Ochoq nyegael neemaeba e silqinq maeq zongl hhaeq'ae
5
Ngael noteel onglci'ae ochoq nyegael neemaeba e silqinq mael za'ae lye aeqdilmyel gaeq wae; ochoq nyegael neemaeba e xilmael baeqjyelboq minqcuq e cholyaeqhael onglci'ae dyel'eiq maqza'ae, silqinq xilmael laoq, qiqhhaeq laelhhaeq yoqhhaeq e aeqmae mae'nil nyegael qiqgael ssuqza mael ngeelvae. 2 Noteel dilqeizaeq wae siq! Noteel laoq nyuqsaeq maoq, kaol xilnye zongl e cholyaeq yaol noteel onglci ae'lye lyeqdu biq maoq maeqngeel maeq? 3-4 Ngael noteel tyuqvae maeq baelzhol feiq, neemae mael laoq noteel tyuqvae baelzhol lil, kaol noteel nyegael qiqgael baelzhol laoqmyel lil. Ngael aedeeteel e Hhaoqsongl Yesu e cholmil maellye xilnye zongl e cholyaeq yaol shenqpanl biq aeqwae. Noteel julhuilkei gil fu, ngaeq e neemae mael noteel nyegael qiqgael baelzhol'ae. Noteel aedeeteel e Hhaoqsongl Yesu e onglzaeq ae'lye, 5 Xilnye cholyaeq yaol Saqdanl'ae eemoq biq maoqhhae, kaol yoqhhaeq e ruqtiq mael bi zonglmye hhei, xilnye laol, yoqhhaeq e yohael mael Hhaoqsongl e naohaeq'ae hhae bi deqjiul wae. 6 Noteel aeqyoyoq xilnye hodazaq mael laoq maeqmeeq'ae. Noteel laoq meelzillye paofenq maellye hhaeqxul qiq lye mael bi zheeqlaelkiq'ae lye maeq loq gil laeq hhaemaeq? 7 Noteel laoq paofenq maqzoq e hhaeqxul'ae, kaol paofenq e yogeil mael zonglshol du hhei maoqhhae, xilnye laol, noteel laoq yosheqsheq e hhaeqxul qiq lye peqlal; aedeeteel e Yuq'yeqjyeq e aeqyol yolyaeq Jidu laoq, bi xyeq hheikaol heelda hhei vae kaol'ae. 8 Tyulkaol, aedeeteel zaeqnao xilmael gol fu, yogeilgeil e paofenq maq hha mul'ae, maq hha mul mael laoq, daiqduq kaol duqlaq e paofenq mael ngeelvae, aeqdilmyel e qiqgiq maq keq e maeq zheeqlael yo e aqba mael oqlye mul maoqhhae.9 Ngael laefuq noteel'ae xinl cu biq fu geegaeq gol biq, ochoq nyegael neemaeba e cholyaeq nyegael yelchoq haq geiq. 10 Saeziq xilmael laoq shilgail xilmael taq'ae ochoq nyegael neemaeba hael'ae paelsilmyel neemaecuqm hael'ae, haguzaq hael'ae paelsilmyel cholyaeq lye zongldu hhei e momilhael'ae baqheel e gilzuqmyel cholyaeq xihael'ae gee maeqngeel'ae; xilnye kaollaoq, noteel shilgail xilmael'ae maeq deelsae maeq hhaeq'ae. 11 Ngeelfeiq, yaeqmeel ngael noteel'ae xinl cu hheikaol geegaeq laeqngeel, cholyaeqhael yoqhhaeteel aqsseq aeqnil lil lye gee, ngeelfeiq, ochoq nyegael neemaeba, paelsilmyel neemaecuqm, paelsilmyel cholyaeq lye zongldu hhei e momilhael'ae baqheel, paelsilmyel cholyaeq'ae vuqzaeq, paelsilmyel zilbubu, paelsilmyel haguzaq kaollaoq, noteel xilnye cholyaeq nyegael yelchoq haq geiq, yoqhhaeq nyegael aelhoq dyel'eiq qiqgael maeq hhae zaeq'ae. 12 Jiaolhuil nildu cholyaeq'ae shenqpanl biq mael ngaeq'ae aeqchee guanqyo kaollaeq? Jiaolhuil e cholyaeq'ae laoq noteel shenqpanl biq maoq maeqngeel maeq? 13 Jiaolhuil nildu cholyaeq'ae laoq Momil shenqpanl hhae. Momil e Suqhhaq taq'ae gee laoqmyel: "Noteel onglci ae'lye duqlaq e cholyaeq tyuhael yaol lyeqdu maoqhhae."