Qiqca hoq
20
Ngael mqmae yosongl qiq hhaeq mqmae ae'lye loq gayi yol mol aeqwae, aqlaq mael'ae laoq dongqto maqza e duqhongq e haedulm, kaol haeqheemyel sulmca qiq ca heil hhei hhae. 2 Yoqhhaeq lye oqhol holmae tyu qiq yaeq mael deiqtyeq biq, oqhol holmae tyu qiq yaeq laoq mqdongq milbeibei fu ae'lye zhol e oqhol tyulmael ngeelvae, niqhaeq haeqmae'ae, Saqdanl eiq ngeel hhae, yoqhhaeq yaol qiqca (1000) hoq kaltoq biq vae, 3 Kaol dongqto maqza e duqhongq hongqmae'ae beiqdo biq, kaol dongqto maqza e duqhongq hongqmae mael piqtyeq hhei, kaol gailzang maellye fengtyeq biq, tyu qiqca (1000) hoq bong lael fu'ae keellye, yoqhhaeq yaol goqjahael'ae zail eiq maeq bi cheeqmu. Silqinq xihael aeqnaol, yoqhhaeq yaol aeqdilmyel qiqlaq pyeqduhoq hhei biq dyul wae.4 Ngael zongmae duqtyel zhee mee'nae mael mol aeqwae, shenqpanl e laqtaq mael holtaq'ae zhol da deelhhei cholyaeqhael'ae biq hhei biq'ae. Ngael laoq Yesu gae'lye zoqzenlkei e tyuhael, kaol Momil e saeziq gae'lye vuqduq dega biq e cholyaeq e yohael mael yol mol aeqwae. Yoqhhaeteel laoq byeljyeq tyu qiq yaeq'ae, paelsilmyel byeljyeq e molkol mael'ae maeq heel gol, kaol naeqdeel taq'ae, paelsilmyel aqlaq taq'ae yoqhhaeq e jilhaol mael maeq diq da gol e cholyaeqhael ngeelvae. Yoqhhaeteel gilzuqmyel dyeqhoqlal vae, kaol Jidu nyegael zongmae qiqca (1000) hoq geiq hhae. 5 Baeqjyelboq e sil e cholyaeqhael laoq maq dyeqhoqlal wae siq, qiqca (1000) hoq bong lael fu'ae keellye doqkeel maoqhhae. Xilmael laoq laefuq fuqli e qiq pu dyeqhoqlal mael'ae. 6 Laefuq fuqli e qiq pu dyeqhoqlal mael onglci'ae vuqtu bal zoq hael laoq geeqlongq meeq vae, senljyeq vae! Dil'el cil e sil mael yoqhhaeteel e aeqhhaol taq'ae laqtaq maqza'ae, ngeelfeiq, yoqhhaeteel laoq Momil kaol Jidu e jilsi geiq maoqlye hhae, Jidu nyegael eiq zongmae qiqca (1000) hoq geiq maoqlye hhae.
Saqdanl yaol diq yinqzaeq biq vae
7 Tyu qiqca (1000) hoq bong vae laol, Saqdanl yaol laoqgaiqkei laoqhaol ae'lye pyeqduhoq hhei biq maoqlye hhae, 8 Kaol duyi laol milcaeq taq e halza e goqjahael'ae cheeqmu biq, goqja xihael'ae Gegeq kaol Maqgel lye gul biq hhae, kaol yoqhhaeteel yaol bi eeqlael kaol daqzhangl bi diq hhae. Yoqhhaeteel e cholyaeqhael laoq eeldeel deelmae e milqyel laoqmyel naeq hhae. 9 Yoqhhaeteel da'lal kaol halza milcaeq myel zhol bong byel vae, senltuqhael e haqhhael diqkaeq hhei e milcaeq kaol Momil gaeq biq e milmae heeqmyel mael'ae ongtyeq biq, kaol aeqzaeq doq mael mqmae ae'lye loq gayi, kaol yoqhhaeteel yaol pe mye biq vae. 10 Yoqhhaeteel'ae cheeqmu biq e niqhaeq haeqmae yaol liuqhuangq e aeqzaeq hobong onglci vae beiqdo biq, tyuqvae laoq, byeljyeq tyu qiq yaeq kaol jaq xianzhi zhol e milcaeq vae ngeelvae, yoqhhaeteel'ae aeqdilmyel mqkiq mqnao myel haeqfu keellye hhae bi zonglkyuq hhae.
Aeqnaol naolli qiq nao e shenqpanl mael
11 Ngael bachi'lye haeqheemyel zongmae duqtyel qiq mal, kaol holtaq'ae zhol e tyutaeq yaol yol mol aeqwae; mqmae kaol milcaeq mael yoqhhaeq e yiqsi ae'lye gabu vae, kaol yoqhhaeteel zhol e milcaeq mael zail eiq maeq saelpopuq ongl vae. 12 Ngael laoq sil e cholyaeqhael, heeq haoq, nil haoq, gilzuqmyel zongmae duqtyel e yiqsi'ae haoqtul deelhhei mol aeqwae. Luhhei suqhhaq mael diqpye hhei, kaol baeqjyelboq e suqhhaq qiq lu eiq diqpye hhei, xilmael laoq aeqyil e suqhhaq ngeelvae. Sil e cholyaeqhael vae laoq luhhei suqhhaq xihael'ae cuda hhei e laoqmyel yoqhhaeteel aeqyoyoq haelzongl maellye hhae bi shenqpanl hhae. 13 Tyulkaol, eeldeel deelmae lye yoqhhaeq onglci e sil e cholyaeq yaol pyeqduhoq hhei, sil mael kaol mil'oq mael eiq yoqhhaeteel onglci e sil e cholyaeq yaol pyeqduhoq hhei hhae; pyeqduhoq hhei biq e cholyaeqhael'ae laoq, haetaeq vae eiq aeqyoyoq haelzongl laoqmyel hhae bi shenqpanl hhae. 14 Sil mael kaol mil'oq mael eiq aeqzaeq doq e hobong vae bi beiqdo hhei'ae, aeqzaeq doq e hobong xilmael laoq dil'el cil e sil mael ngeelvae. 15 Haetaeq e cholmil mael aeqyil e suqhhaq taq'ae maq cuda hhei'laol, aeqzaeq doq e hobong vae bi beiqdo hhei ngeelvae.