सवकारमन के तिकारनी
5
ए सवकारमन नंगत ले सुना, तुमी आपलो उपरे एतो डंड काजे सुयकुन-सुयकुन गागा।
2 तुमचो धन-माल नसलीसे आउर तुमचो फटईमन के कीड़ा खादलीसे।
3 तुमचो सोन-रूप ने माटी चेरलीसे। ए माटी चेरनी तुमचो बिरुद गवई देयसे, आउर आईग असन तुमचो मास के खायदे। कसनबलले तुमीमन सरासरी जुग ने धन रूंडालासाहास।
4 दखा, जोन भूतियारमन तुमचो बेड़ा चो कटई करलासोत, हुनमन चो आउर जोनमन चो भूती तुमी धोका देउन संगालासाहास, हुनमन चो भूती तुमचो बिरुद चिचियायसे। भूतियारमन चो गुहारनी, सबु के बनालो सेनामन चो परभु लगे अमरलीसे।
5 तुमी मंजपुर ने सुख-भोग ने रलास आउर खुबे हरिक ले सुख पावलासाहास; असन बरन ले तुमीमन मोरतो दिन काजे आपने के पाला-पोसा करुन ठोसर होलासाहास।
6 तुमीमन धरमकारी के कसूरदार बलुन मोरते मारलासाहास, जोन तुमचो संगे केबई नी जुजलो।
दुख-डंड बेरा धीरजा धरतोर
7 एईकाजे ए भाईमन, परभु एओतले धीरजा धरा। खेतियारमन के दखा, हुनमन भुंय ले खुबे मोल चो फसल पावतो चो आसा लगाउन जेटाहा पानी ले धरुन चमास सरतले धीरजा धरसोत।
8 तुमी बले धीरजा धरा, आउर आपलो मन के बरसक करा, कसनबलले परभु चो एतो समया लगे अमरलीसे।
9 ए भाईमन, गोटोक-दुसर के बदी नी दिया, तेबे तुमके बले बदी नी देदे। दखा, नियाव करु दुआरे उबा आसे।
10 ए भाईमन, जोन अगमजानीमन परभु चो नाव ने गोटेयालासोत, हुनमन चो दुख-तकलीस के आउर धीरजा के गोटोक बाट दखाउ असन समजा
11 दखा, आमी धीरजा धरतो लोग के खुबे धन-धन करुंसे। तुमीमन तो अयूब चो धीरजा धरतो चो बारे ने सुनलासाहास, हुनके परभु बाटले मिरलो पलटा के जानलासाहास। जेचोले परभु चो खुबे जीव दुखतोर आउर दया दखा देयसे।
12 ए मोचो भाईमन, सरग, मंजपुर आउर काई जिनीस चो नाव ले किरिया नी खाहा। ए सबु ले बड़े गोट आय। मानतर तुमचो गोट-बात सोजे हव चो हव आउर नाई चो नाई होओ। तेबे तुमी डंड पावतो चो लाईक नी होआसे।
पारथना चो सकत
13 तुमीमन ने कोनी तकलीस ने आसास जाले पारथना करा, आउर कोनी हरिक ने आसास जाले जय-जय गीत आउर भजन गीत गाहा।
14 तुमीमन ले कोनी बेमार आसे जाले मंडली चो धरम-सियानमन के हागदियास। हुनमन परभु चो नाव ने हुनचो उपरे जयतून तेल लगड़ुन पारथना करोत।
15 तेबे सतपतेयातो लोग चो पारथना बाटले बेमार ले छंडायदे आउर परभु हुनके उजरायदे। हुन पाप करु रले बले हुनचो पाप के खेमा करेदे।
16 एईकाजे तुमी गोटोक-दुसर चो पुरे आपलाहान पाप के माना आउर गोटोक-दुसर काजे पारथना करा, जेचोले तुमी बेमार ले चेकरासे। धरमकारी चो पारथना ले काईची हो होउक सके।
17 एलिया आमचेई असन दुख-सुख पावलो मनुक रये। हुन पानी नी मारो बलुन महापरभु ले धियान ले पारथना करलो; तीन बरक आउर छय मयना मंजपुर ने पानी नी मारली।
18 फेर हुन पारथना करलो के बादरी ले पानी मारली आउर भुंय आपलो उबज उबजाली।