Senllinq onglci'ae ssuqhaoq caqzaq
8
Yaeqmeel, Jidu Yesu onglci vae zhol e cholyaeq tyuhael laoq, golsiq za'ae lye maeq hhae bi gee wae. 2 Aeqyil biq e senllinq e faqzeq lye Jidu Yesu onglci vae, noq yaol golsiq kaol sil e faqzeq onglci ae'lye pyeqduhoq hhei biq vae. 3 Lilfaq laoq ruqtiq mael ruanqroq biq gae'lye qiqgiq maeq zonglkeel ongl'ae, kaol Momil lye aeqyoyoq e yaqyo yaol moqheilheil du hheikaol, golsiq za e aeqhhaol e yanglziq bi peqlal vae, kaol Golsiq Zaelheel bi geiq, ruqtiq ae'lye gee'li'laol yoqhhaeq'ae golsiq za'ae lye gee biq mael laoq, 4 Lilfaq taq'ae zongl maoqhhae lye e gongyil e xinqweiq mael, aedeeteel ruqtiq mael'ae saeziq maeq naeqhael biq, senllinq mael'ae saeziq naelhaeq kaol zongl yil e cholyaeq xihael e aeqhhaol taq'ae bi peqlal maoqlye hhae. 5 Ruqtiq mael'ae saeziq naelhaeq biq e cholyaeq laoq, ruqtiq e silqinq mael'ae nyuqzaeq hhae; senllinq mael'ae saeziq naelhaeq e cholyaeq laoq, senllinq e silqinq mael'ae nyuqzaeq hhae. 6 Ruqtiq mael'ae nyuqzaeq e cholyaeq e jyeqjuq mael laoq sil mael ngeelvae, senllinq mael'ae nyuqzaeq cholyaeq e jyeqjuq mael laoq aeqyil kaol neesaelhhae mael ngeelvae. 7 Ruqtiq mael'ae nyuqzaeq cholyaeq laoq Momil nyegael diqrenq geiq ngeelvae, Momil e lilfaq mael'ae saeziq maeq naelhaeq'ae, qiqshiq laoq, saeziq naelhaeq maoqlye maeq ongl'ae. 8 Ruqtiq hhae lye e cholyaeq laoq Momil'ae bi hhaol li maoqlye maeq ongl'ae.9 Momil e yohael mael noteel onglci vae zhol kaollaoq, noteel laoq ruqtiq hhae lye maeqngeel wae, senllinq hhae lye wae. Cholyaeq'ae Jidu e yohael mael maqza kaollaoq, Jidu hhae lye maeqngeel wae. 10 Jidu noteel onglci vae zhol kaollaoq, noteel e aeqhhaol mael golsiq gae'lye sil vae, ngeelfeiq, noteel e yohael mael laoq gongyil gae'lye hha dyeq'ae. 11 Yesu yaol cholsil onglci ae'lye bi dyeqhoqlal e Momil e yohael mael noteel onglci vae zhol kaollaoq, Jidu yaol cholsil onglci ae'lye bi dyeqhoqlal e tyutaeq, noteel onglci'ae zhol e senllinq ae'lye noteel e hhae sil e aeqhhaol mael yol bi dyeq tul hoqlaeq laeq'ae.
12 Aqsseq aeqnilhael, xilnye fu hhei'laol, aedeeteel laoq ruqtiq e jyelzu ca maeqngeel'ae, kaol ruqtiq mael'ae saeziq naelhaeq biq kaol zonglzhol eiq maeqngeel'ae. 13 Noteel ruqtiq mael'ae saeziq naelhaeq biq kaol dyeqdeel kaollaoq, aeqdilmyel hhae sil hhae; senllinq mael'ae kaolzaeq laol aeqhhaol e duqlaq e xinqweiq mael zonglsil hhei kaollaoq, aeqdilmyel hha dyeqdeel'ae. 14 Momil e yohael lye bi sheeqmyeq e cholyaeqhael laoq, gilzuqmyel Momil e Yaqyo'ae. 15 Noteel'ae hhamul hhei biq mael laoq hhaeq'ongq ongqzaeq e cholyaeq e yohael maeqngeel'ae, tyulnye ngeel kaollaoq gu biq wae siq; noteel'ae hhamul hhei biq mael laoq yaqyo hha geiq e yohael'ae, tyulkaol aedeeteel laoq Momil'ae "Abal, aeqdae" lye hhae gul biq wae. 16 Senllinq aeqyoyoq laoq, aedeeteel e yohael nyegael qiqgael aedeeteel laoq Momil e yaeqmiq yaqyo'ae lye zoqzenl hhae. 17 Aedeeteel yoqhhaeq e yaeqmiq yaqyo kaollaoq, zaeqdye halngeiq hhamul gayil e cholyaeq ngeelvae, Momil e zaeqdye halngeiq hhamul gayil e cholyaeq'ae, Jidu nyegael zaeqdye halngeiq hhamul gayil e cholyaeq qiqgael geiq. Aedeeteel yoqhhaeq nyegael saeqlael saeqchoqbo mael laoq, aedeeteel yoqhhaeq nyegael rongqyaol qiqgael hhamul maoqlye hhae.
Naeshoq aeqnao e rongqyaol
18 Ngael nyuq laoq, yaeqmeel e shelkuq mael, kaol aeqgael aedeeteel'ae bi mol hhei laeq maoqlye e rongqyaol mael nyegael biq fufu kaollaoq, qiqgiq maeq suanl hhaeq'ae. 19 Momil lye zongldu hhei biq hael laoq, Momil e yaqyohael mol du'lal biq lye laqheiqqyel lye doq deelhhei hhae. 20-21 Momil lye zongldu hhei biq hael laoq, qiqgiq yilsi maqza myel silqinq holhhaq vae maeq fuqcongq maeq hhaeq mael laoq, aeqyoyoq xilnye peqyil goq kaol maeqngeel'ae, yoqhhaeq yaol bi fuqcongq e tyutaeq lye zonglpeq biq hhae. Ngeelfeiq, Momil lye zongldu hhei biq hael laoq, ba yil e laqtaq holhhaq ae'lye bi pyeqduhoq hhei, kaol Momil e yaeqmiq yaqyo e rongqyaol e zilyoq mael mul maoqlye panlwangl deelzaeq hhei wae siq. 22 Aedeeteel laoq yaeqmeel keellye, Momil lye zongldu hhei biq hael hhaellaelmyel saeq yae lye gyuq kaol hhaellaelmyel nael biq mael zityeq hhae lye loq'ae. 23 Zongldu hhei biq hael dyul maeqcil, aedeeteel'ae Momil lye biq hhei laq e zhoq hhoqlal e aelsiq senllinq hhamul e cholyaeq xihael eiq aeqyoyoq e neemae onglci'ae saeq yae lye gyuq hhae, kaol yaqyo hha geiq laol aedeeteel e aeqhhaol mael bi zilyoq laeq lye doqdeelzaeq hhei hhae. 24 Aedeeteel laoq panlwangl onglci'ae lye hha deqjiul hhae; ngeelfeiq, mol congl mael'ae panlwanglzaeq mael laoq panlwangl maeqngeel'ae. Aeqsul yoqhhaeq mol congl mael'ae panlwanglzaeq siq laeq? 25 Ngeelfeiq, aedeeteel maeq mol congl mael'ae panlwangl laol, aedeeteel laoq neemaegil lye doqdeelzaeq hhei maoqhhae.
26 Qiqsheel ngeelvae, aedeeteel e ruanqroq mael'ae laoq senllinq mael baelzongl laeq'ae. Aedeeteel laoq heeldoq haelmillye gee maoq hhae lye maeq loq'ae, ngeelfeiq, senllinq aeqyoyoq laoq maeq gee du'lal kiq e saeq'olheeq maellye bael geezaeq laeq hhae. 27 Cholyaeq e neemae mael haelmillye nyuq hhaemaeq lye haelmeeqlye chifu e tyutaeq laoq, senllinq mael nyuqzaeq mael loq'ae, senllinq mael laoq Momil e zhiqyil laoqmyel senltuqhael'ae bael geezaeq biq kaol'ae. 28 Aedeeteel loq'ae, Momil laoq halza e silqinqhael qiqmal qiqmal'ae zoqyongl bi qiq hhae, Momil'ae gaeq biq e yoqhhaeq e zhiqyil laoqmyel gul laeq e cholyaeqhael'ae bi meeqyo'li maoqlye hhae. 29 Yoqhhaeq laefuqmyel loq e cholyaeqhael vae, yoqhhaeq e yaqyo haelzongl laoqmyel bi bael zongl maoqlye laefuqmyel gee deelhhei, kaol yoqhhaeq e yaqyo yaol haelnaeqmyel e aqsseq aeqnilhael onglci'ae fuqbo yaqyo bi geiq. 30 Yoqhhaeq laefuqmyel gee deelhhei e cholyaeq, yoqhhaeq yoqhhaeteel yaol eiq gul laeq biq; hael gul laeq e cholyaeqhael vae, yoqhhaeq yoqhhaeteel'ae gongyil e cholyaeq'ae lye eiq gul biq hhae; gongyil e cholyaeq'ae lye gul biq e cholyaeqhael vae, yoqhhaeq yoqhhaeteel'ae rongqyaol eiq biq biq vae.
Momil e gaeq mael qiqgiq maellye eiq maq geqtael ongl'ae
31 Xilnye laol, aedeeteel silqinq xihael'ae aeqchee lye gee siq laeq? Momil aedeeteel'ae baelzongl laeq laol, aeqsul aedeeteel'ae diqqye ongl laeq? 32 Momil aeqyoyoq e Yaqyo yaol maq sheqhhaq yae lye maeq zongl, kaol aedeeteel haelzhol cholyaeqhael gae'lye yoqhhaeq yaol bi sil hhei vae laol, halza haelzholhael kaol yoqhhaeq yaol aedeeteel vae eiq alngeiqmyel qiqgael biq hhei laq maeqngeel maeq? 33 Aeqsul Momil lye saelpodu hhei e cholyaeq vae konglgaol ongl laeq? Momil yoqhhaeteel vae gongyil e cholyaeq'ae lye gul biq vae. 34 Aeqsul yoqhhaeteel'ae golsiq za'ae lye gee kiq laeq? Jidu Yesu sil vae, kaol dyeqhoqlal vae, yaeqmeel laoq Momil e laqsseqboq vae, aedeeteel'ae bael geezaeq laeq hhae. 35 Aeqsul aedeeteel kaol Jidu e gaeq mael'ae geqtael ongl laeq? Saeqlael mael maeqhael ngeel? Saeq mael maeqhael ngeel? Guaeq'ei bi diqqye mael maeqhael ngeel? Oqma myeq mael maeqhael ngeel? Nyelguqlye mael maeqhael ngeel? Weiqxianq mael maeqhael ngeel? Maejyel lye bi xyeq mael maeqhael ngeel? 36 Momil e Suqhhaq taq'ae xilnye gee:
"Ngaeteel noq gae'lye naochomyel bi xyeq;
cholyaeq ae'lye fu li laol,
aedeeteel laoq xyeq maoqlye e aeqyol laoqmyel hhae."
37 Ngeelfeiq, aedeeteel'ae gaeq laeq e Hhaoqsongl'ae kaolzaeq laol, silqinq xihael taq'ae aedeeteel laoq yinqzaeq byel ongl'ae. 38 Ngael zhee xiangxinl lil, sil haoq, dyeq haoq, mqmae yosongl haoq, laqtaq za hael haoq, onglzaeq hael haoq, yaeqmeel e silqinq haoq, naeshoq aeqnao e silqinq haoq, 39 Haeq gao myel vae hael haoq, al'oq oqli vae hael haoq, baeqjyelboq e zongldu hhei biq hael haoq, gilzuqmyel aedeeteel yaol Momil e gaeq mael nyegael maq geqtael ongl'ae, Momil e gaeq mael laoq aedeeteel e Hhaoqsongl Jidu Yesu onglci vae za hhae.