Qiqhhaeq qiqhhaeq'ae zhiqmoq maeq kae hhaeq'ae
6
Noteel onglci'ae qiqhhaeq qiqhhaeq'ae deiqgae gil e silqinq mael za'ae, haelmillyekaol Hhaoqsongl'ae maeq xiangxinl e cholyaeq yiqsi'ae zhiqmoqkae li peq, senltuq e yiqsi'ae laoq maeq kae li gil lilmaeq? 2 Noteel senltuqhael laoq shilgail'ae shenqpanl maoqhhae lye maeq loq gil laeq hhaemaeq? Shilgail mael noteel lye hhae bi shenqpanl kaollaoq, noteel mildi'lye silqinq xilmael'ae shenqpanl e maeq zae maeq? 3 Noteel laoq aedeeteel mqmae yosongl'ae shenqpanl maoqhhae lye maeq loq laeq hhaemaeq? Xi qiqyil e silqinq mael laoq nyeq'ei maeq gee kael vae! 4 Tyulkaol, noteel xi qiqyil'ae shenqpanl maoq e silqinq za kaollaoq, jiaolhuil maeq fuyo e cholyaeq yaol maeqhael bi shenqpanl lael? 5 Ngael saeziq xilmael gee mael laoq noteel'ae bi saqdol li maoq. Noteel onglci'ae silqinq xilmael shenqpanl ongl e geel e aqsseq aeqnil qiq hhaeq eiq maeq zhol hhaemaeq? 6 Ngeelfeiq, aqsseq aeqnilhael laoq aqsseq aeqnilhael'ae zhiqmoqkae gil'ae, kaol Hhaoqsongl'ae maeq xiangxinl e cholyaeq e yiqsi'ae kae keelli. 7 Noteel qiqhhaeq qiqhhaeq'ae zhiqmoqkae gil e xilmael laoq, noteel zhee ba wae. Aeqcheekaol ochoq lye maeqngeel maeqngeelmyel maeq bi gee goq laeq? Aeqcheekaol ochoq'ae pinqyil teel eiq maeq bi zanl goq laeq? 8 Ngeelfeiq, noteel cholyaeq'ae maeqngeel maeqngeelmyel gee biq, ochoq'ae pinqyil zanlzaeq biq, maeqngeel maeqngeelmyel gee biq kaol pinqyil zanlzaeq biq mael laoq aqsseq aeqnilhael'ae ngeelvae. 9 Noteel laoq maeq gongyil e cholyaeq laoq, Momil e goqja mael maq hhamul'ae lye maeq loq gil laeq hhaemaeq? Aeqyoyoq'ae zaqgiq haq giqzaq hoq! Aeqsul nyegael eiq byuq ssuqza hael haoq, cholyaeq lye zongldu hhei e momilhael'ae heel hael haoq, haeqmiq haqyo zhol e cholyaeq ochoq nyegael neemaeba hael haoq, haqyoyaeq'ae bi ssuqza e haqyoyaeqhael haoq, haqyoyaeq laoq haqyoyaeq nyegael byuqmaoqzaeq hael haoq, 10 Kaol lolbiq haoqzaeq hael haoq, neemaecuqm hael haoq, zilbu hael haoq, ochoq'ae vuq hael haoq, haguzaq hael haoq, gilzuqmyel Momil e goqja mael maq hhamul congl'ae. 11 Yilkaefu noteel onglci vae eiq xilnye cholyaeq zhol hhae; ngeelfeiq, yaeqmeel noteel yaol Hhaoqsongl Yesu Jidu e cholmil maellye, kaol aedeeteel e Momil e yohael ae'lye ciqshol aeqwae, kaol senljyeq wae lye peqlal e cholyaeq wae, kaol gongyil e cholyaeq'ae lye bi gul vae.Aeqhhaol maellye Momil'ae rongqyaol biq
12 "Ngael aeqchee silqinq eiq zongl kael'ae", ngeelfeiq, aeqchee silqinq myel meeqyo'lael kiq maeqngeel'ae. "Ngael aeqchee silqinq eiq zongl kael'ae", ngeelfeiq, ngaeq yaol silqinq qiq mal lye eiq maeq bi zongltyeq hhei yil. 13 "Zaeqzael laoq oqma gae'lye hhae, oqma laoq zaeqzael gae'lye hhae"; ngeelfeiq, Momil lye xi niq mal zonglmye maoqlye hhae. Aeqhhaol mael laoq ochoq nyegael neemaeba maoqlye gae'lye maeqngeel'ae, Hhaoqsongl gae'lye hhae; Hhaoqsongl eiq aeqhhaol gae'lye hhae. 14 Momil lye Hhaoqsongl yaol bi dyeqhoqlal vae, kaol yoqhhaeq aeqyoyoq e onglzaeq maellye aedeeteel yaol bi dyeqhoqlal laqngeel lye hhae. 15 Noteel laoq noteel e aeqhhaol mael laoq Jidu e zhitiq'ae lye maeq loq gil laeq hhaemaeq? Ngael Jidu e zhitiq mael jilnyuq e zhitiq maeqhael hha geiq? Aeqdilmyel maeq hhaeq'ae! 16 Noteel laoq jilnyuq nyegael qiqgael byuqmaoqzaeq hael laoq, yoqhhaeq nyegael aeqhhaol qiq siq laoqmyel peqyil wae lye maeq loq gil laeq hhaemaeq? Hhaoqsongl xilnye gee kaol'ae: "Cholyaeq niq nulhhaeq laoq aeqhhaol qiq siq laoqmyel peqlal aeqwae." 17 Ngeelfeiq, Hhaoqsongl nyegael qiqgael kaeqmaoq deelhhei hael laoq, Hhaoqsongl nyegael yohael qiq mal peqlal ngeelvae.
18 Noteel laoq ochoq nyegael neemaeba mael'ae hoqhhaq maoqhhae. Cholyaeq zonglzhil mael laoq, aeqchee golsiq haoq, gilzuqmyel aeqhhaol nildu vae zongl hhae; ngeelfeiq, ochoq nyegael neemaeba mael laoq aeqyoyoq e aeqhhaol'ae zonglzhilzaeq hhae. 19 Noteel laoq noteel e aeqhhaol mael laoq senllinq e heelhaol'ae lye maeq loq gil laeq hhaemaeq? Senllinq xilmael laoq Momil ae'lye lael hhae, kaol noteel onglci'ae zhol hhae. Kaol noteel e aeqhhaol mael laoq noteel e maeqngeel'ae, 20 Noteel yaol laoq hhaeqpyuq zhee ha myel vul laq kaol'ae. Tyulkaol, noteel e aeqhhaol maellye Momil'ae rongqyaol biq maoqhhae.