आमचो पुरखामन चो जुगे बिसवास
11
एदांय बिसवास काय आय? बिसवास, आसा करलो जिनीसमन चो सत होतोर आउर नी दखलो जिनीसमन के मन ने पक्का जानतोर आय कि हुन आसे।
2 कसनबलले आगे जुग चो लोगमन आपलो बिसवास चो किरता नंगत गवई होला।
3 पतेयातोर ने ची आमी जानुंसे कि सबु संवसार महापरभु चो गोट ले बनलीसे। एईकाजे जोन बले दखा देयसे हुन दखलो तीजमन ले नी बनलीसे।
4 पतेयातोर ने ची हाबील, कईन ले खुबे नंगत भेंट महापरभु काजे चेगालो आउर हुनी बाटले हुनके धरमकारी होतो चो गवई दिलो, कसनबलले महापरभु हुनचो भेंट चो बारे ने नंगत गवई दिलो; आउर हुन पतेयातो किरता मोरलो पाछे बले एबले गोटेयायसे।†
5 पतेयातोर ने ची हनोक के महापरभु जीवता-जीवता उपरे नीलो कि हुन मोरना चो डंड के नी चाको; हुनचो अता-पता नी मिरली कि महापरभु हुनके उपरे नेउन रलो, आउर हुनके नेतो ले आगे धरमसास्तर गवई देउन रली कि हुन महापरभु के हरिक करलोसे।†
6 बिसवास नोहलोर महापरभु के केबई हरिक करुक नी होए, कसनबलले हुनचो लगे एतो लोग के पतेयातोर आय कि हुन आसे, आउर हुनके डगरातो लोग के बर देयसे।
7 पतेयातोर ने ची नूह, महापरभु ले केबई नी होलो गोट चो चेतानी पावलो, आउर भक्ति संगे मानुन आपलो घर चो लोग के बचातो काजे गोटोक बड़े डोंगा* बनालो। पतेयातो ले हुन ए संवसार चो लोगमन के फंदी ठेबाउन धरमकारी बनतो हक पावलो।†
8 पतेयातोर ने ची अबराहम, महापरभु हागदिलोके हुकुम मानुन हुन देस ने निकरुन गेलो, जोन देस पाछे हुनके हक ने मिरतोर रली। ए नी जानुन रये कि कहां जायसे, तेबले बले गेलो।†
9 पतेयातोर ने ची अबराहम, महापरभु बायदा करलो देस ने परदेसिया होउन तमुमन ने रलो, उसनेची इसहाक आउर जाकूब, हकदार होउन बले हुनी देस ने तमुमन ने रला जोन देस के देतो बायदा महापरभु करुन रये।
परदेसिया होउन रतो तमुमन (11:9)
10 कसनबलले हुन चमकट पाया बिती सहर चो बाट दखते रलो, जेके बिचारु आउर बनाउ महापरभु आय।
11 पतेयातोर ने ची सारा डोकरी होउन बले पेटे ठेबतोर सकत पावली, कसनबलले हुन बायदा करु के सत-पतेयाउन रये।†
12 एईकाजे गोटकी मनुक ले जोन मोरलो असन रलो, बादरी चो तारामन आउर समूंद कटा चो बारु असन गनुक नी सकतो इतलो बंस जनमला।†
13 ए सपाय लोगमन पतेयाते-पतेयाते मोरला आउर हुनमन महापरभु बायदा करलो जिनीसमन नी पावला, मानतर हुनके लापी ले दखुन हरिक होला, आउर हुनमन संवसार ने परदेसिया आउर दुसर बाट चो आंव बलुन, मानला।†
14 आउर जोन लोगमन असन गोट गोटेयायसोत, हुनमन ए दखायसोत कि हुनमन आपलो देस के डगरायसोत।
15 जोन देस ले हुनमन निकरुन एउन रला हुन देस चो सूरता करलोने बोहड़ुन जातो मोहका रली।
16 मानतर हुनमन गोटोक नंगत देस बललोने सरग राज के मन करसोत, एईकाजे महापरभु हुनमन चो महापरभु बलाय होतोके लाज नी होए, कसनबलले हुन, हुनमन काजे गोटोक सहर बनालोसे।†
17-18 महापरभु अबराहम के बलुन रलो, “इसहाक ले तुचो बंस बाड़ेदे”, मानतर पतेयातोर ने ची अबराहम, महापरभु हुनके परखतो बेरा आपलो गोटकी ची बेटा इसहाक* के जतरा चेगालो। इसहाक ले ची बंस बाड़ेदे बलुन महापरभु बायदा करु रये।†
19 कसनबलले हुन जानलो कि महापरभु मोरलो लोग के बले जियाउक सके आउर उसनेची अबराहम इसहाक के फेर जीवता पावलो।
20 पतेयातोर ने ची इसहाक, आपलो बेटामन जाकूब आउर एसाव के होतो गोटमन चो बारे ने बर दिलो।†
21 पतेयातोर ने ची जाकूब मोरतो बेरा जूसुफ चो दुनो बेटामन के बर दिलो आउर आपलो टेकना-बड़गी के टेकुन महापरभु के डंडासरन करलो।†
22 पतेयातोर ने ची जूसुफ मोरतो बेरा ले आगे हुन इसराएल चो लोगमन के मिसर ले निकरुन जातो चो गोट बात करलो, आउर आपलो हाड़ामन के नेतो काजे हुकुम दिलो।†
23 पतेयातोर ने ची मोसा जनमलोके हुनचो आया-बुआ तीन मयना लुकाउन रला, कसनबलले हुनमन दखला कि लेका-पिला खुबे सुंदर आसे आउर राजा चो हुकुम* ले नी डरला।†
24 पतेयातोर ने मोसा जुवान होउन “फिरोन* चो बेटी चो बेटा” बलाय होतोके नाई बललो।†
25 एईकाजे कि हुनके पाप ने खिंडिक दिन सुख पावतो पलटा महापरभु चो लोगमन संगे दुख पावतोर खुबे नंगत लागली।
26 किरिस्त काजे बदी होतोर मिसर चो धन चो भंडार ले बले जुगे धन समजलो, कसनबलले हुन, महापरभु ले बर पावतो बाट दखते रये।
27 पतेयातोर ने ची राजा चो रीस के नी डरुन मिसर देस के छांडुन दिलो, कसनबलले हुन नी दखलो महापरभु के, दखलो असन मानुन चमकट रलो।†
28 पतेयातोर ने ची पईलात बेटामन के मारतो सरगदूत, इसराएलिमन चो पईलात बेटामन के मोरते नी मारो बलुन मोसा फसह तिहार† आउर लोउ छीचतो नीती के मानतो हुकुम दिलो।†
29 पतेयातोर ने ची हुनमन लाल समदूर के असन नाहकला जसन सुकलो भुंय ने आउर जेबे मिसरेयामन उसने करतो काजे होला, तेबे सपाय बुड़ून मोरला।†
30 पतेयातोर ने ची हुनमन जरीहो सहर चो भाड़ा के सात दिन किंदरला तेबे हुन भोसड़ली।†
31 पतेयातोर ने ची राहब बेसवा भेदियामन के नंगत ले लुकाउन रली आउर महापरभु के नी मानतो लोगमन संगे नी मोरली।†
32 एदांय आउर काय बलुआंय? गिदोन, बाराक, सिमसोन, जिफता, दाउद, सामुएल, आउर अगमजानीमन चो बारे ने सांगुन-पुरुक नी होए।†
33 एमन पतेयातोर ने ची राज जीतला, धरम चो बुतामन करला; बायदा करलो जिनीसमन के पावला; बागमन चो टोंड ले बाचला;†
34 ढग-ढकतो आईग ने नी डसला; खांडा चो धार ले बाचला; निमल ले बल पावला; लड़ई ने जीतला; दुसर देस चो पलटनमन के मारते-पेटते खेदला।†
35 बायलेमन आपलो मोरलो लोगमन के फेर जीवता पावला।
कितरो लोगमन तो महापरभु के पतेयातो किरता मार खाउन-खाउन मोरले बले महापरभु के छांडतो के मन नी करला; एईकाजे कि हुनमन सबुले नंगत जीवना, बललोने फेर जीव उठतो चो बाटा पाउक सकोत।†
36 आदो झन के इजित धरला; कोके-कोके कोड़ा ने मारला; कोकई सिकरा ने बांदला; कोकई जयल-घर ने भोरला आउर असन करुन हुनमन के परखला।
37 कोकई तो पकनामन ने मारला; कोकई तो आरा ने काटला; कोकई तो खांडा ने मारला; हुनमन गरीबी, तकलीस आउर दुख पावला; मेंडामन आउर बोकड़ामन चो चामड़ा ओड़ुन, ए बाटे हुन बाटे बुलला;
38 आउर राने, डोंगरीमन ने, करपनमन ने, आउर भुंय चो डांगरामन ने भुलकते बुलते रला। संवसार हुनमन चो लाईक नी रये।