जाकूब
चो चिटी
1
महापरभु आउर परभु जीसु किरिस्त चो कमेया, जाकूब बाटले संवसार ने गुलाय बाटे जत-खत रतो, बारा बंसमन के जुहार।
पतेयातोर आउर बुद
2 ए मोचो भाईमन, तुमी बरन-बरन चो जचई ने पड़लास जाले हुनके खुबे हरिक चो गोट समजा,
3 कसनबलले तुमी जानास कि तुमचो बिसवास के परखलोने धीरजा उबजेसे।
4 मानतर धीरजा ने चमकट राहा कि तुमी सपाय ने संपुरन आउर सिद होआ, जेचोले तुमचो ने काई चो उना नी होओ।
5 तुमीमन ले कोकई बुद चो उना आसे जाले, महापरभु ले मांगो, सपाय के रीस नी होउन हरिक मन ले देउ महापरभु, तुमके बले देयदे।
6 मानतर हुन बिसवास ले मांगो आउर काई दुक-पुछ नी करो, कसनबलले दुक-पुछ करतो बीता समदूर चो हलका असन आय, जोन लेहरा ले बोहते आउर डगाते रयसे।
7 असन मनुक, मोके परभु ले काई मिरेदे बलुन नी बिचारो,
8 असन मनुक, दुय मन बीता आय आउर आपलो सपाय गोट ने चमकट नी रये।
गरीब आउर सवकार
9 गरीब भाई आपलो बड़े पन काजे गुमान करो,
10 आउर सवकार, आपलो नानी पन काजे गुमान करो, कसनबलले हुन, रोंडा चो फूल असन झड़ते जायदे।
11 बेर उदते खन चड़-चड़ा घाम छेकेसे आउर रोंडा के सुकायसे। हुनचो फूल झड़ुन जायसे आउर हुनचो सोभा-सुंदर सरते जायसे। उसने बरन ले सवकार बले आपलो बुता करुन-करुन माटी ने मिसुन जायदे।
जचई आउर लालच
12 धन-धन आय हुन मनुक, जोन जचई ने चमकट रयसे, कसनबलले हुन चोखा होउन जीवन चो मुकुट पायदे, जेके महापरभु, आपलो मया करतो लोगमन के देतो बायदा करलोसे।
13 परखतो बेरा कोनी असन नी बलो कि महापरभु मोके परखेसे। कसनबलले काई अडरा गोटमन ले महापरभु के कोनी परखुक नी सके; आउर खुदे महापरभु अडरा गोटमन ले कोकई नी परखे।
14 मानतर सपाय लोग आपलो ची अडरा लालचमन ने फसुन जचई ने पड़सोत।
15 फेर अडरा लालचमन पेटेहारिन होउन पाप के जनमायसे आउर पाप बाड़लोने, मोरना के उबजायसे।
16 ए मोचो मीत भाईमन, धोका नी खाहा।
17 कसनबलले सबु नंगत बर आउर सबु नंगत दान सरग ले ची मिरेसे आउर सपाय दान, उजरमन चो बुआ महापरभु बाटले मिरेसे, हुनचोने काई उलट-पुलट होउक नी सके, नोहले हुन बदलतो छांय असन नी बदले।
18 हुन आपलो बनालो जमाय तीजमन ले आमके पईल फर होतो काजे, आपलो मन-इछा ले आमके सत बचन ले जनमालोसे।
बचन सुनतोर आउर मानतोर
19 ए मोचो मीत भाईमन, तुमी ए गोट के जाना; सपाय लोग सुनतो लय ने राहा, धीर ले गोटेयाहा आउर डंडकी रीस नी होआ।
20 कसनबलले मनुक चो रीस, महापरभु चो धारनिक उआट के ठेबाउक नी सके।
21 एईकाजे सबु घिन-घिना आउर बईर गोटमन के छांडुन तुमचो मने रोपलो, महापरभु चो बचन के सोज होउन माना, जोन तुमचो जीवमन के मुक्ति करुक सके।
22 तुमी सोजे बचन सुनतो लोग ची नाई जोन आपने के धोका देउआत, मानतर बचन सुनुन मानतो लोग बना।
23 कसनबलले जोन कोनी बचन सुनसोत आउर बचन हिसाब ले नी चलसोत, तेबे हुन मनुक आपलो थमना के दरपन ने दखतो बीता असन आय।
24 हुन दरपन ने आपने के दखेसे आउर हुताले गेलोने तूरते भुलकेसे कि मय कसन रयें।
25 मानतर जोन मनुक छुट चो सिद नियम-कानुन चो लय ने रयसे, हुन आपलो सपाय बुतामन ने धन-धन होयदे। कसनबलले हुन सुनुन नी भूलके आउर बुता चो लय ने ची रयसे।