Xinlxin za gae'lye gongyil e cholyaeq'ae lye bi gul e geeqlongq
5
Tyulkaol, aedeeteel xinlxin za gae'lye gongyil e cholyaeq'ae lye bi gul vae laol, aedeeteel e Hhaoqsongl Yesu Jidu ae'lye Momil nyegael hhae maoqhoqli wae. 2 Aedeeteel yoqhhaeq ae'lye, xiangxinl gae'lye yaeqmeel aedeeteel haoqtul deelhhei e endianq xilmael onglci vae hha do'li, kaol zhee hhaol gae'lael aeqmyel Momil e rongqyaol mael'ae panlwangl deelzaeq hhei. 3 Xilnye maeqcilmyel saeqlael onglci vae eiq zhee hhaol yae. Aedeeteel loq'ae, saeqlael onglci'ae renqnail du'lal kiq'ae, 4 Renqnail onglcil'ae zongl gaeyil ongl e aqha du'lal kiq'ae, zongl gaeyil ongl e aqha onglci'ae panlwangl du'lal kiq'ae, 5 Panlwangl za laol hhaqbye maq qye lalkiq'ae, Momil e gaeq mael, aedeeteel'ae biq hhei laq e senllinq ae'lye, aedeeteel e neemae onglci vae beiqxeiq do hhei laq vae. 6 Aedeeteel ruanqroq siq fu, Jidu laoq gee deelhhei e shiqshen'ae xinlyangq maeq meeq e cholyaeqhael gae'lye sil vae. 7 Gongyil e cholyaeq gae'lye sil e cholyaeq laoq saoq'ae; meeq e cholyaeq gae'lye sil e cholyaeq laoq, zongl peq e cholyaeq zhol maeqhe. 8 Ngeelfeiq, Jidu lye Momil e gaeq mael aedeeteel'ae xilnye bi mol hhei laeq vae: Aedeeteel golsiq za e cholyaeq geiq siq fu, yoqhhaeq aedeeteel gae'lye sil vae. 9 Yaeqmeel aedeeteel yoqhhaeq e siq mael'ae kaolzaeq kaol gongyil e cholyaeq'ae lye hhae bi gul laol, yoqhhaeq ae'lye hha deqjiul'ae, kaol Momil e faqhoqkei mael maeq shel kael wae. 10 Aedeeteel Momil e diqrenq ngeel siq fu, Momil e Yaqyo e sil ae'lye Momil nyegael hhae maoqhoqli, maoqhoqli vae laol, nyeq'ei yoqhhaeq e aeqyil ae'lye deqjiul maoqlye hhae. 11 Xilnye maeqcil, aedeeteel laoq aedeeteel e Hhaoqsongl Yesu Jidu ae'lye Momil nyegael hhae maoqhoqli, kaol yoqhhaeq ae'lye Momil onglci'ae hhae hhaol vae.Yaldang kaol Jidu
12 Tyulkaol, golsiq mael laoq cholyaeq qiq hhaeq ae'lye shilgail vae do'lal, kaol sil mael laoq golsiq ae'lye lael laoqmyel, haetaeq eiq golsiq zonglpizaeq hhei vae, kaol sil mael haelzhol cholyaeq vae yo'lael vae. 13 Lilfaq mael maqza laefuq ae'lye, golsiq mael laoq milcaeq taq vae za wae, ngeelfeiq, lilfaq maqza laol, golsiq mael eiq golsiq maeq suanl'ae. 14 Ngeelfeiq, Yaldang ae'lye mael Moqxi'ae keellye, sil mael laoq laqtaq za vae, Yaldang laoqmyel golsiq zonglpizaeq e silqinq maeq zongl gol hael dyel'eiq, sil e laqtaq holhhaq vae zhol hhae. Yaldang laoq aeqgael lael maoqlye e tyutaeq e molkol'ae.
15 Ngeelfeiq, zonglzhil mael encil mael'ae maeq jyeqli ongl'ae, cholyaeq qiq hhaeq e zonglzhil gae'lye, cholyaeqhael sil byel hhei kaollaoq, Momil e endianq mael kaol Yesu Jidu qiq hhaeq ae'lye lael e endianq onglci e shangqcil tyulmael laoq, ongljyeqmyel cholyaeqhael'ae bi yo'li maoqlye maeqngeel maeq? 16 Cholyaeq qiq hhaeq golsiq zonglpizaeq e jyeqgoq mael eiq shangqcil mael'ae maeq jyeqli ongl'ae, shenqpanl ae'lye gee'li'laol, cholyaeq qiq hhaeq golsiq zonglpizaeq hhei laol, haelzhol cholyaeq'ae golsiq za'ae lye gee biq vae; encil ae'lye gee'li'laol, cholyaeq zonglzhil mael zhee naeq feiq gongyil e cholyaeq'ae lye hhae bi gul wae. 17 Cholyaeq qiq hhaeq e zonglzhil mael gae'lye, sil mael cholyaeq xi qiq hhaeq gae'lye laqtaq za vae kaollaoq, Momil lye biq hhei biq e duqgongqgongqlye e endianq kaol gongyil e encil hhamul hhei biq cholyaeqhael laoq, Yesu Jidu qiq hhaeq haelzongl gae'lye aqha bo e aeqyil hhamul maoqlye maeqngeel maeq?
18 Xilnye fu hhei'laol, cholyaeq qiq hhaeq zonglzhil gae'lye, haelzhol cholyaeqhael'ae golsiq za'ae lye gee biq; qiqsheel ngeelvae, cholyaeq qiq hhaeq e gongyil e xinqweiq gae'lye, haelzhol e cholyaeqhael'ae gongyil e cholyaeq'ae lye hhae bi gul kaol aeqyil hhamul hhei biq vae. 19 Cholyaeq qiq hhaeq saeziq maeq naelhaeq gae'lye, cholyaeqhael golsiq za e cholyaeq peqyil hhei; qiqsheel ngeelvae, cholyaeq qiq hhaeq saeziq naelhaeq gae'lye, cholyaeqhael eiq gongyil e cholyaeq peqlal vae. 20 Momil cholyaeqhael'ae lilfaq biq gayi biq mael laoq, hhael naeq myel zonglba silqinq mael bi mol du'lal maoqlye hhae, ngeelfeiq, golsiq mael haeqvae nyeq'ei ta nyeq'ei hhael naeq laol, endianq mael eiq tyuqvae nyeq'ei ta nyeq'ei duqgongqgongqlye hhael naeq lael vae. 21 Tyulkaol, golsiq mael sil ae'lye laqtaq za laoqmyel, endianq mael eiq gongyil ae'lye laqtaq za vae, kaol cholyaeq'ae aedeeteel e Hhaoqsongl Yesu Jidu gae'lye haeqfu eiq zadeel e aeqyil mael bi mul vae.