जीब के समालुन गोटेयातोर
3
ए मोचो भाईमन, तुमीमन ले खुबे लोग सिखाउमन नी बना, कसनबलले तुमी जानास, आमी सिखाउमन चो नियाव दुसर लोग ले आउर कटुर ले होयदे।
2 कसनबलले आमी सपाय, खुबे हार नसाउंसे बले। जोन कोनी धीर ले गोटेयाउ आय, हुन समपुरन मनुक आय। हुन आपलो देहें के बले आकुस ने करुक सके।
3 जिदलदांय आमी, घोड़ामन के आपलो आकुस ने करतो काजे नातूंसे; तेबे आमी हुनमन चो देहें के केहेंचे होओ नेउक सकुंसे।
4 दखा, पानी जाहाज बले, बड़े-बड़े तो रयसे आउर बरसक लेहरा हुनके चलायसे, तेबले बले गोटोक नानी चाटु ले घटवारी, आपलो मन असन हुनके केहेंचे होओ किंदराउक सकेसे।
5 असने ची जीब बले, देहें चो नानी असन अंग आय, मानतर हुन बड़े-बड़े ढोंग मारते रयसे।
दखा, खिंडिक असन आईग खुबे बड़े रान के डसायसे।
6 जीब बले आईग कटार आय। जीब ओधरम चो संवसार आय, जोन आमचो देहें ने जड़ धरलीसे; जेचो किरता सपाय देहें बदी पायसे आउर आपलो जीव ने आईग धरुन नरक-कुंड चो आईग ले डसते रयसे।
7 सपाय बरन चो रान जियादमन, चड़ई-सुरुंद, रेंगतो जनतुरमन आउर पानी जनतुरमन बले मनुक चो आकुस ने होउक सकोत आउर आसोत बले।
8 मानतर जीब के कोनी मनुक आपलो आकुस ने करुक नी सके। हुन इतरो अडरा आय; जेके केबई ठेबाउक नी होए। हुन जीव-धरा बिस ले भोरलीसे।
9 एई जीब ले आमी परभु आउर बुआ चो जय-जय करुंसे आउर महापरभु आपलो घटन ने बनालो मनुक के सराप देउंसे।
10 गोटकी ची टोंड ले जय-जय आउर सराप दुनो निकरेसे। ए मोचो भाईमन, असन नी होतोर आय।
11 काय, गोटोक पजरा थान ले नीरो आउर गोरो पानी निकरुक सकेदे?
12 ए मोचो भाईमन, काय, डुमर रूक ने जयतून फर नोहले अंगुर चो डीरा ने डुमर फर धरुक सकेदे? उसने गोरो पजरा ले नीरो पानी नी निकरुक सकेदे।
सरग चो गियान
13 तुमीमन ने गियान बीता आउर समज बीता कोन आसे? हुन आपलो गियान ले उबजतो सोज बेबार चो नंगत चलनी-बुलनी ले भलई बुतामन के दखाओ।
14 मानतर तुमचो मन ने खुबे ईरका-कुचर, आउर लालच आसे जाले आपलो गियान चो गुमान करुन सत चो बिरुद ने पाप नी करा।
15 ए गियान सरग चो नोआंय; मानतर ए संवसार चो, देहें चो, आउर सयतान चो आय।
16 कसनबलले जोन थाने ईरका-कुचर आउर लालच होयसे, हुता लड़ई-झगड़ा आउर सबु बरन चो अडरा बुतामन बले होयसे।
17 मानतर जोन गियान सरग ले एयसे, हुन आगतले पवितर रयसे। फेर अस्तिर, सुसार, सोज बेबार, दया, भलई बुता ले समपुरन, कोचई पाटेया नी होतोर आउर कपट नोहलो रयसे।
18 आउर मिला-मिसा करतोमन, अस्तिर चो बीच बुनदे आउर धारनिक चो कटई काटदे।