Lilfaq e guanqtyeq mael
7
Aqsseq aeqnilhael, ngael noteel lilfaq loq e cholyaeqhael'ae gee laeqngeel, noteel laoq lilfaq mael cholyaeq'ae guanqtyeq ongl fu laoq, cholyaeq dyeqdeel siq fu'ae lye maeq loq gil laeq hhaemaeq? 2 Xilnye laoqmyel, haeqmiyaeq mulzaeq hhei'laol, haqyo dyeqdeel siq fu, yoqhhaeq laoq aeqdilmyel haqyo nyegael qiqgael zhol maoqhhae; haqyo sil hhei kaollaoq, yoqhhaeq laoq niqhhaq ssuqhaoq caqzaq lilfaq ae'lye dongbeiq duyi vae. 3 Tyulkaol, haqyo dyeqdeel siq fu, yoqhhaeq baeqjyelboq e haqyoyaeq'ae cho'lyeqzaeq yil laol, ochoq nyegael neemaeba e cholhae aeqmae lye gul biq hhae; haqyo sil vae kaollaoq, yoqhhaeq laoq lilfaq lye guanqtyeq biq onglci ae'lye dongbeiq duyi aeqwae, baeqjyelboq e haqyoyaeq'ae cho'lyeqzaeq yil feiq, ochoq nyegael neemaeba e cholhae aeqmae maeqngeel wae.4 Ngaeq e aqsseq aeqnilhael, xilnye gee'li'laol, noteel Jidu e aeqhhaol ae'lye lilfaq mael'ae sil biq aeqwae, yaeqmeel noteel yaol cholsil onglci ae'lye dyeqhoqlal e tyutaeq e cholyaeq bi geiq mael laoq, aedeeteel yaol Momil'ae aelsiq bi siq du hhei maoqlye hhae. 5 Aedeeteel ruqtiq hhae lye fu, lilfaq gae'lye lael e golsiq zonglpizaeq e zhee mulgoq mael, aedeeteel e zhitiq onglci vae byuq, kaol jyeqjuq mael laoq sil mael ngeelvae. 6 Ngeelfeiq yaeqmeel laoq, aedeeteel laoq aedeeteel'ae kaltoq laq e lilfaq taq'ae sil hhei'laol, lilfaq onglci ae'lye dongbeiq duyi wae, kaol aedeeteel Hhaoqsongl'ae fuqsil mael, senllinq e loqho yosheq maellye hhae, lilfaq taq'ae cu deelhhei e zil e loqhoq yogeil maellye maeqngeel'ae.
Lilfaq kaol golsiq e guanxil
7 Xilnye laol, aedeeteel aeqchee gee siq laeq? Lilfaq mael laoq golsiq maeq? Aeqdilmyel maeqngeel'ae! Ngeelfeiq, lilfaq ae'lye maeqngeel kaollaoq, ngael laoq aeqchee mael golsiq'ae lye maeq loq yae; lilfaq mael taq'ae "neemae maeq cuqm hhaeq'ae" lye gee kaolmaoqlaol, ngael laoq aeqchee mael neemaecuqm'ae lye maeq loq yae. 8 Ngeelfeiq, golsiq mael jihuil za fu, gailminl ae'lye, maeq qiqsheel e neemaecuqm mael ngaeq e onglci vae byuq hhae, lilfaq maqza laol, golsiq mael laoq sil aeqmyel kaol'ae, 9 Yilkaefu lilfaq maqza fu, ngael laoq yodyeqdyeq lil; ngeelfeiq, gailminl mael keellael laol, golsiq mael yodyeqdyeq lal vae, 10 Kaol ngael laoq sil aeqwae. Cholyaeq yaol yodyeq bi dyeq maoqlye e gailminl mael, daoldaolmyel, ngaeq yaol bi sil laeq'ae. 11 Golsiq mael jihuil za fu, gailminl ae'lye ngaeq'ae cheeqmu lael laeq hhae, kaol gailminl ae'lye ngaeq yaol bi xyeq laq vae kaol'ae. 12 Xilnye fu hhei'laol, lilfaq mael laoq senljyeq hhae, gailminl mael eiq senljyeq hhae, gongyil hhae kaol meeq hhae. 13 Aelmaol, meeq e tyulmael laoq ngaeq yaol bi sil maoqlye hhaemaeq? Aeqdilmyel maeqngeel'ae! Ngaeq yaol bi sil laeq mael laoq golsiq'ae. Golsiq mael meeq e tyulmael ae'lye ngaeq yaol bi sil laeq mael laoq, xilmael aeqdilmyel golsiq'ae lye bi mol du'lal maoqlye hhae, kaol golsiq mael gailminl ae'lye guaeq'ei duqlaq hhae lye hhael bi mol du'lal vae.
Yohael kaol aeqhhaol tyelgae
14 Aedeeteel laoq lilfaq mael laoq yohael hhae lye loq'ae, ngeelfeiq, ngael laoq ruqtiq hhae lye lil, golsiq mael'ae ongq biq aeqwae. 15 Ngael haelzonglhael laoq, ngael aeqyoyoq maeq loq laeq hhae. Ngael zongl nae mael laoq, ngael maeq zongl; daoldaolmyel, ngael laoq ngael hol e silqinq mael zongl yil. 16 Ngael maeq zongl nae e silqinq mael zongl yil kaollaoq, ngael laoq lilfaq mael meeq hhae lye cenqrenl wae. 17 Qiqshiq laoq, xilmael ngael zongl maeqngeel yil, ngaeq e onglci'ae zhol e golsiq mael zongl hhae. 18 Ngael laoq ngaeq e ruqtiq onglci'ae meeq e maqza'ae lye loq lil. Ngael meeq e silqinq zongl maoqlye nyuqmeeq feiq, meeq e silqinq maeq zongl du hhei ongl yae. 19 Ngael zongl nae e meeq mael, ngael laoq maeq zongl yil; ngael maeq zongl nae e duqlaq mael laoq, ngael daoldaolmyel zongl yil aeqwae. 20 Ngael laoq ngael maeq zongl yil nae mael zongl yil kaollaoq, ngael zongl maeqngeel yil, ngaeq e onglci'ae zhol e golsiq mael zongl hhae. 21 Kaol ngael xilnye faqzeq qiq mal loq aeqwae, ngael meeq e zongl maoqlye fu, duqlaq mael ngaeq'ae siqtyeq deelhhei laeq'ae. 22 Ngaeq e onglci'ae zhol e cholyaeq'ae lye gee'li'laol, ngael laoq Momil e faqzeq mael'ae hhaol yae, 23 Ngeelfeiq, ngael laoq zhitiq onglci'ae baeqjyelboq e faqzeq qiq mal za'ae, kaol ngaeq e neemae onglci e faqzeq mael nyegael tyelgae hhae lye fudu hhei aeqwae, kaol ngaeq yaol eezaeq yil laeq, ngaeq yaol zhitiq onglci e golsiq e faqzeq mael'ae saeziq bi naelhaeq yil laeq hhae. 24 Ngaeq'ae kyuq kaol maeq hhaeq yaevae! Aeqsul ngaeq'ae jiul ongl, kaol hhae sil e aeqhhaol xilmael ae'lye eetael duyi ongl kaollaeq? 25 Ngael Momil'ae meeqyaevae lye gee biq lil, ngael aedeeteel e Hhaoqsongl Yesu Jidu'ae kaolzaeq laol faqzeq xilmael'ae dongbeiqzaeq ongl wae! Xilnye fu hhei'laol, ngaeq e neemae mael laoq Momil e faqzeq mael'ae saeziq naelhaeq nae lil, ngeelfeiq, ruqtiq mael laoq golsiq e faqzeq mael'ae saeziq naelhaeq hhae.