Yeltelloq Moxi'ae mol yi
18
Moxi e ssuqpaeq, Miqdianl milcaeq e jilsi Yeltelloq laoq, Momil Moxi kaol yoqhhaeq e Yiqsellyel cholyaeqhael'ae baelzongl biq e silqinqhael gaeq hhei biq, silqinq xihael laoq, Yeheqhuaq Yiqsellyel cholyaeqhael yaol Aijiq vae lye sheeq duyi mael ngeelvae. 2 Moxi e ssuqpaeq Yeltelloq laoq Moxi lye laefuq laoqhaol vae bi hoqyil e haeqmiq Xipo'la, 3 Kaol Xipo'la e yaqyo niq nulhhaeq yaol sheeq hheikaol Moxi'ae fu yil biq, yaeqguq xi niq nulhhaeq'ae qiq hhaeq'ae laoq Geqshunl lye gul biq hhae, Moxi xilnye gee kaol'ae: "Ngael laefuq laoq baeqjyelboq e milcaeq vae baelzhol e cholyaeq lil"; 4 Baeqjyelboq e qiq hhaeq e cholmil mael laoq Yiqlilyiqxyel lye gul biq hhae, yoqhhaeq xilnye gee kaol'ae: "Ngaedae e Momil ngaeq'ae baelzongl laeq, kaol ngaeq yaol Faqlaoq e maejyel holhhaq ae'lye jiul duyi laq". 5 Moxi e ssuqpaeq Yeltelloq laoq Moxi e haeqmiq kaol yaqyo niq nulhhaeq yaol sheeq hheikaol Momil e geeqzhoq vae keellael, geeqzhoq xilmael laoq, Moxi diqsheelleeldye vae haqhhael diqkaeq hhei e milcaeq ngeelvae. 6 Yoqhhaeq Moxi'ae gee biq: "Ngael laoq noq e ssuqpaeq Yeltelloq lil, noq e haeqmiq kaol yaqyo niq nulhhaeq yaol sheeq hheikaol noq saeqvae keellael." 7 Moxi duyil kaol yoqhhaeq e ssuqpaeq'ae sheeqcaq yil biq, yoqhhaeq'ae vuqduqtongq biq, kaol yoqhhaeq'ae myeqchilnuq biq, kaol qiqhhaeq qiqhhaeq'ae meeqlaeqmaeq lye naelhaeq gil, kaol haeqpael haelcul'ae do'li vae. 8 Moxi laoq Yeheqhuaq Yiqsellyel gae'lye Faqlaoq kaol Aijiq cholyaeqhael'ae haelzongl gil biq mael, kaol yoqhhaeteel gaelmae ae'lye hael puqli biq e saeq mael, kaol Yeheqhuaq yoqhhaeteel'ae haelmillye jiul laeq'ae lye mael, gilzuqmyel yoqhhaeq e ssuqpaeq'ae geegaeq hhei biq. 9 Yeltelloq laoq Yeheqhuaq Yiqsellyel cholyaeqhael'ae enhuil biq biq gae'lye zhee hhaol biq'ae, enhuil xilmael laoq, yoqhhaeq yoqhhaeteel yaol Aijiq cholyaeq e aqlaq ae'lye jiul duyi biq mael ngeelvae. 10 Yeltelloq gee: "Yeheqhuaq'ae laoq maeqdaeqhhaeq'ae lye gee biq maoqhhae, yoqhhaeq noteel yaol Aijiq cholyaeq, kaol Faqlaoq e aqlaq ae'lye jiul duyi biq, kaol Yiqsellyel cholyaeq xihael yaol Aijiq cholyaeq e aqlaq ae'lye jiul du hhei. 11 Yaeqmeel, Aijiq cholyaeqhael Yiqsellyel cholyaeqhael'ae zhee dilqeizaeq aeqmyel zongl gil biq xilmael gae'lye, ngael laoq Yeheqhuaq laoq haelzhol e momilhael taq'ae hhael heeq'ae lye loq wae." 12 Moxi e ssuqpaeq Yeltelloq lye Pebyel Zaelheel kaol zaelheel mael Momil'ae heel biq'ae. Yallunq kaol Yiqsellyel e zhangqlaoqhael gilzuqmyel lael, kaol Moxi e ssuqpaeq nyegael Momil e yiqsi'ae aelhoq zaeq gil'ae.Cholyaeqhael'ae zhiqmoq saelpodu hhei gil biq
Shen 1:9-18
13 Aeqnaol qiq nao, Moxi zhol deelhhei kaol cholyaeqhael zhiqmoqkae lael e silqinq mael bael panlduanl gil biq, cholyaeqhael mqshoq ae'lye mael mqkiq'ae keellye Moxi dongqpyeq'ae haoqtul deelhhei hhae. 14 Moxi e ssuqpaeq laoq yoqhhaeq cholyaeqhael gae'lye haelzonglhael mol hhei biq laol, gee: "Nol cholyaeqhael gae'lye haelzongl gil biq xilmael laoq aeqchee maeq? Nol aeqcheekaol aeqyoyoq qiq hhaeq myel zhol deelhhei, cholyaeqhael yaol laoq mqshoq ae'lye mael mqkiq'ae keellye noq e dongqpyeq'ae haoqtul deelhhei laeq?" 15 Moxi ssuqpaeq'ae gee biq: "Xilmael laoq, cholyaeqhael ngaeq e saeqvae keellael kaol Momil'ae naelhaeqzaeq lael kaol'ae. 16 Yoqhhaeteel'ae silqinq za biq fu laoq, ngaeq e saeqvae lael hhae, kaol ngael laoq yoqhhaeteel niqboq onglci'ae shenqpanl lil; ngael yoqhhaeteel'ae Momil e tiaoqlil mael kaol geemyeq mael bi loq lil." 17 Moxi e ssuqpaeq yoqhhaeq'ae gee biq: "Nol xilnye zongl maeqmeeq'ae. 18 Nol kaol noq nyegael qiqgael zhol e cholyaeq xihael laoq aeqdilmyel hhaeqdyuldyul she, xilmael laoq zhee naeq hhae, nol qiq hhaeq myel maeq zongl ongl kaol'ae. 19 Yaeqmeel, ngaeq e saeziq mael naelhaeq, ngael noq'ae loqho qiq mal bal du hhei laqngeel, Momil laoq noq nyegael qiqgael baelzhol biq lye nyuqlil. Nol laoq cholyaeqhael e vuqtu geiq kaol Momil e yiqsi'ae keelli, kaol silqinq mael Momil'ae geegaeq hhei biq, 20 kaol tiaoqlil mael kaol geemyeq maellye yoqhhaeteel'ae geetae biq, kaol yoqhhaeteel'ae deel maoq e gaelmae, kaol zongl maoq mael tyuqmyeq gil biq. 21 Nol eiq cholyaeqhael onglci ae'lye onglzaeq e cholyaeq, Momil'ae zun eiq zunjinl gu eiq gu, zaqgiq maqgiq myel xiangxinl hhaeq e, kaol maeqmeeqmyel dyuqbaq zonglzaeq e cholyaeq'ae neemasu biq e cholyaeq saelpodu hhei maoqhhae, kaol yoqhhaeteel yaol qiqca (1000) cholyaeq e zhiqmoq, qiqhael (100) cholyaeq e zhiqmoq, ngaeqqyel cholyaeq e zhiqmoq, kaol qyel hhaeq cholyaeq e zhiqmoq geiq lye moqheilheil biq, kaol yoqhhaeteel yaol cholyaeqhael'ae bi guanqliq. 22 Yoqhhaeteel haeqfu qiqlaq eiq cholyaeqhael'ae shenqpanl maoqlye hhae; heeq e silqinq mael laoq noq e saeqvae bi gee lael, hhaoqli hhaoqzaeqlye mael laoq yoqhhaeteel aeqyoyoq panlduanl biq. Xilnye laol, nol paelsuqlye hhael hhae pael wae, yoqhhaeteel noq nyegael xilmael bael zongl laeq'ae. 23 Nol xilnye zongl kaollaoq, Momil eiq noq'ae xilnye moqheilheil laeq'ae, kaol nol pityeq ongl'ae, kaol cholyaeqhael eiq aeqyoyoq e milcaeq vae neesaelhhae'lye hha hoq keelli'ae."
24 Moxi aeqyoq e ssuqpaeq e saeziq mael naelhaeq hhei'laol, yoqhhaeq haelgee laoqmyel zongl vae. 25 Moxi Yiqsellyel cholyaeqhael onglci ae'lye onglzaeq e cholyaeq saelpodu hhei, kaol yoqhhaeteel yaol cholyaeqhael e zhiqmoq bi geiq, qiqca (1000) cholyaeq e zhiqmoq, qiqhael (100) cholyaeq e zhiqmoq, ngaeqqyel cholyaeq e zhiqmoq kaol qyelhhaeq cholyaeq e zhiqmoq bi geiq hhae. 26 Kaol yoqhhaeteel haeqfu eiq cholyaeqhael'ae shenqpanl gil biq hhae: Maeq shenqpanl sael mael laoq Moxi tyuqvae gee keelli, hhaoqli hhaoqzaeqlye mael laoq aeqyoteel shenqpanl hhae. 27 Tyulnye laol, Moxi yoqhhaeq e ssuqpaeq'ae sheeqsaehoq biq, kaol yoqhhaeq aeqyoq e milcaeq vae hoq keelli vae.