Jidu onglci'ae dyeq
6
Xilnye laol, aedeeteel aeqchee gee siq laeq? Aedeeteel golsiq onglci'ae zhol siq kaol endianq mael hhael bi naeq lael laeq? 2 Aeqdilmyel maeq hhaeq'ae! Golsiq ae'lye gee'li'laol, aedeeteel laoq sil laoqmyel wae, haelmillyekaol golsiq onglci'ae dyeq siq laeq? 3 Noteel maeq loq gil laeq hhaemaeq, aedeeteel shelxiq hhei'laol Jidu Yesu onglci'ae do'li e cholyaeqhael laoq, shelxiq hhei'laol yoqhhaeq e sil onglci'ae do'li aeqwae. 4 Tyulkaol, aedeeteel ciq e gui'liq ae'lye sil onglci'ae do'li, kaol yoqhhaeq nyegael qiqgael bal baqduqm hhei mael laoq, Jidu laoq aeqdae e rongqyaol ae'lye cholsil onglci ae'lye dyeqhoqlal laoqmyel, aedeeteel'ae haelzongl e silqinq mael taq vae eiq paellael e aeqyil maellye ssuqhaoq caqzaq maoqhhae lye hhae. 5 Aedeeteel yoqhhaeq nyegael qiqgael bael sil gol kaollaoq, yoqhhaeq nyegael qiqgael dyeqhoqlal kiq'ae. 6 Aedeeteel loq'ae, aedeeteel e cholgeil laoq yoqhhaeq nyegael shiqziljal mael'ae qiqgael diqcheeq aeqwae, kaol golsiq za e aeqhhaol mael bi myeyil hhei vae, xilnye laol, aedeeteel laoq golsiq e hhaeq'ongq ongqzaeq e cholyaeq maq geiq kael vae, 7 Sil e cholyaeq yaol laoq golsiq onglci ae'lye bi pyeqduhoq hhei vae kaol'ae. 8 Aedeeteel Jidu nyegael qiqgael sil kaollaoq, aedeeteel laoq aeqdilmyel yoqhhaeq nyegael qiqgael hha dyeq'ae lye xiangxinl'ae, 9 Kaol Jidu cholsil onglci ae'lye dyeqhoqlal vae laol, zail eiq maeq sil wae, sil mael zail eiq yoqhhaeq e hhaoqsongl maq geiq wae lye loq kaol'ae. 10 Yoqhhaeq sil vae, golsiq mael'ae sil biq hhae, xilnye qiq pu wae; yoqhhaeq dyeq mael laoq, Momil'ae dyeq biq hhae. 11 Xilnye laol, noteel eiq golsiq'ae lye gee'li'laol aeqyoyoq laoq sil aeqwae lye kei maoqhhae, ngeelfeiq, Jidu Yesu onglci'ae Momil'ae dyeq biq maoqhhae.12 Tyulkaol, golsiq mael noteel hhae sil e aeqhhaol taq'ae laqtaq haeq bi za, kaol noteel yaol aeqhhaol e zhee mulgoq mael'ae saeziq haeq bi naelhaeq yil. 13 Noteel e zhitiq mael golsiq mael'ae haeq heilmoq biq, kaol maeq gongyil e gongjul haeq geiqzaq, daoldaolmyel, cholsil onglci'ae dyeq e cholyaeq laoqmyel ngeel maoqhhae, kaol aeqyoyoq yaol Momil'ae heilmoq hhei biq, kaol noteel e zhitiq mael Momil'ae heilmoq hhei biq, kaol gongyil e gongjul geiqzaq. 14 Golsiq mael aeqdilmyel noteel e hhaoqsongl maq hha geiq wae, noteel laoq lilfaq holhhaq vae maeq zhol'ae, endianq holhhaq vae zhol kaol'ae.
Gongyil e hhaeq'ongq ongqzaeq e cholyaeq
15 Tyul'nye laol haelmillye hhaemaeq? Aedeeteel laoq endianq holhhaq vae zhol hhae, lilfaq holhhaq vae zhol maeqngeel'ae lye laol, golsiq zonglpizaeq hhaeq maeq? Aeqdilmyel maeq hhaeq'ae! 16 Noteel laoq noteel hhaeq'ongq ongqzaeq e cholyaeq aeqsul e saeziq mael naelhaeq laol, aeqsul e hhaeq'ongq ongqzaeq e cholyaeq'ae lye maeq loq gil laeq hhaemaeq? Golsiq e hhaeq'ongq ongqzaeq e cholyaeq geiq kaol sil hhei; paelsilmyel saeziq naelhaeq e hhaeq'ongq ongqzaeq e cholyaeq geiq laol, gongyil e cholyaeq peqlal vae. 17 Ngeelfeiq, aedeeteel Momil'ae meeqyaevae lye gee biq maoqhhae! Noteel laefuq laoq golsiq e hhaeq'ongq ongqzaeq e cholyaeq geiq hhae lye feiq, yaeqmeel laoq neemae onglci ae'lye noteel'ae geegaeq hhei biq e geemyeq mael'ae naelhaeq vae. 18 Noteel yaol golsiq onglci ae'lye bi pyeqduhoq hhei vae laol, gongyil e hhaeq'ongq ongqzaeq e cholyaeq geiq vae. 19 Ngael noteel e ruqtiq e ruanqroq gae'lye, cholyaeq nyuq laoqmyel gee. Noteel laefuq laoq zhitiq mael maeqshol mael'ae, kaol lilfaq laoqmyel maeq zongl mael'ae haelmillye heilmoq hhei biq, kaol hhaeq'ongq ongqzaeq e cholyaeq geiq, kaol lilfaq laoqmyel maeq zongl'ae; yaeqmeel eiq tyulnye zhitiq mael gongyil mael'ae heilmoq hhei biq, kaol hhaeq'ongq ongqzaeq e cholyaeq geiq, kaol senljyeq wae lye peqlal vae. 20 Noteel golsiq e hhaeq'ongq ongqzaeq e cholyaeq geiq fu, gongyil mael noteel'ae maeq guanqtyeq biq kaol'ae. 21 Aelmaol, yaeqmeel noteel saqdol lal aeqmyel hhae lye kei e silqinq mael, tyuqfu aeqchee aelsiq siq du hhei gil aeqwae maeq? Silqinq tyuhael e jyeqjuq laoq sil mael ngeelvae. 22 Ngeelfeiq, yaeqmeel laoq, noteel yaol golsiq onglci ae'lye bi pyeqduhoq hhei, kaol Momil e hhaeq'ongq ongqzaeq e cholyaeq geiq vae, kaol aelsiq siq du hhei, kaol senljyeq wae lye peqlal, jyeqjuq tyulmael laoq haeqfu eiq zadeel e aeqyil mael ngeelvae. 23 Golsiq e hhaeqpyuq laoq sil mael ngeelvae; Momil e encil mael laoq, aedeeteel e Hhaoqsongl Jidu Yesu onglci'ae haeqfu eiq zadeel e aeqyil mael'ae.