सिद जतरा
10
कसनबलले मोसा चो नियम-कानुन तो एतो बिती किरिस्त चो नंगत गोटमन चो छांय आय। मानतर हुनचो असली रूप नोआय, जेचोले बोदना आनतो बीता केबई सिद होउक नी सकुआय, कसनबलले हुन गोटकी ची बरन चो जतरामन के हर बरक चेगायसे।
2 नोहले हुनमन जतरा चेगातोर कसन ने नी छांडता? बोदना आनतो बीतामन चो मन-चेतन गोटकी हार ने सुद होती जाले, हुनमन चो मन हुनमन के केबई पापी नी मानती।
3-4 बयलामन आउर बोकड़ामन चो लोउ पापमन ले छंडाउक चे नी सके। मानतर जतरामन ले हुनमन के हर बरक पापमन चो सूरता एयसे।
5 एईकाजे किरिस्त संवसार ने एतो बेरा बललो,
“जतरा आउर भेंट के तुय मने नी करलीस,
मानतर मोचो काजे गोटोक देहें तियार करलीस।
6 होम जतरामन ले आउर पाप जतरामन ले
तुय हरिक नी होलीस।
7 तेबे मय बलले, ‘दख, मय ईलेसे,
पवितर सास्तर ने मोचो बारे ने लिखलीसे,
ए महापरभु, मय तुचो मन-इछा के पुरा करेंदे।’”†
8 आगे हुन बललोसे, “तुय जतरामन आउर भेंटमन आउर होम जतरामन आउर पाप जतरामन के मने नी करलीस आउर तुय हुनचो ले हरिक बले नी होलीस” तेबले बले ए जतरामन नियम-कानुन चो हिसाब ने चेगायसोत।
9 फेर असन बले बलेसे, “दख, मय तुचो मन-इछा के पुरा करुक ईलेसे,” असने महापरभु, हुन पईल नियम-कानुन के गुचाउन दुसर नियम-कानुन के आनलो।
10 महापरभु मन करलो असन जीसु किरिस्त गोटकी हार अमदेया काजे आपलो देहें चो जतरा बाटले आमके पवितर करलोसे।
11 जुना नियम-कानुन चो हिसाब ने, सबु पुजारी तो रोजे दिना बेदी पुरे उबा होउन सेवा-सासन करसोत आउर गोटकी बरन चो जतरामन के घन-घन चेगायसोत, जोन पापमन ले केबई बले छंडाउक नी सके।
12 मानतर किरिस्त पापमन चो खेमा काजे आपने के गोटकी चे हार अमदेया काजे जतरा चेगालो, आउर महापरभु चो उजा हाथ बाटे जाउन बसलो,
13 आउर हुदलीदांय ले, एचो बाट दखेसे कि हुनचो बयरीमन हुनचो पांय मंडातो पीड़ा असन बनोत।
14 कसनबलले हुन गोटकी चे जतरा बाटले, पवितर करलो लोगमन के अमदेया काजे सिद करलो।
15 आउर पवितर आत्मा बले आमके असनी गवई देयसे। हुन आगे बलुन रये,
16 “महापरभु बलेसे, जोन बायदा मय हुन दिनमन चो पाछे हुनमन ले करेंदे,
हुन ए आय कि मय आपलो नियम-कानुनमन के हुनमन चो बुद ने भरेंदे,
आउर मय हुनमन चो मन ने लिखेंदे।”
17 हुन असन फेर बलेसे,
“मय हुनमन चो पापमन के
आउर हुनमन चो ओधरम बुतामन के केबई सूरता नी करेंदे।”†
18 जेबे सपाय पापमन चो खेमा होलीसे, तेबे फेर पाप काजे जतरा नी लागे।
महापरभु लगे जो
19 एईकाजे भाईमन, जीसु चो लोउ किरता आमके हुन नवा आउर जीवता बाट ले पवितर ठान ने ओलतो चो ढाढ़ुस मिरलीसे,
20 जेके हुन पड़दा बललोने, आपलो देहें बाटले, आमचो काजे उगाड़ुन दिलो।
21 आउर जेबे आमचो काजे असन बड़े मान चो पुजारी आसे जोन महापरभु चो घर चो हकदार आय,
22 तेबे इआ, आमी सत मन आउर पुरा बिसवास ले मन-चेतन चो दोख के लापी गुचातो काजे मन ने छिछाय होउन आउर देहें के नीरो पानी ने धोउन महापरभु लगे जो।
23 इआ, आमी आपलो मानतो आसा के चमकट ले थामुन रउं, कसनबलले जोन, बायदा करलोसे, हुन पतेयातो लाईक आय।
24 धियान देवां कि मया आउर भलई बुतामन ने गोटोक-दुसर चो बाड़ती करुं,
25 आउर आमी रूंडा होउक नी छांडु, जसन कोनी-कोनी लोगमन चो नीती आय; मानतर सबु, गोटोक-दुसर के उकसाते रउं आउर जेबे हुन दिन के लगे एतोके दखासे, तेबे आउर बले खुबे उसने करा।
26 सत के चिताउन बले आमी जानुन-बुजुन असन पाप करते रलु जाले, पापमन चो खेमा काजे काई जतरा नी बाचलीसे।
27 मानतर, डंड चो बिकट डर ने बाट दखतोर आउर ढग-ढकतो आईग ने जरतोर बाचलीसे, जोन महापरभु चो बयरीमन के लाकड़ी उलटाउन देयदे।
28 मोसा चो नियम-कानुनमन के नी मानलोने, दुय नोहले तीन लोग चो गवई ने दया नी करुन मारुन देयसोत।
29 एईकाजे बिचार करुन दखा कि हुनमन आउर कितरो खुबे डंड चो लाईक होदे, जोन महापरभु चो बेटा के पांय ने रमंदला आउर बायदा चो लोउ के असुद मानला (जेचो बाटले हुनके पवितर ठेबाउन रला), आउर बर देतो आत्मा चो इजित धरला।
30 कसनबलले आमी हुनके जानुंसे जोन बललो कि “मय पलटा धरेंदे आउर मय डंड बले देयंदे।” आउर फेर असन बले बलेसे “महापरभु आपलो लोगमन चो नियाव करेदे।”
31 जीवत महापरभु चो हाथे पड़तोर महाजंजाल गोट आय।
32 मानतर हुन आगे चो दिनमन के सूरता करा, जोन दिनमन ने तुमी महापरभु ले बल पाउन डंड चो खुबे झंजट ने बरसक रलास।
33 केबे-केबे तो तुमी झगड़ा आउर दुख सहुन बले लोगमन चो पुरे हसरित बनलास आउर केबे-केबे तुमी हुनमन बाटे होलास, जोनमन के नानागती करते रला।
34 कसनबलले तुमी कयदीमन चो दुख-तकलीस ने हुनमन के जीव-दुखलास आउर आपलो धन के बले हरिक ले झीकुन नेउक दिलास; ए जानुन कि तुमचो लगे एचोले बले खुबे नंगत आउर अमदेया रतो धन सरग ने आसे।
35 एईकाजे आपलो धीरजा नी छांडा। कसनबलले हुनचो पलटा तुमके खुबे मिरेदे।
36 तुमके धीरजा धरतोर ची आय, तेबे महापरभु चो मन के पुरा करुन तुमी बायदा चो पलटा पाहासे।
37 कसनबलले एबे खिंडिक चे समया बाचलीसे,
“एतो बीता
झटके एयदे बेर नी करे।
38 पवितर सास्तर ने महापरभु बलेसे:
मोचो धरमाती लोग पतेयातो किरता जीव रदे,
मानतर हुनमन पाटे गुचला जाले, मय हुनमन ले हरिक नी होयंदे।”†
39 आमी हुन लोगमन असन नोआंव, जोन पाटे गुचुआत आउर नास होउन जाउआत। मानतर हुनमन असन आंव जोन पतेयातोने आत्मा के बचाउआत।