22
Mqmae yosongl lye ngaeq'ae aeqyil eelcuq e lolbaeq qiqgael bi fu hhei laeq'ae, zheelniqlye shuiqjin laoqmyel hhae, Momil kaol aeqyol yolyaeq e zongmae duqtyel ae'lye yul duyi, 2 Kaol milmae heeqmyel e gaiziq ae'lye yul gol duyil hhae; lolbaeq e niqboq'ae laoq aeqyil aelbol dyeq hhae, aelsiq mael laoq qyelniq sheel'ae, baehae hae qiq siq vae eiq aelsiq siq hhae; aelbol taq e alpaq mael laoq haelzhol e cholyaeqhael yaol zonglmeeq ongl hhae. 3 Aeqgael laoq qiqgiq doqchiq eiq maqza wae. Milmae heeqmyel vae laoq Momil kaol aeqyol yolyaeq e zongmae duqtyel za maoqlye hhae. Yoqhhaeq e yaqhacheqzaq e cholyaeqhael gilzuqmyel yoqhhaeq'ae heel lael biq maoqlye hhae, 4 Kaol yoqhhaeq e maduq mael eiq hhae mol maoqlye hhae. Yoqhhaeq e cholmil mael yoqhhaeteel e naeqdeel taq'ae cuda hhei maoqlye hhae. 5 Mqkiq lye eiq maqza wae; yoqhhaeteel aeqdael doqhoq e aeqcael kaol neelmae aeqcael eiq maq mulyo'ae, Hhaoqsongl Momil yoqhhaeteel e aeqcael geiq maoqlye kaol'ae. Yoqhhaeteel haeqfu keellye zongmae geiq maoqlye hhae.Jidu keellael mael
6 Mqmae yosongl ngaeq'ae yol gee laeq: "Saeziq xihael laoq xiangxinl hhaeq'ae, kaol aeqdilmyel hhae. Hhaoqsongl, xianzhihael e yohael'ae ganqdongl biq e tyutaeq laoq, yoqhhaeq e mqmae yosonglhael yaol moqheilheil du hhei, kaol aeqdilmyel nae'naemyel peqlal maoqlye silqinq mael yoqhhaeq e yaqhacheqzaq e cholyaeqhael'ae tyuqmyeq biq maoqlye hhae." 7 "Naelhaeq, ngael laoq nae'naemyel lael maoqlye lil! Suqhhaq xilmael taq'ae peqlal maoqlye mael geedu mael zongl gaeyil hael laoq geeqlongq meeq vae."
8 Silqinq xihael laoq ngael Yoqhanl haelgaeq haelmol mael'ae. Ngaeq'ae gaeq hhei laeq kaol mol hhei laeq fu, ngael laoq ngaeq'ae tyuqmyeq laeq e mqmae yosongl e aeqkeel yiqsi'ae oqbaqbaq ga hheikaol yoqhhaeq'ae heel biq lil. 9 Yoqhhaeq ngaeq'ae gee laeq: "Aeqdilmyel xilnye maeq zongl hhaeq'ae! Ngael kaol nol, kaol noq e aqsseq aeqnil, xianzhihael, kaol suqhhaq xilmael taq'ae gee mael zongl yil e cholyaeqhael laoq, hhaellaelmyel yaqhacheqzaq e cholyaeq geiq hhae. Nol laoq Momil'ae heel biq maoqhhae." 10 Yoqhhaeq ngaeq'ae gee laeq: "Suqhhaq xilmael taq'ae peqlal maoqlye mael geedu mael maeq hhae fengtyeq'ae, xilnye zongl mael laoq shiqshen niqlael vae kaol'ae. 11 Maeq gongyil e cholyaeqhael'ae laoq, yoqhhaeq'ae haeqfu eiq maeq gongyil e cholyaeq'ae lye bi gul; xinqlalmyel hael laoq, yoqhhaeq'ae haeqfu eiq xinqlalmyel bi ngeel; gongyil e cholyaeqhael'ae laoq, yoqhhaeq'ae haeqfu eiq gongyil e cholyaeq'ae lye bi gul; senljyeq hael laoq, yoqhhaeq'ae haeqfu eiq senljyeq aeqmyel bi ngeel."
12 "Naelhaeq, ngael nae'naemyel yi maoq vae! Biq mael kaol chenqfaq mael laoq ngael lil, kaol aeqsul qiq hhaeq vae eiq aeqyoyoq zongl laoqmyel yoqhhaeq'ae zonglhoq biq maoqlye lil. 13 Ngael laoq A'lafaq lil, ngael laoq Oqmeiqga lil; ngael laoq laefuq fuqli lil, ngael laoq aeqnaol naolli lil; ngael laoq kaishiq e qiq hhaeq lil, ngael laoq jyeqsuq e qiq hhaeq lil." 14 Aeqyoyoq e aelhongq mael ciqshol e tyuhael laoq geeqlongq meeq vae! Yoqhhaeteel laoq aeqyil aelbol tyuqvae hhae keelli e laqtaq hhamul maoqlye hhae, kaol oheiq ae'lye milmae heeqmyel vae hha do'li'ae. 15 Milmae heeqmyel e nildu'ae laoq, aeqkeeq laoqmyel e cholyaeqhael, niqhaeq tulzaeq e cholyaeqhael, ochoq nyegael neemaeba e cholyaeqhael, cholyaeq xyeq e cholyaeqhael, cholyaeq lye zongldu hhei e momilhael'ae heel e cholyaeqhael, kaol haelzhol e zaqgiqgiq mael'ae hhaol biq kaol zongl yil e cholyaeq zhol hhae.
16 "Ngael Yesu laoq ngaeq e mqmae yosongl yaol moqheilheil du hhei mael laoq, jiaolhuilhael gae'lye noteel'ae silqinq xihael bi zoqzenl lil. Ngael laoq Dalweil e aelbol dongqcil lil, yoqhhaeq e houldail lil; ngael laoq zheelniqlye shoqmol aeqgeel lil." 17 Senllinq kaol yaeqmiq alsheq gee: "Lael!" Gaeq hhei biq e cholyaeqhael eiq gee maoqhhae, gee: "Lael!" Eelcuq suq e cholyaeqhael eiq lael maoqhhae, hhaeq lil lye hael laoq alngeiqmyel aeqyil e eelcuq mael hha baq dol'ae.
18 Ngael suqhhaq xilmael taq'ae peqlal maoqlye mael geedu hhei e saeziq mael, hael gaeq yo e cholyaeqhael'ae jinqgaol lil: Aeqsul qiq hhaeq peqlal maoqlye mael geedu e xilmael taq'ae ongljyeq myel aeqchee gee naeq da hhei kaollaoq, Momil laoq suqhhaq xilmael taq'ae cu deelhhei e zaihuol mael yoqhhaeq e aeqhhaol taq'ae baqcheeq da hhei biq maoqlye hhae. 19 Suqhhaq xilmael taq'ae peqlal maoqlye mael geedu hhei e saeziq mael, aeqsul qiq hhaeq lye aeqchee teel hega hhei kaollaoq, Momil laoq suqhhaq xilmael taq'ae cuda hhei e aeqyil aelbol, kaol senljyeq milmae heeqmyel vae lye yoqhhaeq e vuqtu mael hega biq maoqlye hhae. 20 Silqinq xihael'ae zoqzenl e cholyaeq tyutaeq gee: "Ngeel'ae, ngael laoq aeqdilmyel nae'nae lael maoq vae!" Amen! Hhaoqsongl Yesu o! Ngael laoq nol yi lye nyuqlil! 21 Hhaoqsongl Yesu e enhuil mael laoq, senltuqhael nyegael qiqgael baelzhol biq lye nyuqlil. Amen!