Momil Yiqsellyel cholyaeq yaol saelpodu hhei
9
Ngael Jidu onglci'ae gee e saeziq mael laoq aeqdilmyel hhae, zaqgiqgiq e saeziq maeq gee yil; ngaeq e liangqxin mael senllinq ganqdongl laeq kaol ngaeq'ae bal zoqzenl laeq'ae. 2 Ngael zhee nyuqsaeq yae, duqlye neemae onglci'ae maeq zholsael yae. 3 Ngaeq e aqsseq aeqnilhael kaol ngaeq e qiqbeeqleel cholyaeqhael gae'lye, ngael aeqyoyoq vae doqchiq bi gee hhei, Jidu nyegael geqtael laeq kaol'eiq hhaeq lil. 4 Yoqhhaeteel laoq Yiqsellyel cholyaeq'ae; yaqyo hha geiq mael, rongqyaol, mee'nae sheel e geemeeq deelhhei mael, lilfaq, heel e gui'liq, kaol biq laqngeel lye gee hael gilzuqmyel yoqhhaeteel'ae heil hhei biq hhae. 5 Aeqpyuq aeqdaehael eiq yoqhhaeteel hhae, ruqtiq'ae lye gee'li'laol Jidu eiq yoqhhaeteel ae'lye du'lal hhae. Cholyaeqhael halza haelzholhael holtaq'ae zhol e Momil'ae haeqfu keellye maeqdaeqhhaeq'ae lye gee biq lye nyuqlil. Amen!6 Xilnye gee mael laoq Momil e saeziq mael alngeiqmyel wae lye gee maeqngeel yil. Yiqsellyel e holdail hael laoq, haelzhol myel Momil lye saelpodu hhei e cholyaeq'ae lye maeqngeel'ae, 7 Yalboqlahanl e yuqpaeq yuqnyul hael laoq haelzhol myel Yalboqlahanl e holdail'ae lye eiq maeqngeel'ae; Momil Yalboqlahanl'ae xilnye gee gol biq: "Yiqsaq ae'lye du'lal biq hael maoqlaol, noq e houldail'ae lye maeq hhae gul biq'ae." 8 Xilnye gee mael laoq, ruqtiq ae'lye bo hhei e yaeqmiq yaqyo laoq Momil e yaeqmiq yaqyo maeqngeel'ae, biq laqngeel lye gee gol biq e yaeqmiq yaqyohael maoqlaol houldail maeq suanl hhaeq'ae. 9 Biq laqngeel lye gee gol e saeziq mael laoq xilnye kaol'ae: "Aeqgael naqhoq e yaeqmeel fu ngael lael maoq, Saqla laoq aeqdilmyel yaqyo qiq hhaeq bo hhei maoqlye hhae." 10 Xilnye maeqcil, Lilbaiqja eiq xilnye hhae. Yoqhhaeq laoq aedeeteel e aeqpyuq aeqdae onglci'ae Yiqsaq lye gul biq e qiq hhaeq ae'lye yaeqguqpi hhei vae. 11-12 Momil cholyaeq'ae saelpodu e zhiqyil mael bi peqlal maoqlye mael laoq, cholyaeq e xinqweiq ae'lye maeqngeel'ae, cholyaeq yaol gul du hhei biq e tyutaeq ae'lye hhae. Haeqmoq maeq bogae hhei siq, yoqhhaeteel e xinqweiq mael meeq'ae dyul'ae lye maeq loq siq fu, Momil Lilbaiqja'ae gee biq: "Naeshoq aeqnao'ae, hhael heeq e qiq hhaeq laoq hhael nil e qiq hhaeq vae fuqsil biq maoqlye hhae." 13 Momil e Suqhhaq taq'ae cu deelhhei laoqmyel: "Yaqgel laoq ngael gaeq e qiq hhaeq'ae; Yiqsaoq laoq ngael hol e qiq hhaeq'ae."
14 Xilnye laol, aedeeteel aeqchee gee siq laeq? Momil'ae laoq maeq gongyil myel aeqchee za maeq? Aeqdilmyel maqza'ae! 15 Yoqhhaeq Moxi'ae gee biq:
"Ngael aeqsul'ae hhaoqsaeqsaeq biq maoqlye laol,
aeqsul'ae hhaoqsaeqsaeq biq maoq,
aeqsul'ae meeq biq maoqlye laol,
aeqsul'ae meeq biq maoq."
16 Xilnye fu hhei'laol, xilmael laoq cholyaeq hael nyuq hhei mael'ae kaolzaeq maeqngeel'ae, cholyaeq hael zonglkeel ongl myel zongl mael'ae kaolzaeq eiq maeqngeel'ae, Momil e hhaoqsaeqsaeq maellye hhae. 17 Momil e Suqhhaq taq vae faqlaoq'ae gee biq e saeziq za kaol'ae: "Ngaeq lye noq yaol deiqqei hhei biq mael laoq, noq e aeqhhaol taq'ae ngaeq e onglzaeq mael bi mol du'lal maoq, kaol ngaeq e cholmil mael halza milcaeq vae bi geegaeq keelyil maoqlye kaollil." 18 Xilnye fu hhei'laol, Momil laoq aeqsul'ae hhaoqsaeqsaeq biq maoqlye laol aeqsul'ae hhaoqsaeqsaeq biq hhae, aeqsul'ae neeha bi ha maoqlye laol aeqsul'ae neeha bi ha hhae.
Momil e faqhoqkei mael kaol hhaoqsaeqsaeq mael
19 Xilnye laol, nol ngaeq'ae gee laelkiq: "Aelmaol, yoqhhaeq aeqcheekaol cholyaeq'ae gaezaeq siq laeq? Aeqsul yoqhhaeq e zhiqyil mael'ae diqqye ongl laeq?" 20 Nol cholyaeq xitaeq o, nol aeqsul lilmaeq? Momil'ae dyel'eiq dyeqgaehoq peq laoq? Zongldu hhei biq e qiq hhaeq haelmillyekaol yoqhhaeq yaol zongldu e qiq hhaeq vae "nol aeqcheekaol ngaeq yaol xilnye zongldu hhei laq lilmaeq" lye gee biq laeq? 21 Milcaeq pe laqkiq laoq, milcaeq qiq de heil hheikaol telbyeq myel fu mul e buqyaeq zongldu hhei, milcaeq yol qiq de heil hheikaol haeqfu eiq mul e buqyaeq zongldu hhei e laqtaq za maeqngeel maeq? 22 Momil yoqhhaeq e faqhoqkei mael bi mol du'lal, yoqhhaeq e onglzaeq mael bi mol du'lal maoqlye kaollaoq, faqhoqkei mael shel maoq e zonglmye biq maoqlye e buqyaeqhael'ae zhee renqnail kaol neemaekuan biq maoq maeqngeel maeq? 23 Yoqhhaeq xilnye zongl mael laoq, yoqhhaeq e duqgongqgongqlye e rongqyaol mael, hhaoqsaeqsaeq mael hhamul e, haeqfu'ae'lye paeqgaelsael meeq deelhhei e rongqyaol hhamul e buqyaeqhael taq'ae bi mol du'lal maoqlye hhae. 24 Buqyaeq xihael laoq aedeeteel ngeelvae, aedeeteel laoq Momil lye gul du hhei laq e Yoqtail cholyaeq kaol baeqjyelboq minqcuq e cholyaeq ngeelvae. 25 Momil laoq Heqxi'a Su taq'ae gee laoqmyel:
"Ngaeq e cholyaeq maeqngeel e tyuhael vae,
ngael laoq 'ngaeq e cholyaeq'ae' lye gul biq maoq;
gaeq mael hhamul e cholyaeq maeqngeel e tyuhael vae,
ngael 'gaeq mael hhamul e cholyaeq' lye gul biq maoq.
26 Laefuq haeqvae lye yoqhhaeteel'ae
'noteel ngaeq e cholyaeq maeqngeel'ae' lye gee gol biq laol,
naeshoq aeqnao laoq tyuqvae lye yoqhhaeteel'ae
'haeqfu eiq dyeqdeel e Momil e yaqyo' lye gul biq maoqlye hhae."
27 Yiqsellyel cholyaeqhael'ae gee keelli laol, Yiqsailyal xilnye gul: "Yiqsellyel cholyaeqhael eeldeel deelmae e milqyel laoqmyel naeq feiq, deqjiul e cholyaeq laoq zholdeel siq e cholyaeqhael onglci e teel wae, 28 Hhaoqsongl yoqhhaeq e saeziq mael milcaeq taq'ae bi peqlal, kaol nae'naemyel shenqpanl e silqinq mael zonglbyel maoqlye wae." 29 Yiqsailyal gee gol laoqmyel:
"Junduilhael e Hhaoqsongl aedeeteel'ae
houldail teel bi zholdeelsaeq laeq kaolmaoqlaol,
aedeeteel laoq haeqfu'ae'lye Soqdomaq laoqmyel peqyil hhei,
kaol Eqmoqla laoqmyel wae."
Yiqsellyel cholyaeq kaol fuqyin
30 Xilnye laol, aedeeteel aeqchee gee siq laeq? Gongyil mael'ae maeq zui'qiuq e baeqjyelboq minqcuq e cholyaeq laoq gongyil mael hhamul hhei biq, gongyil xilmael laoq xinlxin gae'lye hhamul hhae. 31 Ngeelfeiq, Yiqsellyel cholyaeq laoq lilfaq e gongyil mael zui'qiuq hhae, ngeelfeiq, lilfaq e gongyil mael'ae maeq zonglkeel ongl biq'ae. 32 Xilmael laoq aeqchee gae'lye hhaemaeq? Yoqhhaeteel gongyil mael'ae zui'qiuq mael laoq, xinlxin mael'ae kaolzaeq maeqngeel'ae, xinqweiq mael'ae kaolzaeq hhae, yoqhhaeteel yaeqmeel laoq aeqkeel'ae pyetoq e haqlo mael taq'ae jye'leeq da deelhhei hhae. 33 Momil e Suqhhaq taq'ae gee laoqmyel:
"Ngael Xi'an vae aeqkeel'ae
pyetoq e haqloq qiq siq baq deelhhei maoq,
cholyaeq yaol bi jye'leeq e haqlo loongl'ae;
Yesu'ae xiangxinl e cholyaeq laoq
aeqdilmyel maq saqdol kael'ae."