Shiqtuq e mulhhael
4
Tyulkaol, cholyaeq vae ngaeteel laoq Jidu e zhiqsil'ae, kaol Momil e aolmiq e guanqja'ae lye bi fu maoqhhae. 2 Guanqja'ae zongl maoqhhae lye gee biq mael laoq, yoqhhaeq laoq neemae qiqsiqmyel zongl maoqhhae lye mael ngeelvae. 3 Noteel ngaeq'ae panlduanl laeq, paelsilmyel ochoq ngaeq'ae panlduanl laeq, ngaeq'ae lye fu'li'laol meelhee'lye silqinq'ae; ngael aeqyoyoq dyel'eiq aeqyoyoq'ae maeq panlduanl hoq yil. 4 Ngael aeqyoyoq ba yae lye maeq kei yil, ngeelfeiq, xilnye gae'lye ngaeq'ae golsiq maqza'ae lye maeq hhae gee laeq'ae; ngaeq'ae golsiq za'ae lye gee laeq qiq hhaeq laoq Hhaoqsongl'ae. 5 Tyulkaol, shiqshen maeq keel'ae siq, Hhaoqsongl lael laefuq'ae yulnye xilnye lye qiqgiq haeq gee, yoqhhaeq lye nahongqlye vae zonglhhaq e silqinq mael bi mol du'lal, kaol cholyaeq e zongl yil maoqlye mael geedu hhei maoqlye hhae. Tyuqfu, haetaeq vae eiq Momil e tyuqvae lye laqma hhae bi deiqqei wae. 6 Aqsseq aeqnilhael, noteel gae'lye, silqinq xihael ngael aeqyoyoq kaol Yalbo'loq e aeqhhaol taq'ae zongl du hhei mael laoq, noteel yaol ngaeteel ae'lye "Momil e Suqhhaq taq'ae cu deel mael'ae maeq hhae jyeqli'ae" lye xi qiq doq e yilsi mael bi xoqdozaq hhei maoqlye lil, aeqgael noteel aeqyoyoq dilqeizaeq laol, xitaeq'ae laoq fu'qiq'ongl, yultaeq'ae laoq maeq fu'qiq'ongl biq maeqhe. 7 Noq yaol ochoq nyedullye maeq bi dul laeq mael laoq aeqsul maeq? Noq'ae halzahael laoq hae qiq mal eiq hhamul hhei laq maeqngeel maeq? Hhamul hhei kaollaoq, hhamul hhei biq maeqngeel laoqmyel, aeqcheekaol aeqyoyoq'ae hodazaq lilmaeq? 8 Noteel laoq zaeqdye aeqwae, aeqchee eiq zacongl wae, kaol ngaeteel yaol maq mulyo vae, kaol aeqyoyoq zongmae geiq wae. Ngael noteel yaol aeqdilmyel zongmae bi geiq goq yae, kaol ngaeteel eiq noteel nyegael zongmae qiqgael hha bal geiq wae! 9 Ngael nyuq laoq, Momil lye ngaeteel shiqtuq geiq hael yaol hhae sil e golsiq za'ae lye gee biq e koqlongl deelhhei e cholyaeq laoqmyel, jiaohuil onglci'ae fuqsil e cholyaeqhael e aeqnaol naolli e zholhhael vae bi zhol laeq hhae, ngaeteel laoq yanqxil kei e cholyaeq laoqmyel hhae, kaol shilgail'ae, mqmae yosongl'ae kaol cholyaeqhael'ae bi chifu kaol'ae. 10 Ngaeteel Jidu gae'lye yaeqzhoqzhoq yil hhei; noteel Jidu onglci'ae laoq geel she. Ngaeteel laoq ruanqroq yae, noteel laoq aqha zhee bo she; noteel laoq rongqyaol za she, ngeelfeiq, ngaeteel'ae laoq bi fudyul. 11 Yaeqmeel keellye, ngaeteel laoq myeq eiq myeq, suq eiq suq, aeqhhaol eiq nyelguqlye, diq eiq bi diq hhei, haeqvae zhol lye maqza, 12 Kaol duqhee'lye aeqyoyoq e aqlaq maellye mulhhael mul; ochoq vuq laeq fu, ngaeteel laoq yoqhhaeq'ae geeqlongq biq biq lil; cholyaeq lye guaeq'ei bi diqqye fu, ngaeteel laoq zityeq lil; 13 Cholyaeq lye geekyuq laeq fu, ngaeteel laoq haelmeeqlye geehoq biq lil. Yaeqmeel keellye, cholyaeqhael ngaeteel yaol shilgail taq e maeqshol mael, kaol halza haelzholhael onglci e zaebeeq'ae lye fu gil laeq hhae.14 Ngael saeziq xihael cu mael laoq, noteel yaol bi saqdol maoqlye maeqngeel yil, ngael gaeq e yaeqmiq yaqyo'ae geemyeq biq laoqmyel noteel'ae geemyeq lil. 15 Jidu onglci'ae noteel'ae laoq geemyeq laoqsi haelnaeqmyel zhol'ae, ngeelfeiq, aeqdae laoq haelnaeqmyel maeq zhol'ae, ngaeq lye noteel yaol Jidu Yesu onglci'ae lye fuqyin maellye bo hhei biq kaol'ae. 16 Tyulkaol, ngael noteel laoq ngael zongl laoqmyel bael zongl gil lye geezaeq lil. 17 Tyulkaol, ngael Tiqmoqtail yaol noteel tyuqvae yil lye moqheilheil du hhei aeqwae. Yoqhhaeq laoq Hhaoqsongl onglci'ae ngael gaeq e kaol xiangxinl hhaeq kael e yaqyo'ae; yoqhhaeq noteel'ae ngael Jidu Yesu onglci'ae haelzongl silqinq mael taq'ae, kaol haeqvae lael'ee myel e jiaolhuil onglci vae cholyaeq'ae haelmillye geemyeq biq'ae lye mael geetae laeq'ae.
18 Qiqmiq laelmiq laoq ngael noteel tyuqvae maq yi vae lye kei biq, kaol aeqyoyoq dilqeizaeq gil hhae. 19 Ngeelfeiq, Hhaoqsongl hhaeq lil lye kaollaoq, ngael nae'naemyel noteel tyuqvae yi maoq; ngael loq maoqlye mael laoq, dilqeizaeq e tyuhael e saeziq mael maeqngeel'ae, yoqhhaeteel e onglzaeq mael'ae. 20 Momil e goqja laoq, saeziq gee mael'ae fuyo biq maeqngeel'ae, onglzaeq mael'ae fuyo biq kaol'ae. 21 Noteel haelmillye mael mulgoq yae maeq? Ngael haeqdul baq hheikaol noteel tyuqvae yi laeq, paelsilmyel naoqyae'lye gaeq e neemae za aeqmyel yi laeq?