3
Xilnye gee'li'laol, Yoqtail cholyaeq ochoq taq'ae jyeqli aeqmyel aeqchee za kaollaeq? Yeqgae gui'liq mael aeqchee meeqyo'lael kiq kaollaeq? 2 Aeqchee taq'ae lye gee'li kaol'eiq Yoqtail cholyaeq laoq ochoq taq'ae jyeqli aeqmyel zhee za'ae. Dilyiq laoq, Momil lye aeqyoyoq e saeziq mael yoqhhaeteel'ae toqshiq hhei biq vae. 3 Maeq xiangxinl e cholyaeq zhol feiq, aeqchee beeq maeq? Yoqhhaeteel Momil'ae maeq xiangxinl laol Momil laoq maeq kaolzaeq lael wae maeq? 4 Aeqdilmyel tyulnye maeq hhae gee'ae! Xilnye gee kael'ae, Momil laoq zaqgiq maqgiq feiq, haelzhol cholyaeq laoq zaqgiqgiq hhae. Momil e Suqhhaq taq'ae gee laoqmyel:"Nol gaezaeq fu laoq gongyil gae'lael aeqmyel hhae;
noq'ae zhiqmoqkae gil biq fu nol yinqzaeq hhei ongl'ae."
5 Ngael cholyaeq e yilsi laoqmyel gee laol, aedeeteel maeq gongyil e silqinq zongl mael laoq, Momil e gongyil mael bi mol du'lal maoqlye kaollaoq, aedeeteel aeqchee gee siq laeq? Momil cholyaeqhael'ae faqhoqkei mael laoq yoqhhaeq maeq gongyil kaol maeq? 6 Aeqdilmyel maeqngeel'ae! Xilnye ngeel kaollaoq, Momil laoq haelmillyekaol shilgail mael'ae shenqpanl ongl laeq? 7 Momil e zaqgiq maqgiq mael, ngaeq e zaqgiqgiq mael gae'lye yoqhhaeq e rongqyaol mael hhael bi mol du'lal kaollaoq, aeqcheekaol ngael laoq golsiq za e cholyaeq laoqmyel bi shenqpanl siq laeq? 8 Aedeeteel laoq aeqcheekaol duqlaq myel zongl hhaeq'ae, kaol meeq mael bi peqlal lye maeq gee laeq? Ochoq aedeeteel'ae geekyuq laeq, aedeeteel saeziq xihael gee gol vae lye gee laeq; xilnye cholyaeq vae laoq golsiq za'ae lye gee biq mael laoq hoq hhae.
Gongyil e cholyaeq maeq zhol'ae
9 Aelmaol, haelmillye maeq? Aedeeteel yoqhhaeteel taq'ae aeqchee jyeqli aeqmyel za kaollaeq? Aeqdilmyel maqza'ae! Aedeeteel geedu hhei gol: Yoqtail cholyaeq kaol Xi'lal cholyaeq gilzuqmyel golsiq holhhaq vae zhol hhae. 10 Momil e Suqhhaq taq'ae gee laoqmyel:
"Gongyil e cholyaeq maeq zhol'ae,
qiq hhaeq dyel'eiq maeq zhol'ae.
11 Loq e cholyaeq qiq hhaeq eiq maeq zhol'ae,
Momil'ae saelpo e cholyaeq qiq hhaeq eiq maeq zhol'ae.
12 Haetaeq eiq Momil e gaelmae ae'lye deelsae hhei,
kaol hhaellaelmyel myeyil myel vae deel yil.
Meeq e zongl e cholyaeq maeq zhol'ae,
qiq hhaeq dyel'eiq maeq zhol'ae.
13 Yoqhhaeteel e kongqmae mael
diqpong deelhhei e fuq'ongl'ae;
yoqhhaeteel e myeqhael mael zaqgiqgiq hhae.
Yoqhhaeteel e myeqho mael duq zoq e oqhol e duq laoqmyel hhae,
14 Myeqzu qiq bongq myel doqchiq kaol duqlaq mael zoq hhae.
15 Yoqhhaeteel e aeqkeel mael
cholyaeq xyeq maoqlyekaol beel laoqmyel ki;
16 Yoqhhaeteel deel gol e gaelmae vae
zonglba mael kaol zai'nanl zongl deelsaeq'ae.
17 Yoqhhaeteel hoqpinq e gaelmae mael maeq siqcongl biq'ae;
18 Yoqhhaeteel e ma'ne onglci'ae Momil'ae zun eiq zunjinl gu eiq gu mael maq zoq'ae."
19 Aedeeteel laoq lilfaq taq'ae hael gee e saeziq mael laoq, lilfaq holhhaq vae zhol e cholyaeqhael vae gee biq hhae lye loq'ae, xilnye zongl mael laoq, haelzhol cholyaeq e myeqbongq mael deiqchiq biq, kaol milcaeq taq e cholyaeqhael yaol Momil e shenqpanl holhhaq vae bi zhol. 20 Tyulkaol, ruqtiq za e cholyaeqhael laoq lilfaq e xinqweiq gae'lye Momil e yiqsi'ae gongyil e cholyaeq'ae lye maeq hhae bi gul'ae, lilfaq mael laoq cholyaeq vae golsiq za'ae lye bi siqcongl maoqlye kaol'ae.
Xinlxin za gae'lye gongyil e cholyaeq'ae lye hhae bi gul'ae
21 Ngeelfeiq, yaeqmeel laoq, Momil e gongyil mael lilfaq nildu vae bi mol du'lal vae, lilfaq kaol xianzhihael xilmael'ae zenlminq du hhei vae: 22 Momil e gongyil mael, Yesu'ae xinlzaeq gae'lye hael xiangxinl e cholyaeqhael'ae heilcheeq da hhei biq. Xilmael laoq maeq qiqsheel myel maeqngeel'ae, 23 Haelzhol cholyaeqhael gilzuqmyel golsiq zonglpizaeq vae, kaol Momil e rongqyaol mael'ae maeq zongl keelli ongl'ae, 24 Ngeelfeiq, yaeqmeel laoq Momil e endianq mael hhamul hhei biq vae, Jidu Yesu onglci vae lye jiulsuq laeq ae'lye, alngeiqmyel gongyil e cholyaeq'ae lye hhae bi gul'ae. 25 Momil laoq cholyaeqhael yaol Yesu e siq kaol Yesu'ae xinlzaeq gae'lye yoqhhaeteel e golsiq mael shelmianq biq mael laoq, Momil e gongyil mael bi mol du'lal maoqlye hhae; yoqhhaeq renqnail e neemae maellye, golsiq zonglpizaeq gol e cholyaeq'ae neemaekuan biq mael laoq, 26 Yaeqmeel yoqhhaeq e gongyil mael bi mol du'lal, kaol cholyaeqhael vae Momil aeqyoyoq laoq gongyil hhae, kaol Yesu'ae xinlzaeq e cholyaeqhael vae eiq gongyil e cholyaeq'ae lye gul biq hhae lye bi loq maoqlye kaol'ae.
27 Xilnye laol, haeqvae hodazaq mael za laeq? Hodazaq e maqza'ae. Aeqchee loqho ae'lye hhaemaeq? Xinqweiq maellye hhaemaeq? Maeqngeel'ae! Yesu'ae xiangxinl e loqho ae'lye hhae. 28 Tyulkaol, ngaeteel aeqdilmyel xilnye hhae lye gee lil, cholyaeq vae gongyil e cholyaeq'ae lye gul biq mael laoq Yesu'ae xiangxinl gae'lye hhae, lilfaq mael zongl yil gae'lye maeqngeel'ae. 29 Momil laoq Yoqtail cholyaeq e Momil oqlye maeqhael ngeel? Baeqjyelboq minqcuq e cholyaeq e Momil eiq ngeel, maeqngeel maeq? Ngeel'ae, yoqhhaeq eiq baeqjyelboq minqcuq e Momil'ae. 30 Momil laoq qiq hhaeq wae lye laol, yoqhhaeq laoq yeqgae gui'liq zongl gol e cholyaeq vae Yesu'ae xiangxinl gae'lye gongyil e cholyaeq'ae lye gul biq maoqlye hhae, yeqgae gui'liq maeq zongl gol e cholyaeq vae eiq Yesu'ae xiangxinl gae'lye gongyil e cholyaeq'ae lye gul biq maoqlye hhae. 31 Xilnye laol, aedeeteel laoq Yesu'ae xiangxinl gae'lye lilfaq mael maq mul wae maeq? Maeqngeel'ae! Daoldaolmyel, aeqdilmyel lilfaq laoqmyel zongl yil aeqwae.