Yiqsellyel cholyaeqhael Xi'nail Geeqzhoq vae zhol
19
Yiqsellyel cholyaeqhael Aijiq milcaeq vae duyi aeqnaol, dilsan gol yeq e cuyiq'ae, tyuqfu qiq nao yoqhhaeteel Xi'nail Geeqzhoq e diqsheelleeldye vae keellael. 2 Yoqhhaeteel Lilfeidinl ae'lye deelsae hheikaol deel, kaol Xi'nail Geeqzhoq e diqsheelleeldye vae keellael, kaol tyuqvae e geeqzhoq aeqkeel vae haqhhael diqkaeq hhei gil'ae. 3 Moxi geeqzhoq'ae da'li kaol Momil'ae molli, kaol Yeheqhuaq laoq geeqzhoq ae'lye yoqhhaeq'ae gul biq, gee: "Nol Yaqgel toq'ae xilnye geegaeq biq, Yiqsellyel cholyaeqhael'ae xilnye gee biq: 4 'Ngael Aijiq cholyaeqhael'ae haelzongl gil biq mael laoq, noteel gilzuqmyel mol vae, ngael haeqjyel laoqmyel noteel yaol aeldongl taq'ae toq hhei, kaol noteel yaol sheeqlaeq kaol ngaeq e cholyaeq bi geiq lal. 5 Yaeqnao noteel ngaeq e saeziq mael haelmeeqlye naelhaeq, kaol ngaeq e geemeeq deelhhei mael zongl gaeyil kaollaoq, haelzhol cholyaeqhael onglci'ae lye ngaeq e haeqfu eiq hhamul gayil e cholyaeq hha geiq wae, halza milcaeq laoq gilzuqmyel ngaeq e kaol'ae. 6 Noteel laoq ngaeq'ae fuqsil laeq jilsihael e goqja kaol senljyeq e minqcuq geiq maoqhhae.' Saeziq xihael laoq nol Yiqsellyel cholyaeqhael'ae geegaeq hhei biq maoqhhae."7 Moxi lye cholyaeqhael onglci e zhangqlaoqhael yaol gul laeq, kaol Yeheqhuaq yoqhhaeq'ae moqheilheil biq mael yoqhhaeteel yiqsi ae'lye geegaeq hhei biq vae. 8 Kaol cholyaeqhael hhaellaelmyel geehoq biq: "Ngaeteel Yeheqhuaq haelgee mael laoqmyel zongl yil hhaeq." Kaol Moxi lye cholyaeqhael e saeziq mael Yeheqhuaq'ae geegaeqhoq hhei biq. 9 Yeheqhuaq Moxi'ae gee biq: "Fu hhei, ngael nahongqlye mqdul onglci'ae lye noq e tyuqvae yi maoq, xilnye laol, cholyaeqhael ngael noq nyegael saeziq gee'naeq fu hhae bael gaeq, kaol haeqfu eiq noq'ae hhae xiangxinl vae." Tyulkaol, Moxi lye cholyaeqhael e saeziq mael Yeheqhuaq'ae geegaeq hhei biq. 10 Yeheqhuaq Moxi'ae gee biq: "Nol cholyaeqhael e tyuqvae yil, kaol yoqhhaeteel'ae yaeqnao naeshoq laoq aeqyoyoq yaol zonglqyel du hheikaol senljyeq wae lye geiq maoqhhae, kaol yoqhhaeteel'ae aelhongq ciq maoqhhae lye gee biq. 11 Dilsan tian paeqgaelsael meeq hhei maoqhhae, dilsan tian Yeheqhuaq laoq cholyaeqhael e yiqsi'ae Xi'nail Geeqzhoq vae loq gayi maoqlye kaol'ae. 12 Nol geeqzhoq e dongqpyeq dongqjyel vae cholyaeqhael'ae geqqye deelhhei biq maoqhhae, gee: 'Noteel aeqyae'lye kei maoqhhae, geeqzhoq vae maeq hhae da'li, geeqzhoq e aeqkeel vae eiq aqlaq maellye maq hha so'ae. Geeqzhoq xilmael'ae so e cholyaeq yaol laoq aeqdilmyel zonglsil biq maoqhhae. 13 Aqlaq maellye yoqhhaeq'ae maq hha so'ae, aeqdilmyel haqlo maellye beiqsil maoqhhae, paelsilmyel aeqdilmyel kamaq maellye be sil hhei maoqhhae; cholyaeq haoq, jyeqyaeq haoq gilzuqmyel maq hha dyeq'ae.' Vuqkyul e botyel maol lye bo fu, yoqhhaeteel geeqzhoq e aeqkeel vae caiq hhae keellael." 14 Moxi geeqzhoq ae'lye cholyaeqhael e tyuqvae gae keelyil, kaol yoqhhaeteel yaol zonglqyel du hheikaol senljyeq wae lye bi geiq laol, yoqhhaeteel aelhongq ciq gil vae. 15 Kaol yoqhhaeq cholyaeqhael'ae gee biq: "Dilsan tian vae laoq paeqgaelsael meeq hhei maoqhhae; kaol haeqmiyaeq'ae maeq hhae byuqmaoqzaeq'ae."
16 Dilsan tian mqshoq keellael vae, geeqzhoq vae mqziqziq, mqmiqmiq kaol nahongqlye mqdul za, kaol vuqkyul botyel zhee gaeq'ae, kaol haqhhael diqkaeq hhei myel vae zhol e cholyaeqhael gilzuqmyel saeqzuqzuq li gil biq'ae. 17 Moxi laoq cholyaeqhael yaol sheeq hheikaol haqhhael diqkaeq hhei e milcaeq ae'lye duyil, kaol Momil'ae mol yil, cholyaeqhael gilzuqmyel geeqzhoq aeqkeel vae haoqtul deelhhei gil hhae. 18 Xi'nail Geeqzhoq qiq mal myel aeqhaoq byuq da hhae, Yeheqhuaq aeqzaeq doq onglci'ae lye geeqzhoq vae loq gayi kaol'ae. Geeqzhoq e aeqhaoq mael byuq da hhae, waq pe e aeqhaoq laoqmyel hhae, kaol geeqzhoq qiq mal myel guaeq'ei ssu'ni tullaeq. 19 Vuqkyul botyel mael nyeq'ei ta nyeq'ei hhael heeq lael, Moxi saeziq gee, Momil laoq yotyel maellye yoqhhaeq'ae geehoq biq. 20 Yeheqhuaq Xi'nail Geeqzhoq e vuqduq vae loq gayi, kaol Yeheqhuaq Moxi'ae geeqzhoq e vuqduq vae da'lal lye gul biq, kaol Moxi da'li vae. 21 Yeheqhuaq Moxi'ae gee biq: "Nol gaeyil kaol cholyaeqhael'ae jinqgaol yil biq, aeqgael yoqhhaeteel byuqpol laeq kaol Yeheqhuaq'ae chifu lael laol, yoqhhaeteel onglci'ae haelnaeqmyel cholyaeq sil hhei maeqhe. 22 Yeheqhuaq'ae niqli e jilsi tyuhael eiq aeqyoyoq yaol zonglqyel du hheikaol senljyeq wae lye geiq maoqhhae, aeqgael Yeheqhuaq qiqlaqmyel duyi kaol yoqhhaeteel yaol xyeq biq maeqhe." 23 Moxi Yeheqhuaq'ae gee biq: "Cholyaeqhael Xi'nail Geeqzhoq vae maeq hhae da'li'ae, noq lye ngaeteel'ae xilnye jinqgaol gol laq vae kaol'ae: 'Geeqzhoq e dongqpyeq dongqjyel vae cholyaeqhael'ae geqqye deelhhei biq maoqhhae, kaol geeqzhoq mael senljyeq wae lye bi peqlal.'" 24 Yeheqhuaq yoqhhaeq'ae gee biq: "Gaeyil, nol Yallunq nyegael qiqgael da'lal maoqhhae; ngeelfeiq, jilsi kaol cholyaeqhael Yeheqhuaq e saeqvae maeq hhae byuq da laq'ae, aeqgael Yeheqhuaq qiqlaqmyel duyi kaol yoqhhaeteel yaol xyeq biq maeqhe." 25 Tyulkaol, Moxi cholyaeqhael tyuqvae gae keelyil, kaol yoqhhaeteel'ae geegaeq hhei biq.