Maqnaqxi zhipail e qiq pa cholyaeq'ae byel hhei biq e milcaeq
17
Maqnaqxi laoq Yoqsel e fuqbo yaqyo'ae, xihael laoq yoqhhaeq e zhipail suqhhaq o maellye hhamul hhei biq e milcaeq mael'ae. Maqnaqxi e fuqbo yaqyo, Ji'lyel e aeqdae Maqjiq laoq daqzhangldiq e cholyaeq'ae, tyulkaol, Ji'lyel kaol Bashan mael hhamul hhei biq vae. 2 Maqnaqxi e baeqjyelboq e houldailhael laoq, Yalbiqyiqxyel e houldail, Xi'lel e houldail, Yalsi'lyel e houldail, Shiljianl e houldail, Xifuq e houldail kaol Shilmiqdal e houldail'ae, gilzuqmyel zonglyaeq laoqmyel suqhhaq o, kaol milcaeq hhamul hhei biq vae. Xihael gilzuqmyel Yoqsel e yaqyo Maqnaqxi e houldail onglci e maeq qiqsheel e zonglyaeq e haqyoyaeqhael'ae.3 Maqnaqxi e yuqpaeq e yuqpaeq, Maqjyeq e yuqheiq, Ji'lyel e yuqpaeq, Xifuq e yaqyo Xi'loqfeiha'ae yaeqmiq maoq yaqyo maeq zhol biq'ae. Yoqhhaeq e yaeqmiqhael laoq Maqla, Noq'a, Heqla, Milja, Deqsaq'ae. 4 Yoqhhaeteel laoq jilsi Yiqlilyalsaq, Nenl e yaqyo Yoshuyal, kaol yoheeqhael yiqsi'ae keellael, kaol gee: "Yeheqhuaq Moxi'ae ngaeteel e algo aeqnilhael onglci'ae lye ngaeteel'ae zaeqdye halngeiq byel hhei biq lye moqheilheil gol biq'ae." Tyulkaol, Yoshuyal Yeheqhuaq tyuqmyeq biq laoqmyel, yoqhhaeteel e daeldaehael kaol daemoqhael onglci'ae lye yoqhhaeteel'ae zaeqdye halngeiq byel hhei biq. 5 Yoqdanl Lolbaeq e neeldu aelheiq e Ji'lyel kaol Bashan mael maeq bael suanl myel, Maqnaqxi hhae lye zaeqdye halngeiq qyel gael za wae siq, 6 Maqnaqxi zhipail e haeqmiyaeqhael eiq haqyoyaeqhael onglci vae lye zaeqdye halngeiq byel hhei biq kaol'ae. Ji'lyel milcaeq mael laoq Maqnaqxi e baeqjyelboq e houldailhael hhae lye hhae.
7 Maqnaqxi e miljyel mael laoq Yalshel ae'lye mael, Shiljianl laefuqboq e Milmiqta vae keellye hhae, kaol laqsseq boq'ae Yinq Tapuqyal vae zhol e cholyaeq e milcaeq vae keel hhae. 8 Tapuqyal milcaeq mael laoq Maqnaqxi hhae, ngeelfeiq, Maqnaqxi bian'gail e Tapuqyal milmae heeqmyel mael laoq Yiqfaqlianq e houldailhael hhae. 9 Miljyel xilmael tyuqvae lye Ja'naq Lolbaeq vae gae keel hhae. Lolbaeq e nanqbian boq e milmae heeqmyel mael Maqnaqxi e milcaeq vae za feiq, Yiqfaqlianq hhae lye hhae. Maqnaqxi e miljyel mael lolbaeq e beqbian vae lye eeldeel deelmae vae keellye maol keel hhae. 10 Nanqbian boq laoq Yiqfaqlianq hhae, beqbian boq laoq Maqnaqxi hhae; eeldeel deelmae mael miljyel geiq hhae; beqbian boq laoq Yalshel vae keel, neeldu aelheiq boq laoq Yiqsalja vae keel hhae. 11 Maqnaqxi laoq Yiqsalja kaol Yalshel e milcaeq onglci vae za hhae, Boq Shanl kaol Boq Shanl hhae lye e milmae nilmyelhael, Yiqboqlianq kaol Yiqboqlianq hhae lye e milmae nilmyelhael, Do'eq kaol Do'eq hhae lye e milmae nilmyelhael vae zhol e cholyaeqhael, Yinq Do'eq kaol Yinq Do'eq hhae lye e milmae nilmyel vae zhol e cholyaeqhael, Ta'nal kaol Ta'nal hhae lye e milmae nilmyelhael vae zhol e cholyaeqhael, Miqjiqdo kaol Miqjiqdo hhae lye e milmae nilmyelhael vae e cholyaeqhael, milmae heeqmyel suq gael e tyu qiq gael laoq hongldul milcaeq'ae. 12 Ngeelfeiq, Maqnaqxi e houldailhael laoq milmae heeqmyel xilmael vae zhol e cholyaeqhael yaol maeq lyeqdu ongl biq'ae, Ja'nanq cholyaeqhael tyuqvae zhol maoq siq lye maeq naelhaeq'ae. 13 Yiqsellyel cholyaeqhael zhee henq fu, Ja'nanq cholyaeq'ae duqhee'lye mulhhael bi mul hhae, yoqhhaeteel yaol gilzuqmyel maeq lyeqdu biq'ae.
Yoqsel e houldailhael milcaeq hhael naeq myel byel laeq lye geezaeq
14 Yoqsel e houldailhael Yoshuyal'ae gee biq: "Yeheqhuaq yaeqnao keellye ngaeq'ae geeqlongq xilnye biq laq, kaol ngaeq e cholyaeq zhee naeq, nol aeqcheekaol ngaeq'ae suqhhaq qiq pu maoq maeq bi o laq, kaol zaeqdye halngeiq geiq e aeqhael qiq koq maoq maeq byel laeq lilmaeq?" 15 Yoshuyal yoqhhaeteel'ae gee biq: "Noq e cholyaeqhael zhee naeq kaollaoq, Yiqfaqlianq geeqzhoq naeq e milcaeq mael laoq tyeqno'lye laol, Biqlilxiq cholyaeq kaol Lilfaqyin cholyaeq e milcaeq e sheeqcongq vae da'li, kaol tyuqvae dedeiqzaeq li." 16 Yoqsel e houldailhael gee: "Geeqzhoq naeq e milcaeq tyuqvae ngaeteel maeq zholdyel'ae, Boq Shanl milmae heeqmyel kaol Boq Shanl hhae lye e milmae nilmyelhael, kaol Yesi'lyel dyeongl longlmae vae zhol e Ja'nanq cholyaeqhael'ae sulm e daqzhangldiq e cheziq za hhae." 17 Yoshuyal Yoqsel toq e Yiqfaqlianq kaol Maqnaqxi cholyaeq'ae gee biq: "Noq e cholyaeqhael zhee naeq, kaol henq eiq zhee henq'ae, suqhhaq qiq mal maoq maq hha o myel maeq hhaeq'ae. 18 Geeqzhoq naeq e milcaeq tyuhael eiq noq'ae bi mul laqngeel, sheeqcongq feiq nol dedeiqzaeq li kael'ae, kaol haeldongq haeljyel mael eiq noq'ae bi mul laqngeel. Ja'nanq cholyaeq henq eiq henq, daqzhangldiq e sulm e cheziq za feiq, nol yoqhhaeteel yaol eiq lyeqdu ongl'ae."