फंदी गुरुमन
2
जसन आगे ले ची महापरभु चो लोगमन चो मंजी फंदी अगमजानीमन रओत, उसने तुमचो मंजी बले फंदी गुरुमन होदे। हुनमन तुमके नास होतो सिखिया खुसनाय सिखादे आउर आपनमन के दाम देउन घेनलो मालिक के बले निंदरदे, असने करुन हुनमन आपने के झपके मोरना ने पाड़दे।
2 खुबे लोगमन हुनमन चो सिखानी के धरुन अडरा बुतामन करदे, जेचो किरता सत बाट चो बदी होयदे।
3 हुनमन लालच ले तुमके ठगुन आपलो काजे खुबे नफा कमादे। मानतर हुनमन उपरे आगे ले ची महापरभु, डंड चो हुकुम दिलोसे, हुनमन चो मोरना समया लगे अमरलीसे।
4 कसनबलले महापरभु, हुन पाप करलो सरगदूतमन के नी छांडलो, मानतर हुनमन के नरक ने पठालो आउर नियाव चो दिन एओतले हुनमन के अंधार चो कुंड ने बांधुन संगालोसे।
5 उसनेचे महापरभु, आगे-जुगे चो संवसार के बले नी छांडुन भक्ति नी करतो संवसार ने बड़े पूर-पानी के पठालो, मानतर धरम चो गोट सांगतो नूह संगे आठझन के बचालो।†
6 असनेच हुन, सदोम आउर अमोरा नाव चो सहरमन के नास होतो चो डंड देउन लाकड़ी उलटालो कि भक्ति नी करतो लोगमन काजे गोटोक कहका होओत।†
7 आउर ओधरमीमन चो असुद चलनी-बुलनी ले खुबे मुरमुरा होउ, धरमकारी लूत के बले हुन बचालो।†
8 (कसनबलले हुन धरमकारी मनुक, ओधरमीमन चो मंजी ने रउन हुनमन चो अडरा बुतामन के दखुन-सुनुन रोजे आपलो सत-मन ने गागते रये।)
9 तेबे महापरभु, धरमकारीमन के जचई बेरा बचाउक आउर ओधरमीमन के नियाव दिन अमरतले डंड देउक जाने।
10 जुगे करुन हुनमन के, जोन असुद लालचमन ने देहें हिसाब ले चलसोत आउर परभु के हेला पतेयायसोत, जोनमन निलजाहा आउर एड़जा होउन मयमा पावलोमन के बदी देउक नी डरोत।
11 जेबे सरगदूतमन, जोन बल आउर सकत ने बड़े आसोत, परभु चो पुरे हुनमन के फंदी आय बलते बदी नी देओत।
12 एमन बुद नोहलो पसु असन आत, जोन धरा पड़ुन मोरतो काजे ची जनमलासे, आउर जोन गोटमन के मुरे नी जानोत हुनी गोटमन ने बदी देयसोत। एमन बले पसुमनचेई असन मोरना ने पड़दे।
13 एमन ओनियाव चो पलटा ओनियाव ची पावदे। मंज ने सुख-भोग करतोर हुनमन के नंगत लागुआय, ए लाज नोहलो दाग आउर दोख आय, एमन छंद ने तुमचो संगे बसुन खाउआत-पीउआत।
14 एमन होस-नंजरेयामन आत। एमन पाप करलो नोहलो रउक नी सकोत। एमन छन-छन लोगमन के फुसियाउआत आउर लालच चो टकर पड़लासे। एमन सराप पावलो पिलामन आत।
15 एमन सत बाट ले भुलकलासोत, आउर ओधरम चो भूती के मन करतो बोअर चो बेटा बिलाम चो बाट धरलासोत।
16 मानतर हुनचो ओधरम बुता काजे दागा मिरली, नी गोटेयाउक सकतो गदई, मनुक असन गोटेयाउन हुन अगमजानी चो झकाड़ी बुता के ठेबाली।†
17 एमन सुकलो चुंआ आउर लेहरा उड़ातो कुमला बादरी असन आत। एमन के जुग-जुग काजे अंधार ने रतो चो हुकुम दिलोसे।
18 एमन फोकाहा गुमानी गोटमन गोटेयाउन-गोटेयाउन, नवा पतेयातो लोगमन* के निलजाहा बुता ले देहें चो लालचमन ने पाड़सोत।
19 एमन, हुनमन के छंडातो बायदा करसोत, मानतर आपने ची पाप बुतामन ने फसलासोत; कसनबलले जोन मनुक जेचोले हारलोसे, हुन, हुनचेई कमेया होयसे।
20 जेबे एमन आमचो परभु आउर मुक्ति देउ जीसु किरिस्त के जानुन संवसार चो असुद के छांडला, मानतर फेर पाछे, हुनीची घिन-घिना बुतामन ने पड़लोने एमन चो एबे चो हाल, आगे चो ले बले आगर अडरा आय।
21 एमन के दिलो पवितर हुकुम के जानुन हुनके छांडतो पलटा हुन धारनिक बाट के नी ची जानले नंगत होती।
22 हुनमन काजे ए सत कटाव आय, जसन “कुकुर आपलो उचार के चाटुआय”, आउर “नहाउन दिले कड़ई बरांहा चिकल ने घोंडरु ची आय।”†