Yesu laoq aedeeteel e danbaoq e cholyaeq'ae
2
Ngaeq e yaeqguqhael o, ngael noteel'ae xihael cu biq mael laoq, noteel'ae golsiq maeq bi zonglpizaeq vae lye kaollil. Aeqsul golsiq zonglpizaeq kaollaoq, aeqdae e yiqsi'ae aedeeteel'ae danbaoq e cholyaeq qiq hhaeq zhol'ae, tyutaeq laoq gongyil e Yesu Jidu ngeelvae. 2 Yoqhhaeq aedeeteel e golsiq gae'lye Golsiq Zaelheel geiq vae, aedeeteel e golsiq gae'lye dyul maeqcil, haelzhol cholyaeqhael e golsiq gae'lye hhae. 3 Aedeeteel Momil e minllinl mael zongl gaeyil kaollaoq, aedeeteel laoq yoqhhaeq'ae siqcongl vae lye loq wae. 4 Aeqsul yoqhhaeq "ngael yoqhhaeq'ae siqcongl lil vae" lye gee, ngeelfeiq, yoqhhaeq e minllinl mael maeq zongl gaeyil laol, zaqgiqgiq e cholyaeq ngeelvae, kaol zhen'liq mael yoqhhaeq onglci vae maqza vae. 5 Ngeelfeiq, aeqsul yoqhhaeq e saeziq mael zongl gaeyil laol, yoqhhaeq Momil'ae gaeq e neemae mael aeqdilmyel yoqhhaeq e onglci'ae qiqgiq geehhael maqza vae. Xilnye laol, aedeeteel laoq aedeeteel Momil onglci vae zhol hhae lye loq wae. 6 Aeqsul aeqyoyoq laoq yoqhhaeq onglci vae zhol lil lye gee laol, yoqhhaeq zongl laoqmyel zongl yil maoqhhae.Minllinl yosheq
7 Ngael gaeq e yelchoqhael o, ngael noteel'ae minllinl yosheq qiq doq cu biq maeqngeel yil, zhoqmyel fu ae'lye za e minllinl yogeil mael'ae. Minllinl yogeil xilmael laoq noteel gaeq gol e saeziq mael ngeelvae. 8 Qiqshiq laoq, ngael noteel'ae cu biq mael minllinl yosheq qiq doq'ae, Jidu kaol noteel'ae lye gee'li'laol, xilmael laoq aeqdilmyel hhae, nahongq mael aeqyae aeqyae'lye buyil hhei, aeqdilmyel e aeqcael mael cuqmol hhei vae.
9 Aeqsul aeqyoyoq aeqcael onglci vae zhol lil lye gee, ngeelfeiq, yoqhhaeq e aqsseq aeqnilhael'ae neemasu zaq biq laol, yoqhhaeq yaeqmeel keellye nahongq vae zhol wae siq. 10 Aeqsul aqsseq aeqnilhael'ae gaeq biq laol, aeqcael onglci vae zhol ngeelvae, kaol yoqhhaeq aeqcael onglci vae maeq jye'leeq yil kiq'ae. 11 Aeqsul aqsseq aeqnilhael'ae neemasu zaq biq laol, nahongq vae zhol, kaol aeqchee zongl mael eiq nahongq vae zongl ngeelvae. Nahongq lye yoqhhaeq e ma'ne mael zonglbyeq biq, tyulkaol, yoqhhaeq haeqvae yil maoqlye maeq loq'ae.
12 Yaeqguqhael o, ngael noteel'ae xinl cu biq mael laoq, noteel e golsiq mael Hhaoqsongl e cholmil ae'lye noteel'ae shelmianq biq vae kaol'ae. 13 Yaeqmoqhael o, ngael noteel'ae xinl cu biq mael laoq, noteel laoq mqmae milcaeq zonglbeibei du hhei laefuq ae'lye zhol e tyutaeq yaol siqcongl kaol'ae. Yaqyoyaeqhael o, ngael noteel'ae xinl cu biq mael laoq, noteel laoq duqlaq e tyutaeq yaol zonglyinq vae kaol'ae. 14 Yaeqguqhael o, ngael noteel'ae xinl cu biq mael laoq, noteel aeqdae'ae siqcongl kaol'ae. Yaeqmoqhael o, ngael noteel'ae xinl cu biq mael laoq, noteel laoq mqmae milcaeq zonglbeibei du hhei laefuq ae'lye zhol e tyutaeq yaol siqcongl kaol'ae. Yaqyoyaeqhael o, ngael noteel'ae xinl cu biq mael laoq, noteel aqhabo, kaol Momil e saeziq mael noteel onglci'ae za, kaol noteel duqlaq e tyutaeq yaol zonglyinq vae kaol'ae.
15 Shilgail kaol shilgail taq e moqgoq mael'ae haeq gaeq gil. Cholyaeq shilgail'ae gaeq kaollaoq, aeqdae'ae gaeq biq mael yoqhhaeq e onglci'ae maqza wae. 16 Milcaeq taq e gilzuqmyel hael laoq, ruqtiq e saqdol lal aeqmyel mulgoq tyulmael, ma'ne maellye mol hhei'laol saqdol lal aeqmyel mulgoq tyulmael kaol xi qiqyil e dilqeizaeq mael, gilzuqmyel aeqdae ae'lye lael maeqngeel'ae, milcaeq taq ae'lye lael kaol'ae. 17 Shilgail xilmael kaol milcaeq taq e saqdol lal aeqmyel mulgoq tyulmael aeqyae aeqyae'lye buyil kiq hhae, ngeelfeiq, Momil e zhiqyil mael laoqmyel zongl yil e cholyaeq laoq, haeqfu eiq zhol deel'ae.
Jidu'ae diqqye e cholyaeqhael
18 Yaeqguqhael o, yaeqmeel laoq aeqnaol naolli naohaeq wae. Noteel laoq Jidu'ae diqqye e cholyaeqhael lael maoqlye hhae lye gaeq gol'ae, yaeqmeel Jidu'ae diqqye e cholyaeq haelnaeqmyel lael wae; tyulkaol, aedeeteel laoq xilmael aeqnaol naolli naohaeq wae lye loq'ae. 19 Yoqhhaeteel aedeeteel onglci ae'lye deelsae hhei, xilmael laoq, yoqhhaeteel aedeeteel boq e maeqngeel wae lye hhae. Qiqshiq laoq, yoqhhaeteel aedeeteel boq e maeqngeel'ae, aeqdilmyel aedeeteel boq e lil lye kaollaoq, aeqdilmyel aedeeteel nyegael qiqgael baelzhol wae siq. 20 Noteel'ae laoq senljyeq qiqhhaeq lye gaoyouq xyecheeq hhei biq vae, xilmael laoq noteel haetaeq eiq loq hhae. 21 Ngael noteel'ae xinl cu biq mael laoq, noteel zhen'liq mael maeq loq'ae lye kaol maeqngeel yil, noteel siqcongl'ae, kaol gilzuqmyel zaqgiqgiq mael zhen'liq ae'lye du'lal maeqngeel'ae lye loq'ae lye kaollil. 22 Aelmaol, aeqsul laoq zaqgiqgiq hhaemaeq? Yesu laoq Jidu maeqngeel'ae lye gee e tyuhael maeqngeel maeq? Aeqdae kaol yaqyo yaol maeq cenqrenl nae hael laoq, Jidu'ae diqqye e cholyaeq ngeelvae. 23 Aeqsul Yaqyo'ae maeq cenqrenl laol, aeqdae maeq zhol'ae; Yaqyo'ae cenqrenl laol, aeqdae eiq zhol wae.
24 Noteel laoq, zhoqmyel fu ae'lye haelgaeq mael noteel e neemae vae nyuqtongq deelzaeq hhei maoqhhae; noteel zhoqmyel fu ae'lye haelgaeq mael noteel neemae vae nyuqtongq deelzaeq hhei kaollaoq, noteel laoq Yaqyo kaol aeqdae onglci vae zhol wae. 25 Yoqhhaeq aedeeteel'ae biq laqngeel lye gee gol laq mael laoq, haeqfu eiq zadeel e aeqyil mael ngeelvae. 26 Ngael noteel'ae xihael cu biq mael laoq, noteel'ae zaqgiqgiq biq e cholyaeqhael'ae gee lil. 27 Noteel laoq, noteel'ae Hhaoqsongl lye gaoyouq xyecheeq hhei biq mael haeqfu eiq neemae onglci'ae nyuqtongq deelhhei laol, cholyaeq noteel'ae maeq geemyeq biq kael vae, yoqhhaeq e gaoyouq xyecheeq hhei laeq mael aeqchee silqinq mael taq vae eiq noteel'ae geemyeq laeq'ae. Gaoyouq xyecheeq e xilmael laoq aeqdilmyel hhae, jaq maeqngeel'ae, noteel gaoyouq xyecheeq e geemyeq mael laoqmyel yoqhhaeq onglci'ae zhol maoqhhae.
Momil e yaeqguqhael laoq golsiq maeq zonglpizaeq'ae
28 Yaeqguqhael o, noteel Hhaoqsongl onglci vae zhol maoqhhae, xilnye laol, yoqhhaeq mol du'lal kaollaoq, aedeeteel qiqgiq maq gu kael wae; kaol yoqhhaeq yi fu, aedeeteel yoqhhaeq'ae maeq mol sael yae lye maq hoqhhaq kael wae. 29 Noteel laoq Momil gongyil hhae lye loq kaollaoq, gongyil gae'lael aeqmyel zongl e cholyaeqhael laoq, gilzuqmyel yoqhhaeq ae'lye du'lal hhae lye loq maoqhhae.