पतरस
चो दुसर चिटी
मूर चो गोट
1
जीसु किरिस्त चो कमेया आउर पठालो-बीता समोन पतरस बाटले, आमचो महापरभु आउर मुक्ति देउ जीसु किरिस्त चो धारनिक ले आमचो असन पतेयातो लोगमन के चिटी:
2 महापरभु आउर आमचो परभु जीसु के समपुरन जानलो बाटले, तुमके दया आउर अस्तिर जुगे मिरते रओ।
महापरभु हागदेतोर आउर बाछतोर
3 महापरभु आपलो मयमा आउर सत गुन बाटले आमके हागदिलोसे। एईकाजे आमचो जीवना आउर हुनचो सेवा काजे लागतो सपाय बानी आपलो अचरित सकत ले आमके दिलोसे। कसनबलले आमी हुनके जानलुसे।
4 जेचो बाटले महापरभु आमके खुबे मोल बिती आउर खुबे बड़े बर चो बायदा करलोसे कि तुमी ए संवसार चो लालचमन ने पड़ुन नास होतो ले बाचुन महापरभु चो पवितर गुन चो संगी होआ।
5 एईकाजे तुमी जमाय बरन ले मसागत करुन, आपलो बिसवास ले नंगत गुन, आउर नंगत गुन ले समज,
6 आउर समज ले मन-मंडाउ, आउर मन-मंडाउ ले धीरजा, धीरजा ले भक्ति,
7 आउर भक्ति ले दादा-भाई चो मया, आउर दादा-भाई चो मया ले मया करतोने खुबे बाड़ते जाहा।
8 कसनबलले ए जमाय गुन एबे तुमचो ने आसे आउर बाड़ते बले जायसे जाले, आमचो परभु जीसु किरिस्त चो गियान तुमके फोकाहा आउर काई काम नोहलोर होउक नी देये।
9 कसनबलले जेचोने ए गुन नीआय, हुन झांवरी-झांवरी दखतो काना आय। हुन आपलो आगे चो पापमन ले सुद होलेसे बलुन भुलकलोसे।
10 एईकाजे ए भाईमन, महापरभु तुमके हागदिलोर आउर बाछलोर गोट सिद होतो काजे जुगे मसागत करा। कसनबलले असन करले केबई बले धोका नी खाहासे।
11 असने नीती ले, तुमके आमचो परभु आउर मुक्ति देउ जीसु किरिस्त हरिक मन ले हुनचो जुग-जुग चो राज ने खुबे इजित-मान ले नेयदे।
12 ए जमाय गोटमन के तुमी जानेसाहास आउर जोन सत बचन तुमके मिरलीसे हुनी ने तुमी चमकट रयसाहास, तेबले बले मय तुमके ए जमाय गोटमन के सूरता कराते रयंदे।
13 मय जीव रओतले तुमके सूरता कराउन-कराउन उकसाते रयंदे, ए मोचो बिचार ने नंगत आय।
14 कसनबलले मय जानेंसे, मोचो मोरतो दिन झपके अमरेसे। जसन आमचो परभु जीसु किरिस्त आगे ले मोके दखालोसे।
15 एईकाजे मय इतलो मसागत करेंदे कि मोचो मोरलो पाछे तुमी ए सपाय गोटमन के अमदेया सूरता करुक सका।
किरिस्त चो मयमा दखलोमन चो गवा-साकी
16 कसनबलले आमचो परभु जीसु किरिस्त चो सकत आउर फेर एतो गोट के जेबे आमी सांगलु, तेबे आमी छंद ले घड़लो कहनीमन के नी सुनालु, कसनबलले आमी हुनचो मयमा चो गवा-साकी आंव।
17 जेबे बुआ महापरभु ले जीसु, मान आउर मयमा पावलो, तेबे हुन मयमा-उजर ले गोटोक राग सुना दिली कि “ए मोचो लाडरा बेटा आय, एचोले मय खुबे हरिक आंसे।”
18 हुदलदांय आमी जीसु संगे पवितर डोंगरी ने रलु, तेबे सरग ले एतो राग के सुनलु।
19 तेबे आमचो लगे अगमजानीमन चो रलो बचन सत आय बलुन पक्का होली। तुमी एके धियान देउन नंगत ची करसाहास। कसनबलले हुन अंधार ने बरतो दीया आय, आउर हुन पाहतेया तारा उदतले आउर बियान पाओतले तुमचो मन ने बरते रउआय।
20 मानतर तुमी आगे ए गोट के जाना कि पवितर सास्तर चो कोनी बले अगमगोट, कोचई आपलो मन चो बिचार ले नोआय।
21 कसनबलले काई बले अगमगोट, कोनी मनुक आपलो मन-इछा ले केबई नी बलला, मानतर पवितर आत्मा चो उकसातो बाटले महापरभु चो बचन सांगते रला।