Baeqjyelboq e zhipailhael'ae byel hhei biq e milcaeq
18
Yiqsellyel huilzhongl cholyaeqhael laoq Shilloq vae zhol'eeq deelhhei gil hhae, kaol Momil'ae molli e haeqpael haelcul mael tyuqvae zongltul hhei. Tyuqvae milcaeq mael yoqhhaeteel lye zholchiqzaeq aeqwae. 2 Yiqsellyel cholyaeqhael onglci'ae siq gol zhipail'ae yoqhhaeteel hhamul e zaeqdye halngeiq mael maeq byel hhei biq wae siq. 3 Yoshuyal Yiqsellyel cholyaeqhael'ae gee biq: "Noteel e aeqpyuq aeqdaehael e Momil Yeheqhuaq noteel'ae biq biq e milcaeq mael, noteel maeq zhol yil myel doq deelhhei mael, haeqfu'ae keel maoqlye laeq? 4 Noteel hae yiq gol zhipail eiq suq nulhhaeq saelpodu hhei maoqhhae, xilnye laol, ngael yoqhhaeteel yaol moqheilheil du hhei, kaol yoqhhaeteel tullael kaol tyuqvae milcaeq mael deeldyu byel maoqhhae, kaol hae yiq gol zhipail eiq hhamul maoq laoqmyel zaeqdye halngeiq mael cu loq da hhei, kaol ngaeq e saeqvae hoqlal. 5 Yoqhhaeteel milcaeq mael siq pa byel pa hhei maoqhhae. Yoqdal laoq nanqfang vae zhol, kaol yoqhhaeq hhae lye e milcaeq'ae zhol hhae. Yoqsel toq laoq beqfang vae zhol, kaol yoqhhaeteel hhae lye e milcaeq'ae zhol hhae. 6 Noteel milcaeq mael siq pa byel pa hhei'laol, cuga hhei hael ngaeq e saeqvae heil laeq. Ngael aedeeteel e Momil Yeheqhuaq e yiqsi ae'lye noteel gae'lye suqhhaq bal o laqngeel. 7 Lilveil cholyaeq laoq noteel onglci'ae lye zaeqdye halngeiq maeq bael byelzaeq hhei'ae, Yeheqhuaq e jilsi e mulhhael mael laoq yoqhhaeteel e zaeqdye halngeiq kaol'ae. Jadeq zhipail, Liuqbenq zhipail kaol Maqnaqxi zhipail e qiq pa cholyaeq laoq, Yoqdanl Lolbaeq e neeldu aelheiq vae zaeqdye halngeiq hhamul hhei biq vae, Yeheqhuaq e yaqhacheqzaq e cholyaeq Moxi lye yoqhhaeteel'ae byel hhei biq hhae." 8 Milcaeq haeqvae lye mael haeqvae keel'ae lye suqhhaq taq'ae hual da yil e cholyaeq tyuhael zhoq deel maoqlye fu, Yoshuyal yoqhhaeteel'ae moqheilheil biq: "Noteel milcaeq tyulmael deeldyu byel yil, kaol milcaeq haeqvae lye mael haeqvae keel'ae lye hual du hhei'laol, ngaeq'ae saeqvae hoqlal. Ngael Shilloq saeqvae, Yeheqhuaq e yiqsi ae'lye noteel gae'lye suqhhaq bal o gil laqngeel." 9 Cholyaeq tyuhael yil vae, kaol tyuqvae milcaeq mael deeldyu byel vae, kaol milmae heeqmyel laoqmyel milcaeq mael siq pa byeldu hhei, kaol suqhhaq taq'ae cuga hhei, kaol Shilloq milcaeq'ae haqhhael diqkaeq hhei myel vae zhol e Yoshuyal tyuqvae hoq keellael. 10 Yoshuyal Shilloq vae Yeheqhuaq e yiqsi ae'lye yoqhhaeteel'ae suqhhaq bal o gil biq. Yoshuyal Yiqsellyel cholyaeq e zhipail laoqmyel, tyuqvae lye yoqhhaeteel'ae milcaeq byel hhei biq.Bianlyaqminq'ae byel hhei biq e milcaeq
11 Bianlyaqminq zhipail, zonglyaeq laoqmyel suqhhaq o, kaol hhamul e milcaeq mael laoq, Yoqdal houldailhael e milcaeq kaol Yoqsel houldailhael e milcaeq e kaeqlaeq vae za hhae. 12 Yoqhhaeteel e beqbian e miljyel mael laoq Yoqdanl Lolbaeq ae'lye mael, Ye'lilge baeqxeiq e beqbian vae da keel hhae, kaol neelgae aelheiq boq'ae lye geeqzhoq naeq e milcaeq vae yol da keel, kaol Boq Yalwenq e diqsheelleeldye vae keellye hhae. 13 Miljyel xilmael tyuqvae lye nanqbian boq'ae lye Lulsi vae gol yil, kaol Lulsi e baeqxeiq vae keellye hhae, Lulsi laoq Boqtellil ngeelvae, kaol Yalta'lul Yaldaq vae yol gae keel, kaol Aq'oq Boqheqlunq e nanqbian e geeqzhoq vae keellye hhae. 14 Miljyel xilmael neelgae aelheiq boq'ae maoldu, kaol nanqbian boq'ae yol laqhhehhe gayil, kaol Boqheqlunq nanqbian e yulboq e geeqzhoq vae lye mael, Yoqdal cholyaeq e milmae heeqmyel Ji'lyel Ba'lil vae maol keel hhae, Ji'lyel Ba'lil laoq Ji'lyel Ye'linq ngeelvae. Xilmael laoq neelgae aelheiq boq e miljyel ngeelvae. 15 Nanqbian laoq Ji'lyel Ye'linq e aqtaq taqli vae lye mael, miljyel xilmael neelgae aelheiq boq'ae lye Niqfuqdoyal eelbi vae maol keel hhae, 16 Miljyel xilmael Benq Xin'nenl Longlkaeq e yulboq e geeqzhoq e myeqzaeq vae yol gae keel, geeqzhoq e myeqzaeq xilmael laoq, Lilfaqyin Longlkaeq e beqbian ngeelvae; kaol Xin'nenl Longlkaeq vae yol gae keel, kaol Yebulsi baeqxeiq e nanqbian cho'lomyel, Yinq Loqjyeq vae gae keel; 17 Kaol beqbian boq'ae yol laqhhehhe polyil, kaol Yinq Shilmail vae maol keel, kaol Yaldu'minq e baeqxeiq e yulboq e Ji'lillyul vae keellye hhae, kaol Liuqbenq e yaqyo Bohanl e haqlo lomae tyuqvae yol gae keel, 18 Kaol Yallaba baeqxeiq e beqbian boq'ae yol gol yil, kaol Yallaba gae keelyil. 19 Miljyel xilmael Boq Heqla baeqxeiq e beqbian vae yol gol yil, kaol Yoqdanl Lolbaeq e nanqbian bian'li e Caqdeq Eeldeel e beqbian laq'ee vae keellye maol keel hhae, xilmael laoq nanqbian boq e miljyel'ae. 20 Neeldu aelheiq e bian'gail mael laoq Yoqdanl Lolbaeq'ae. Xilmael laoq Bianlyaqminq cholyaeq e zonglyaeq laoqmyel, yoqhhaeteel e dongqpyeq dongqjyel e miljyel maellye hhamul hhei biq e zaeqdye halngeiq mael'ae.
Bianlyaqminq'ae byel hhei biq e milmae heeqmyelhael
21 Bianlyaqminq zhipail'ae zonglyaeq laoqmyel hhamul hhei biq e milmae heeqmyelhael laoq Ye'lilge, Boq Heqla, Yinqmail Jixi, 22 Boq Yallaba, Xiqmaqlianq, Boqtellil, 23 Yalwenq, Ba'la, Oqfuqla, 24 Jifaq Amoqniq, Oqfuqniq kaol Jaba, gilzuqmyel milmae heeqmyel mael qyelniq gael'ae, kaol milmae heeqmyel xihael hhae lye e pusiqhael bal zoq wae siq; 25 Kaol Jibianl, Lamaq, Biqlul, 26 Miqsiba, Jifei'la, Moqsaq, 27 Liljian, Yi'lilpi'lel, Ta'la'la, 28 Xiqla, Yiqlilfuq, Yebulsi, Yebulsi laoq Ye'lulsa'lenq ngeelvae, Jibiqyal kaol Ji'lyel'ae, gilzuqmyel milmae heeqmyel mael qyel'yuq gael'ae, kaol milmae heeqmyel xihael hhae lye e pusiqhael bal zoq wae siq. Xilmael laoq Bianlyaqminq cholyaeq'ae zonglyaeq laoqmyel hhamul hhei biq e zaeqdye halngeiq'ae.