परभु एतो दिन
3
ए मोचो मीत भाईमन, एदांय मय तुमके आउर गोटोक चिटी लिखेंसे आउर दुनो ने तुमके सूरता कराउन मय तुमचो मन-बिचार के सुद करतो काजे उकसायंसे
2 कि पवितर अगमजानीमन आगे ले सांगलो गोटमन के तुमी सूरता करा आउर पठालो-लोगमन बाटले तुमके मिरलो परभु आउर मुक्ति देउ जीसु चो हुकुममन के धियान करा।
3 आगे एके जाना कि सरासरी दिनमन ने हासी-खेली करतो लोगमन एदे आउर आपलेची मन-इछा ले चलदे,
4 आउर बलदे, “हुनचो फेर एतो चो बायदा के काय होली? कसनबलले दादी-पुरखामन मोरुन सरला मानतर ए संवसार चो सपाय बानी मूर बेरा चो असन ची चलेसे।”
5 हुनमन तो जानुन-चिनुन ए गोट के भुलकसोत कि महापरभु चो बचन हिसाब ले मूर ले बादरी आसे आउर मंजपुर, पानी ले उबजलीसे आउर पानी ने मांडलीसे।
6 पाछे एई पानी ले हुन जुग चो संवसार बुड़ून नास होली।
7 मानतर एबे चो बादरी आउर मंजपुर के, महापरभु चो बचन हिसाब ले, जराउन लाकड़ी उलटातो काजे बचालोसे। एमन के भक्ति नी करतो लोगमन चो नियाव चो दिने नास करतो काजे संगालोसे।
8 ए मोचो मया चो लोग, तुमी एके जाना कि परभु चो नंजर ने गोटोक दिन, हजार बरक कटार आउर हजार बरक, गोटोक दिन कटार आय।
9 परभु आपलो बायदा पुरा करतो काजे बेर नी करे, जसन कोनी-कोनी लोग बेर करेसे बलसोत। मानतर तुमचो काजे धीरजा धरेसे कि, कोनी लोग नास नी होओत आउर सपाय के मन बोहड़ातो मोहका मिरो।
10 मानतर परभु एतो दिन, चोर असन खुसनाय एयदे। तेबे बादरी खुबे घुड़लुन छंया-मया होउन जायदे, हुता चो जमाय बानी जरुन पानी उलटेदे, आउर मंजपुर आउर हुनचो जमाय बानी डसुन लाकड़ी उलटेदे।
11 ए जमाय बानी डसुन नास होउआय जाले, तुमके भक्ति आउर पवितर चलनी-बुलनी लोग होउक पड़ेदे।
12 आउर महापरभु एतो दिन के कसन बरन ले बाट दखतोर आय, आउर हुनचो झटके एतो काजे कसन बरन ले मसागत करते रतोर आय, जेचोले बादरी आईग ले गलेदे आउर बादरी चो जमाय बानी जरुन पानी उलटेदे।
13 मानतर आमी महापरभु चो बायदा करलो गोटोक नवा बादरी आउर नवा मंजपुर चो आसा करुंसे जोन थाने सत-धरम रयदे।
चेत ने राहा आउर तियार राहा
14 एईकाजे ए मोचो मया चो लोग, तुमी ए गोट चो आसा ने आसास जाले, तुमी परभु बाटले अस्तिर ने हुनचो पुरे दाग आउर दोख नोहलो रतो काजे मसागत करते राहा।
15 आउर तुमी समजा, खुबे लोगमन चो मुक्ति काजे आमचो परभु धीरजा धरलोसे। आमचो मया चो भाई पउलुस बले, महापरभु बाटले मिरलो गियान हिसाब ले तुमके एईची गोट के लिखलोसे।
16 उसनेची हुन आपलो सपाय चिटीमन ने बले एईची गोट के सांगलोसे, जेके समजतोर खिंडिक खट-खट आसे। जसन अपढ़ आउर चय-चय लोगमन पवितर सास्तर चो बचन के इसु-हेंव करसोत उसनेचे हुनमन पउलुस चो गोटमन के बले इसु-हेंव करुन आपनेचे नास होयसोत।