महापरभु बाटले डंड
12
एईकाजे जेबे हुन गवामन चो बड़े भीड़ आमके बादरी ढाकलो असन घेरलीसे तेबे इआ, सपाय ठेबातो आउर गुपातो पाप के लापी गुचाउन जोन थाने आमके जातोर आय, धीरजा ले पराउं,
2 आउर जीसु, जोन आमचो बिसवास चो मूर आउर सिद करु आय, हुनचो बाट दखते रउं, हुन आपलो पुरे रलो हरिक काजे कुरूस चो दुख उठातोके लाज नी होलो आउर महापरभु चो राजगादी चो उजा बाटे जाउन बसलो।
3 एईकाजे मुरमुरा होउन साहस नी छांडा बलते तुमी हुनके धियान करा, जोन पापीमन ले इतलो डंड सहलो।
4 तुमी तो केबई पाप ले लड़ुन नी मोरलास।
5 आउर तुमी हुन सिखिया के जोन तुमके बेटा होतो किरता दिलोसे, हुनके तुमी छांडलास:
“ए मोचो बेटा, महापरभु डंड देतो के हेला नी समज,
आउर जेबे हुन तुके खीजेदे, तेबे धीरजा नी छांड।
6 कसनबलले महापरभु जेके मया करुआय,
हुनके डंड बले देउआय, आउर जेके बेटा मानुआय, हुनके कोड़ा ने बले मारुआय।”†
7 तुमी दुख के डंड समजुन कटलाहा, महापरभु तुमके बेटा मानुन बेबार करेसे। आउर हुन कोन बेटा आय जेके बुआ डंड नी देयसे?
8 जेबे हुनचो डंड सपाय के मिरेसे आउर तुमके नी मिरली जाले तुमी बेटा नोआहास, मानतर खुड़ बेटा आहास।
9 जेबे आमचो संवसारी बुआ बले आमके डंड देते रला, तेबले बले आमी हुनमन चो मान करलु। एईकाजे आत्मामन चो बुआ चो आउर बले मान करुक सकुं, जेचोले आमी जीव रउक सकुं।
10 हुनमन तो आपलो समज हिसाब ने इजिक दिन काजे डंड देते रओत, मानतर महापरभु आमचो नफा काजे डंड देयसे, कसनबलले आमी बले हुनचो असन पवितर होउं।
11 एबे चो समया ने सबु बरन चो डंड हरिक चो नोआय, मानतर दुखचेई गोट लागेसे; तेबले बले जोन डंड सहुन-सहुन सुदरलासे, पाछे हुनमन के अस्तिर चो धारनिक जीवना मिरेदे।
नंगत गोट आउर चेतानी
12 एईकाजे ढीलंग हाथमन आउर निमल मांडीमन के बरसक करा।
13 आपलो पांयमन काजे सरसरा बाट बनाहा कि खोड़ेया बले चेंग-चेंगा होउन नंगत ले हिंडुक सको।
14 सपाय ले मिलुन-मिसुन राहा आउर पवितर जीवना चो डगर ने राहा, पवितर होलो नोहलोर कोनी परभु के दखुक नी सकदे।
15 धियान दियास, असन नी होओ कि महापरभु चो दया ले कोनी चुकदे, नोहले कोनी गोटोक पीता जड़ असन झगड़ा उबजाउन खुबे लोगमन के डंड देयदे आउर हुनचो ले खुबे लोग असुद होउन जादे।
16 असन नी होओ, कोनी पाप ने गुपुन एसाव असन ओधरमी होओत, जोन गोटकी हार चो भात चो पलटा आपलो पईल बेटा होतो चो पन के बीकलो।
17 काय तुमी नी जानास, पाछे जेबे हुन बर पाउक मने करलो, तेबे हुनचो लाईक नी होलो आउर आंसू बोहाउन-बोहाउन डगराले बले मन बोहड़ातो मोहका हुनके नी मिरली।
18 तुमी तो इसराएलिमन असन हुन सिनाई डोंगरी जेके छिंउक सकतास, आउर ढग-ढकतो आईग, आउर करेया बादरी, अंधार आउर लेहरा-धुका
19 आउर तोड़ी बाजतो आउर बलतो राग लगे नी ईलास, जेके सुनतो लोग गुहार करला, “एदांय आमचो ले आउर गोटमन नी गोटेयाहा।”
20 कसनबलले हुनमन महापरभु चो हुकुम के नी सहुक सकला: “कोनी जनावर बले हुन डोंगरी के छींवला जाले हुनके पकना ने मारोत।”
21 आउर जोन दखा दिली हुन इतरो डरतो लाईक रली कि मोसा बललो, “मय खुबे डरेंसे आउर थरथरेंसे।”
22 मानतर तुमी सियोन डोंगरी, आउर जीवता महापरभु चो सहर, सरगपुर चो जरूसलेम, आउर कोटी-कोटी सरगदूतमन लगे ईलास।
23 आउर तुमी हुन पईलातमन चो रूंडा होतोर आउर मंडली, जेचो नाव सरग ने लिखलासे, आउर सपाय चो नियाव करतो महापरभु, आउर सिद होलो धरमीमन चो आत्मामन लगे ईलास,
24 आउर तुमी, छीचलोर लोउ आउर नवा बायदा चो मंजी जीसु लगे ईलास, जोन हाबील चो लोउ ले नंगत गोट बलेसे।*
25 चेत ने राहा, आउर गोटेयातो बीता ले थमना टेड़ा नी करा, कसनबलले हुन लोगमन संवसार के चेतानी देतो बीता ले थमना टेड़ा करुन बाचुक नी सकला, तेबे आमी सरग ले चेतानी देतो बीता ले कसन बाचुक सकवां
26 हुदलीदांय हुनचो गरजन ले मंजपुर डोलली, मानतर एदांय हुन बायदा करलो, आउर “गोटोक हार मय मंजपुर के चे नाई मानतर सरग के बले हलायंदे।”
27 आउर ए गोट “आउर गोटोक हार” ए गोट के दखायसे कि जोन तीज हलाउक होयसे, हुनमन बनालोर तीज होलो किरता गुचुन जायदे, मानतर जोन तीजमन हलाउक नी होयदे हुनमन बरसक बनुन रदे।
28 एईकाजे आमी नी हलतो राज के पाउन महापरभु चो बड़ाई करुं, आउर भक्ति, आउर डर संगे महापरभु चो सेवा करुं जेचोले हुन हरिक होयसे;
29 कसनबलले आमचो महापरभु लाकड़ी उलटातो आईग आय।