आपने के महापरभु के सोपा
4
तुमचो ने लड़ई-झगड़ा कहां ले ईली? काय, हुन सुख भोग करतो मन-इछा ले नोआय, जेचो काजे तुमचो अंगमन लड़सोत?
2 तुमी लालच करसाहास मानतर तुमके नी मिरे; एईकाजे तुमी मोरते मारसाहास। तुमी ईरका होयसाहास, आउर काई नी पाउन आपने-आपने झगड़ा होयसाहास। तुमके एईकाजे नी मिरे, कसनबलले तुमी महापरभु ले नी मांगास।
3 तुमी सुख-भोग ने उड़ातो उआट ले मांगुआहास, एईकाजे तुमके, मांगले बले नी मिरे।
4 ए नी पतेयातो बेबिचारीमन, काय तुमी नी जानास, संवसार के मीत बनातोर महापरभु के बईर करतोर आय? कोनी संवसार के मीत बनाउक मन करेसे जाले, हुन आपने के महापरभु ले बईरवार बनायसे।
5 काय, तुमी पवितर सास्तर ने लिखलो गोटमन मेलाय आय बलसाहास? आउर महापरभु आमके दिलो आत्मा काय, ईरका-कुचर ने रउक मन करेसे?
6 मानतर महापरभु खुबे दया करेसे, एईकाजे पवितर सास्तर ने असन लिखलोर आसे: “महापरभु गुमानीमन के बिरुद करेसे; मानतर आपने के नानी बनातोमन उपरे दया करेसे।”
7 एईकाजे आपने के महापरभु चो हक ने करा। सयतान ले लड़ा; तेबे हुन तुमचो लग ले निकरुन परायदे।
8 महापरभु लगे इआ, तेबे हुन बले तुमचो लगे एयदे। ए पापीमन, आपने के सुद करा। ए दुक-पुछ करतो लोग, आपलो मन के पवितर करा।
9 मुरमुरा होआ, खिसियाहा आउर गागा-बोगा होआ; तुमचो हांसतोर खिसियातो ने आउर तुमचो हरिक, खिसियातो ने पलटो।
10 परभु चो पुरे आपने के नानी बनाहा, तेबे परभु तुमके सबुले बड़े बनायदे।
भाईमन के दोस नी दिया
11 ए भाईमन, तुमी गोटोक-दुसर के बदी नी दिया। जोन आपलो भाई के बदी देयसे आउर हुनचो नियाव करेसे, हुन नियम-कानुन के बदी देयसे आउर हुनचो नियाव करेसे। तुमी नियम-कानुन चो नियाव करसाहास जाले, नियम-कानुन हिसाब ले चलतो बीता नोआहास, मानतर हुनचो नियाव करु बीता होयसाहास।
12 नियम-कानुन देउ आउर नियाव करु गोटकी ची आय, जोन बचाउक सके आउर नास बले करुक सके। तुय कोन आस, आपलो घर-लग चो लोग के नियाव करु बीता?
गुमान चो बिरुद चेतानी
13 तुमी असन बलासाहास, ए भाई इआ, “आजी नोहले काली के आमी कोनी दुसर सहर ने जाउन बरककार रवां आउर बेपार खेलुन खुबे कमावां।”
14 तुमी ए नी जानासाहास, काली के काय होयदे आउर तुमचो जीव काय आय? तुमी तो धुंआरी असन आहास, जोन डंडिक दखा देयसे आउर हाजुन जायसे।
15 एचो उलटा तुमके असन बलतोर आसे: “परभु मने करलोने आमी जीव रउंदे आउर ए नोहले हुन बुता के बले करुंदे।”
16 मानतर तुमी आपलो ढोंग गोटमन ने गुमान करसाहास। असन गोटमन काजे गुमान करतोर अडरा आय।
17 एईकाजे जोन कोनी भलई करुक जानेसे आउर भलई नी करेसे; हुनचो काजे ए पाप आय।