Momil e mulhhael mael qiqgael mul e cholyaeq
3
Aqsseq aeqnilhael, ngael laefuq noteel'ae senllinq zhol e cholyaeq'ae saeziq gee biq laoqmyel gee maeqngeel yil, milcaeq taq e cholyaeq'ae gee biq laoqmyel gee lil. Noteel Jidu onglci'ae laoq albye byeyaeq wae siq. 2 Ngael noteel'ae aeqchil bi dol, noteel'ae aelhoq maeq bi zaeq yil, tyuqfu, noteel maeq zaeq kiq kaol'ae. Ngeelfeiq, yaeqmeel eiq maeq zaeq kiq wae siq, 3 Noteel laoq milcaeq taq e kaol'ae. Noteel onglci'ae heiqcilnael, zonglgae mael za, noteel laoq milcaeq taq e cholyaeq'ae, kaol milcaeq taq e cholyaeqhael laoqmyel ssuqhaoq caqzaq maeqngeel maeq? 4 Qiq hhaeq laoq gee: "Ngael laoq Baoqloq boq lil;" baeqjyelboq e qiq hhaeq laoq gee: "Ngael laoq Yalbo'loq boq lil;" xilnye laol, noteel laoq milcaeq taq e cholyaeqhael laoqmyel qiqsheel maeqngeel maeq? 5 Yalbo'loq laoq aeqsul lil lye hhaemaeq? Baoqloq laoq aeqsul lil lye hhaemaeq? Ngaeteel laoq gilzuqmyel Momil e zhiqsil lil, kaol ngaeteel ae'lye noteel xiangxinl vae; xilmael laoq, Hhaoqsongl haetaeq'ae haelmillye biq biq laol haelmillye zongl yil dyul wae. 6 Ngaeq lye til do hhei wae, Yalbo'loq laoq eelcuq beiqxeiq biq, ngeelfeiq, Momil lye bi heeqda lal hhae. 7 Tyulkaol, til do cholyaeq laoq qiqgiq maeq suanl'ae, eelcuq beiqxeiq e cholyaeq eiq qiqgiq maeq suanl'ae; ngeelfeiq, bi heeqda lal mael laoq Momil maoq maeq ongl'ae. 8 Til do qiq hhaeq kaol eelcuq beiqxeiq qiq hhaeq laoq qiqsheel ngeelvae, ngeelfeiq, aeqgael aeqsul eiq aeqyoyoq e duqhee'lye mul maellye aeqyoyoq e mulhhael hhaeqpyuq mael hhamul'ae. 9 Ngaeteel laoq Momil nyegael mulhhael qiqgael mul e cholyaeq lil, noteel laoq Momil e haeldye, kaol Momil e laoqhaol'ae.10 Ngael Momil ngaeq'ae biq laq e endianq xilmael lye, geel e aeqhael mulyaeq e yoheeq laoqmyel lil, yoqhhaeq congqciq paeqhhael duq meeq hhei, ochoq laoq holtaqboq'ae cuda; ngeelfeiq, haetaeq eiq holtaqboq'ae haelmillye cu da'li maoqlye zongl mael aeqyae'lye kei maoqhhae. 11 Duq meeq e congqciq paeqhhael tyulmael laoq Yesu Jidu ngeelvae, qiq hhaeq eiq baeqjyelboq e congqciq paeqhhael maeq zongltul ongl kaol'ae. 12 Cholyaeq pulziq pulsheel, baoqshiq, aelbol, haeqyiq, kaol aelkongq maellye, congqciq paeqhhael xilmael taq'ae cuda hhei kaollaoq, 13 Haetaeq e mulhhael mael eiq aeqdilmyel mol du'lal'ae, naohaeq tyulmael ae'lye mulhhael tyulmael bi mol du'lal maoqlye hhae, aeqzaeq doq maellye mulhhael mael bi mol du'lal, aeqzaeq xilmael haetaeq e mulhhael mael laoq haelmillye hhaemaeq lye shilfu maoqlye kaol'ae. 14 Cholyaeq lye congqciq paeqhhael tyulmael taq'ae cu da'li e mulhhael mael zadeel ongl kaollaoq, yoqhhaeq laoq shangqcil mael hhamul maoqlye wae. 15 Cholyaeq e mulhhael mael pezaq hhei kaollaoq, yoqhhaeq laoq hhae sunqshiq wae, yoqhhaeq aeqyoyoq laoq hha deqjiul'ae, ngeelfeiq, aeqzaeq doq myel ae'lye deelpol duyil laoqmyel hhae.
16 Noteel aeqyoyoq laoq Momil e heelhaol, kaol Momil e yohael mael noteel onglci'ae zhol hhae lye maeq loq gil laeq hhaemaeq? 17 Aeqsul lye Momil e heelhaol mael zonglba hhei kaollaoq, Momil laoq aeqdilmyel cholyaeq tyutaeq yaol zonglmye maoqlye hhae; Momil e heelhaol mael laoq senljyeq kaol'ae, noteel laoq Momil e heelhaol xilmael ngeelvae.
18 Noteel aeqyoyoq'ae zaqgiq maq hha giqzaq hoq'ae. Noteel onglci e cholyaeq yaeqmeel shilgail vae geel lil lye keizaeq kaollaoq, yaeqzhoqzhoq yil hhei mael hhael hhaeq wae, xilnye laol geel cholyaeq caiq peqlal kiq hhae. 19 Yaeqmeel shilgail e geel mael laoq Momil'ae lye fu'li'laol yaeqzhoqzhoq kaol'ae. Momil e Suqhhaq taq'ae cu deelhhei laoqmyel:
"Hhaoqsongl lye geel cholyaeq yaol aeqyoyoq lye daeq deelhhei e hhaekeiq vae bi leeqdo hhei vae;"
20 Yol gee:
"Hhaoqsongl laoq geel cholyaeq e neemae'ae nyuq mael loq'ae,
neemae nyuq mael laoq qiqgiq yilsi maqza kaol'ae."
21 Tyulkaol, qiq hhaeq eiq cholyaeq'ae maeq hhae hoda biq'ae; halzahael laoq gilzuqmyel noteel hhae, 22 Baoqloq haoq, Yalbo'loq haoq, Jifaq haoq, shilgail haoq, dyeq haoq, sil haoq, yaeqmeel e silqinq haoq, aeqgael e silqinq haoq, gilzuqmyel noteel hhae, 23 Noteel laoq Jidu hhae, Jidu laoq Momil hhae.