किरिस्त जीवना जीवतो चो सिखिया
13
दादा-भाई चो मया बनुन रओ।
2 सगामन के सेवा आउर मान करुक नी भूलका, कसनबलले एचई किरता कितरो लोगमन नी जानुन सरगदूतमन चो मान करला।
3 कयदीमन के असन सूरता करा जसन कि तुमी बले हुनमन संगे जयल ने आसास, जेचो संगे अडरा बेबार करसोत, हुनमन के असन समजुन सूरता करा कि आमचो बले उसने देहें आय।
4 बिया के सपाय लोग मान चो गोट समजा, आउर बिया-ओचना पवितर रओ, कसनबलले महापरभु, बेबिचारी आउर दुसर चो बायले संगे नाता जोड़तो बीतामन चो नियाव करेदे।
5 तुमी धन चो लालची नी होआ, आउर जितरो तुमचो लगे आसे हुतलेई ने हरिक राहा; कसनबलले महापरभु खुदे बललोसे,
“मय तुमके केबई नी छांडेंदे,
आउर केबई अलगे नी करें।”†
6 एईकाजे आमी डर नोहलोर बलुंसे,
“परभु मोचो साका आसे,
मनुक मोचो काय करुक सके,
मय नी डरें।”†
7 तुमचो गुरुमन जोन तुमके महापरभु चो बचन सुनालासे, हुनमन के सूरता करा; आउर धियान ले हुनमन चो चलनी-बुलनी के सरतले दखुन हुनमन चो बिसवास चो बाट धरा।
8 जीसु किरिस्त काली, आजी आउर जुग-जुग काजे असने ची आय।
9 बरन-बरन चो अटेयांग सिखियामन ले नी भरमा, महापरभु चो दया ले मन चमकट रतोर नंगत आय, कसनबलले खातो जिनीसमन ने मन लगातो लोग के काई नफा नी होली।
10 जीसु चो कुरूस, आमचो बेदी आय, जोन थाने बड़ाई चो जतरा चेगायसोत, तम्बु ने सेवा करतो लोगमन के हुताले खातो हक नीआय।
11 जोन जनावरमन चो लोउ बड़े पुजारी, पाप चो खेमा काजे पवितर ले पवितर ठान ने नेयसे, हुनमन चो धड़ तम्बु चो बाहरे डसायसोत।
12 उसनेची जीसु बले आपलो लोउ ले आमके पवितर करतो काजे सहर चो बाहरे डंड पावलो।
13 एईकाजे इआ, हुनचो बदी आपलो उपरे धरुन सहर चो बाहरे हुनचो लगे जावां।
14 कसनबलले ए मंजपुर आमचो अमदेया रतो ठान नोआय मानतर आमी गोटोक एतो बिती सहर के डगराउंसे।
15 एईकाजे आमी महापरभु के बड़ाई चो जतरा रोजे चेगाउं बललोने महापरभु के नंगत गोटमन ले सहरातोर जोन हुनचो नाव के मानुंसे,
16 आउर भलई करतोर आउर हरिक मन ले दान देउक नी भूलका, कसनबलले महापरभु असनी जतरामन, बललोने असन बुतामन ले हरिक होउआय।
17 आपलो गुरुमन चो हुकुम माना आउर हुनमन चो सरन ने राहा। हुनमन तुमचो जीव काजे चेत ने रयसोत कसनबलले हुनमन के महापरभु लगे हिसाब देउक पड़ेदे। हुनमन ए बुता के हरिक ले करोत, फिकिर ने करला जाले तुमके काई नफा नीआय।
18 आमचो काजे पारथना करते राहा, कसनबलले आमी पक्का जानुंसे कि आमचो मन-चेतन पवितर आसे आउर आमके सपाय बुतामन के नंगत चलनी-बुलनी ले करुक भायसे।
19 मय तुमके गुहारेंसे, तुमी मोचो काजे पारथना करा कि मोके तुमचो लगे झटके एउक होओ।
20 एदांय अस्तिर देउ महापरभु, आमचो परभु जीसु के जुग-जुग चो बायदा चो लोउ किरता मोरलो थान ले जियालो। मेंडामन चो बड़े भारी दखा-राखा करु जीसु आय।
21 महापरभु तुमके सपाय नंगत गोटमन ने सिद करो कि तुमी हुनचो मन के पुरा करुक सका आउर जोन, महापरभु के भाउआय, उसने जीसु किरिस्त बाटले आमचो मने उबजास करो। हुनचो मयमा जुग-जुग होते रओ। आमीन*।
22 ए भाईमन, मय तुमके गुहार करेंसे कि ए गोटमन के धीरजा ले सुना, कसनबलले मय तुमचो काजे जुगे नी लिखलेसे।
23 तुमी सूरता करा कि आमचो भाई तीमुथियुस जयल ले निकरलोसे आउर हुन झटके ईलो जाले मय हुनचो संगे तुमके भेटेंदे।
24 आपलो सबु गुरुमन के आउर सपाय पवितर लोगमन के आमचो बाटले जुहार बला। आउर इटली राज चो लोगमन बले तुमके जुहार बलसोत।
25 महापरभु चो दया तुमी सपाय उपरे रओ। आमीन।