Yalboqlahanl e zonglmyeq du hhei mael
4
Xilnye laol, ruqtiq'ae lye gee'li'laol aedeeteel e aeqpyuq aeqdae geiq e Yalboqlahanl e guqjin ae'lye aeqchee xoqdozaq hhei ongl maeq? 2 Yalboqlahanl'ae xinqweiq gae'lye gongyil e cholyaeq'ae lye gul biq kaollaoq, yoqhhaeq'ae laoq hodazaq mael za'ae, ngeelfeiq, Momil e yiqsiboq'ae laoq yoqhhaeq'ae hodazaq e qiqgiq eiq maqza'ae. 3 Momil e Suqhhaq taq'ae aeqchee lye gee hhaemaeq? "Yalboqlahanl Momil'ae xiangxinl laol, yoqhhaeq vae gongyil e cholyaeq'ae lye suanl biq hhae." 4 Mulhhael mul e cholyaeq laoq mulhhael hhaeqpyuq hhamul mael laoq endianq maeq suanl hhaeq'ae, aeqdilmyel hhamul hhae; 5 Ngeelfeiq, mulhhael maq mul e tyutaeq laoq, xinlyangq maeq meeq e cholyaeq vae gongyil e cholyaeq'ae lye gul biq e tyutaeq vae xiangxinl dyul wae, yoqhhaeq e xiangxinl mael laoq gongyil e cholyaeq'ae lye suanl biq hhae. 6 Dalweil gee gol, cholyaeq qiq hhaeq xinqweiq mael'ae kaolzaeq maeqngeel myel, Momil lye gongyil e cholyaeq'ae lye suanl biq hael laoq geeqlongq meeq hhae, yoqhhaeq gee:7 "Zonglzhil mael Momil lye shelmianq biq,
golsiq mael eiq zonglkaeq biq e cholyaeqhael laoq geeqlongq meeq wae!
8 Hhaoqsongl golsiq za'ae lye maeq suanl biq hael,
xilnye cholyaeqhael laoq geeqlongq meeq wae!"
9 Xilnye fu hhei'laol, geeqlongq xilmael laoq yeqgae gui'liq zongl gol e cholyaeq vae maoqlaol maq biq biq maeq? Yeqgae gui'liq maeq zongl gol e cholyaeq vae eiq biq biq maeqngeel maeq? Aedeeteel loq'ae, xinlxin gae'lye, Yalboqlahanl vae gongyil e cholyaeq'ae lye suanl biq hhae. 10 Aelmaol, xilmael laoq haelmillye suanl hhaemaeq? Yoqhhaeq yeqgae gui'liq zongl fu maeq? Paelsilmyel yoqhhaeq yeqgae gui'liq maeq zongl fu maeq? Yeqgae gui'liq zongl fu maeqngeel'ae, yeqgae gui'liq maeq zongl siq fu'ae. 11 Yoqhhaeq'ae zongl gol biq e yeqgae gui'liq e jilhaol mael laoq, yoqhhaeq yeqgae gui'liq maeq zongl gol fu, xinlxin za gae'lye gongyil e cholyaeq'ae lye gul biq e zenlminq'ae, xilnye laol, Yalboqlahanl laoq haelzhol e yeqgae gui'liq maeq zongl gol feiq, Momil'ae xiangxinl e cholyaeqhael e aeqdae geiq vae, kaol yoqhhaeteel vae eiq xinlxin gae'lye gongyil e cholyaeq'ae lye bi gul vae; 12 Yalboqlahanl eiq yeqgae gui'liq zongl gol e cholyaeqhael e aeqdae'ae, cholyaeq xihael laoq, yeqgae gui'liq zongl gol dyul maeqcilmyel, aedeeteel e aeqpyuq aeqdae Yalboqlahanl yeqgae gui'liq zongl e laefuq'ae za e xinlxin e paeqhhael mael'ae cho'lyeq e cholyaeqhael ngeelvae.
Biq laqngeel lye gee mael xinlxin gae'lye peqlal vae
13 Momil laoq shilgail mael Yalboqlahanl kaol yoqhhaeq e houldailhael'ae bi mul gayil e biq laqngeel lye gee mael laoq, lilfaq gae'lye maeqngeel'ae, xinlxin ae'lye lael e gongyil gae'lye hhae. 14 Lilfaq hhae lye e cholyaeq maoqlaol, zaeqdye halngeiq mael hhamul gayil e cholyaeq maeqngeel'ae lye kaollaoq, xinlxin mael laoq alngeiqmyel peqyil hhei wae, biq laqngeel lye gee mael eiq qiqgiq zoqyongl maeq qiq wae. 15 Lilfaq mael laoq Momil yaol faqhoq bi kei tullaeq kiq hhae, haeqvae lilfaq maqza laol, haeqvae laoq zonglzhil mael maqza wae.
16-17 Tyulkaol, zaeqdye halngeiq hhamul gayil e biq laqngeel lye gee mael laoq, endianq hhae lye kaol xinlxin ae'lye lael hhae, xilmael laoq, Yalboqlahanl e holdailhael onglci'ae lilfaq hhae lye e cholyaeq'ae dyul maeqcil, Yalboqlahanl laoqmyel xinlxin za e cholyaeqhael vae eiq aeqdilmyel biq biq maoqlye gee gol aeqwae. Yalboqlahanl Momil e yiqsi'ae laoq aedeeteel haelzhol e cholyaeq e aeqdae geiq hhae, Momil e Suqhhaq taq'ae cu deelhhei laoqmyel: "Ngaeq lye noq yaol haeldyul dyulmae goqjahael e aeqpyuq aeqdae bi geiq aeqwae." Yoqhhaeq xiangxinl e qiq hhaeq laoq, cholsil yaol bi dyeqhoqlal, maqza mael bi za lalkiq e Momil'ae. 18 Yoqhhaeq'ae panlwangl maqza biq fu, panlwangl za lye xiangxinl lael laol, haeldyul dyulmae goqjahael e aeqpyuq aeqdae hha geiq hhei biq, laefuq gee gol laoqmyel: "Noq e houldailhael laoq xilnye ngeel maoqlye hhae." 19 Yoqhhaeq qiqhael hoq zoq lal maoq fu, yoqhhaeq laoq aeqyoyoq e aeqhhaol mael sil e laoqmyel wae, Saqla eiq yaeqguq maeq bo kiq vae lye nyuq keelli biq feiq, yoqhhaeq e xinlxin mael eiq maeq ruanqroq'ae, 20 Kaol Momil e biq laqngeel lye gee mael'ae chifu deelzaeq hhei wae siq, maeq xiangxinl gae'lye huaiqyiq yae lye maeq zongl dyul maeqcil, daoldaolmyel xinlxin gae'lye aqha hhael bo, kaol rongqyaol mael Momil'ae biq biq, 21 Kaol neemae qiqsiqmyel Momil biq laqngeel lye gee mael aeqdilmyel peqlal kiq'ae lye xiangxinl hhae. 22 Tyulkaol, xilmael laoq yoqhhaeq'ae gongyil e cholyaeq'ae lye suanl biq hhae. 23 "Yoqhhaeq'ae gongyil e cholyaeq'ae lye suanl biq" e xi qiq doq laoq, yoqhhaeq'ae oqlye cu deelhhei biq maeqngeel'ae, 24 Naeshoq aeqnao'ae aedeeteel gongyil e cholyaeq'ae lye suanl laeq hael vae eiq bal cu deelhhei laeq hhae, aedeeteel laoq, Momil lye aedeeteel e Hhaoqsongl Yesu yaol cholsil onglci ae'lye bi dyeqhoqlal vae lye xiangxinl e cholyaeqhael ngeelvae. 25 Yesu yaol yotyel maqdumyel ongqzaeq biq mael laoq, aedeeteel e zonglzhil mael gae'lye hhae; yoqhhaeq dyeqhoqlal mael laoq, aedeeteel'ae gongyil e cholyaeq'ae lye bi gul maoqlye hhae.