Mqmae yosheq kaol milcaeq yosheq
21
Ngael mqmae yosheq kaol milcaeq yosheq qiq mal yol mol aeqwae, laefuq fuqli e mqmae kaol laefuq fuqli e milcaeq mael maqza myel peqyil vae, kaol eeldeel deelmae mael zail eiq maqza vae kaol'ae. 2 Ngael senljyeq milmae heeqmyel, Ye'lulsa'lenq yosheq mael mqmae vae Momil e tyuqvae lye loq gayi mol aeqwae, Ye'lulsa'lenq yosheq tyulmael laoq, paeqgaelsael meeq deelhhei aeqwae, zhigaqlye zonglzhi hheikaol haqyo'ae doq deelhhei e yaeqmiq alsheq laoqmyel hhae. 3 Ngael yotyel tyelmae mael zongmae duqtyel ae'lye gaeq duyi gaeq wae, gee:"Fu hhei, Momil e haeqpael haelcul mael,
cholyaeqhael onglci'ae za hhae!
Yoqhhaeq yoqhhaeteel nyegael qiqgael zhol maoqlye hhae,
yoqhhaeteel yoqhhaeq e cholyaeq geiq maoqlye hhae.
Momil aeqyoyoq laoq yoqhhaeteel nyegael qiqgael baelzhol'ae.a
4 Momil yoqhhaeteel e ma'eel mael
gilzuqmyel xyega gil biq maoqlye hhae;
kaol sil mael zail eiq maqza, nyuqsaeq mael,
yotyel ha'lye nyul mael, kaol saeq mael zail eiq maqza vae,
laefuq e silqinqhael gol yil vae kaol'ae."
5 Zongmae duqtyel taq'ae zhol e tyutaeq gee: "Fu hhei, ngaeq lye gilzuqmyel yosheq zonglpael byel aeqwae!" Yoqhhaeq yol gee: "Nol cuga hhei maoqhhae, saeziq xihael laoq xiangxinl hhaeq'ae, aeqdilmyel eiq ngeel kaol'ae." 6 Yoqhhaeq ngaeq'ae yol gee laeq: "Peqlal vae! Ngael laoq A'lafaq lil, ngael laoq Oqmeiqga lil; ngael laoq kaishiq e qiq hhaeq lil, ngael laoq jyeqsuq e qiq hhaeq lil. Ngael aeqyil eelbi e eelcuq mael suq biq e cholyaeq tyuhael'ae alngeiqmyel bi dol maoq. 7 Yinqzaeq e cholyaeq laoq hhamul gayil e xihael hhamul maoqlye hhae; kaol ngael laoq yoqhhaeq e Momil geiq maoqlye lil, yoqhhaeq laoq ngaeq e yaqyo geiq maoqlye hhae. 8 Ngeelfeiq, gu hael, maeq xiangxinl hael, xinqlalmyel zongl hael, cholyaeq xyeq hael, ochoq nyegael neemaeba hael, niqhaeq tulzaeq hael, cholyaeq lye zongldu hhei e momilhael'ae tongqheel hael kaol zaqgiqgiq e cholyaeqhael, yoqhhaeteel e vuqtu mael laoq liuqhuangq doq e aeqzaeq hobong onglci'ae bal zoq hhae; xilmael laoq dil'el cil sil mael ngeelvae."
Ye'lulsa'lenq yosheq
9 Huqmmaeq siq mal onglci'ae laoq aeqnaol naolli e zaihuol siq sheel kuq bong hhei aeqmyel heil hhei e, mqmae yosongl siq hhaeq onglci e qiq hhaeq lael, kaol ngaeq'ae gee laeq: "Nol lael, ngael noq'ae yaeqmiq alsheq yaol bi fu laeqngeel, yaeqmiq alsheq laoq, aeqyol yolyaeq e haeqmiq ngeelvae." 10 Ngaeq'ae senllinq ganqdongl laeq, kaol mqmae yosongl lye ngaeq yaol haeqgaomyel e geeqzhoq qiq zhoq vae sheeqli laeq, kaol ngaeq'ae Momil e tyuqvae, mqmae ae'lye loq gayi e senljyeq milmae heeqmyel Ye'lulsa'lenq mael bi fu hhei laeq'ae, 11 Milmae heeqmyel xilmael'ae laoq Momil e rongqyaol mael za'ae, milmae heeqmyel e aeqcael mael zhee pyuq e baoqshiq laoqmyel, nyuljyeqlye yil kaol shuiqjin laoqmyel geelxu'lye hhae. 12 Milmae heeqmyel mael'ae haeqheemyel kaol haeqgaomyel congqciq za'ae, oheiq qyelniq gael za'ae, oheiq'ae laoq mqmae yosongl qyelniq hhaeq zhol'ae, oheiq taq'ae laoq Yiqsellyel e qyelniq zhipail e cholmil mael cuda deelhhei hhae. 13 Neeldu aelheiq boq'ae oheiq suq mael za, beqbian boq'ae oheiq suq mael za, nanqbian boq'ae oheiq suq mael za, neelgae aelheiq boq'ae oheiq suq mael za hhae. 14 Milmae heeqmyel e congqciq mael'ae congqciq paeqhhael qyelniq mael za'ae, congqciq paeqhhael taq'ae aeqyol yolyaeq e shiqtuq qyelniq hhaeq e cholmil mael za'ae.
15 Ngaeq'ae saeziq gee laeq e mqmae yosongl tyutaeq pulsheel e mol'ongq mael heil hheikaol chiqziq geiq, kaol milmae heeqmyel tyulmael, milmae heeqmyel e oheiq mael kaol milmae heeqmyel e congqciq mael baqzae fu maoqlye hhae. 16 Milmae heeqmyel mael laoq myeqzaeq yuq boq za'ae, maolduboq kaol heeqduboq qiqsheel'ae. Mqmae yosongl laoq mol'ongq maellye milmae heeqmyel e tyulmael baqzae fu'ae, kaol gilzuqmyel niqca yuqhael (2400) gong'liq zoq hhae, maoldu, heeqdu, gao mael laoq gilzuqmyel qiqsheel'ae. 17 Mqmae yosongl laoq milmae heeqmyel e congqciq mael yol baqzae fu'ae, cholyaeq e maol nul maellye baqzae fu laol, gilzuqmyel qiqhael yuqqyel yuq (144) laqcheqb zoq'ae; xilmael laoq mqmae yosongl e maol nul eiq ngeel hhae. 18 Milmae heeqmyel e congqciq mael laoq nyuljyeqlye yil maellye zongl hhei hhae; milmae heeqmyel mael laoq qiqgiq maq keq myel e pulsheel'ae, kaol geelxu'lye bo'liq laoqmyel hhae. 19 Milmae heeqmyel e congqciq paeqhhael mael laoq maeq qiqsheel e baoqshiq lye zonglzhi hhei hhae: Dilyiq gol congqciq paeqhhael laoq nyuljyeqlye yil'ae, dil'el gol laoq honglsael e baoqshiq'ae, dilsan gol laoq nyuljyeqlye maqnaoq'ae, dilsil gol laoq nyuljyeqlye baoqshiq'ae, 20 Dilvuq gol laoq nyelcullye maqnaoq, dilluq gol laoq nyelcullye baoqshiq'ae, dilqiq gol laoq sheel'yeqlye zhoqcaeq haqlo'ae, dilbaq gol laoq shuiqcangyil'ae, diljiuq gol laoq nyelcullye zhoqcaeq haqlo'ae, dilshiq gol laoq feiqcuil'ae, dilshiq yiq gol laoq ziqseq maqnaoq'ae, dilshiq el gol laoq ziqseq shuiqjin'ae. 21 Oheiq qyelniq mael laoq zhenzhu qyelniq mael'ae; oheiq hae qiq mael eiq zhenzhu qiq mal lye zongl hhei hhae. Milmae heeqmyel e gaelmaehael laoq qiqgiq maq keq myel e pulsheel'ae, kaol geelxu'lye bo'liq laoqmyel hhae.
22 Ngael milmae heeqmyel onglci'ae heelhaol za maeq mol yil, Hhaoqsongl hhael'onglzaeq zaeqli Momil kaol aeqyol yolyaeq laoq milmae heeqmyel e heelhaol kaol'ae. 23 Milmae heeqmyel tyulmael'ae neelmae kaol baehae mael maq cuqmol biq kael'ae, Momil e rongqyaol mael cuqmol biq dyul maeqcilmyel, aeqyol yolyaeq mael milmae heeqmyel e aeqdael doqhoq geiq kaol'ae. 24 Goqjahael laoq milmae heeqmyel e aeqcael onglci'ae deel maoqlye hhae; milcaeq taq e zongmaehael laoq aeqyoyoq e rongqyaol mael milmae heeqmyel tyulmael'ae heil biq maoqlye hhae. 25 Milmae heeqmyel e oheiq mael laoq mqnao qiqlaq eiq maeq piqtyeq'ae, tyuqvae laoq mqkiq lye eiq maqza'ae. 26 Cholyaeq lye goqjahael e rongqyaol mael kaol maduq za mael laoq milmae heeqmyel tyulmael'ae heil biq maoqlye hhae. 27 Haelzhol e maeqshol hael, xinqlalmyel zongl hael kaol zaqgiqgiq e cholyaeq tyuhael laoq, gilzuqmyel milmae heeqmyel tyulmael'ae maeq hha do'li'ae, cholmil mael aeqyol yolyaeq e aeqyil e suqhhaq taq'ae cuda hhei hael caiq hha do'li hhae.