yoqhhaeteel e saeqzil mael zaeq kaol zaeqdye vae.