मनुक चो बनालोर तम्बु ने सेवा
9
पईल बायदा ने बले सेवा-सासन करतो नियममन रली आउर पवितर ठान रये, जोन ए संवसार चो रली।
2 बललोने, गोटोक तम्बु बनाउन रला, जेचो पईल बाकरा के पवितर ठान बलते रला; जोन थाने लामन, टेबुल, आउर भेंट चेगालो रोटीमन रली।
तम्बु चो पईल बाकरा (9:2)
3 तम्बु चो दुसर बाकरा जोन पड़दा चो पाटकुती रये, जेके पवितर ले पवितर ठान बलसोत।
4 हुन थाने सोन चो धूप गंधातो आरती, आउर चारो कुती ले सोन चेगालोर बायदा चो डोली*, जेचो थाने मन्ना* ले भोरलोर सोन चो बटका आउर हारुन पुजारी चो जागलो बड़गी, जोन थाने फूल-पाक धरुन रली आउर मोसा चो नियम-कानुन लिखलोर पकना चो पटीमन रली।
5 बायदा चो डोली उपरे दुयठन बरतो करूबमन रला, जोनमन चो पाटकीमन “दया चो ठान”* के छांय करुन रला; ए गोटमन के नस-नस करुन सांगतोर एबे समया नीआय।
6 ए नीती ने जिनीसमन बनुन रली। आउर तम्बु चो हुन पईल बाकरा ने पुजारीमन रोजे दिना ओलुन सेवा-सासन करसोत,
7 मानतर दुसर बाकरा ने बड़े पुजारी एकला बरककार ने गोटकी हार जाउआय, आउर जतरा चो लोउ धरलोर नोहलोर नी जाए; जेके हुन आपलो आउर लोगमन चो पाप-दोख चो खेमा काजे चेगायसे।
8 एचोले पवितर आत्मा ए दखायसे कि जिदलदांय ले तम्बु चो पईल बाकरा ने पड़दा आड़ आसे, हुदलदांय ले पवितर ले पवितर ठान चो बाट दखा नी देये।
9 ए मनुक चो बनालोर तम्बु, एबे चो समया काजे गोटोक कटाव आय; जोन थाने जतरा आउर चेगावा करते रओत, जेचोले बोदना चेगातो लोगमन चो मन-चेतन सिद होउक नी सके।
10 जुना नियम चो हिसाब ने खातो-पीवतो जिनीसमन आउर बरन-बरन चो नहातोर नीती देहें चो नियम आय, जेके महापरभु सपाय के नवा बनाओतले देउन रलो।
किरिस्त चो लोउ चो सकत
11 मानतर एबे किरिस्त एतो बिती नंगत जिनीसमन चो बड़े पुजारी होउन, आउर बले बड़े आउर सिद तम्बु ले होउन ईलो। हुन तम्बु मनुक चो बनालोर नोआय बललोने ए संवसार चो नोआय।
12 बोकड़ामन आउर बाछामन चो लोउ बाटले नोआय मानतर आपलेची लोउ बाटले, गोटकी हार पवितर ठान ने ओललो आउर आमके जुग-जुग काजे पाप ले छंडालो।
13 कसनबलले जेबे बोकड़ामन आउर बयलामन चो लोउ आउर बाछी के जरालोर लाकड़ी, असुद लोगमन के छीचलोने देहें पवितर होयसे,
14 तेबे किरिस्त चो लोउ तुमचो बुद के, मोरना ने अमरातो पाप बुतामन ले कितरो आगर सुद करुक सकेदे कि तुमी जीवता महापरभु चो सेवा-सासन करुक सका। कसनबलले हुन आपने के जुग-जुग चो आत्मा बाटले महापरभु चो पुरे काई दोख नोहलो चेगालो।
15 हागदिलो लोग महापरभु चो बचन चो हिसाब ने जुग-जुग चो हक पावतो काजे, किरिस्त नवा बायदा चो मंजी होलो कि किरिस्त चो मोरना बाटले, जुना बायदा समया चो पापमन ले हुनमन मुक्ति पाओत।
16 कसनबलले ए बायदा बाटा-रोटी असन आय, जोन बायदा करलोसे, हुन बायदा-करु बीता चो मोरना चो गवा होतोर ची आय।
17 कसनबलले असन बायदा, बायदा-करु बीता मोरलोने ची सत होउआय; आउर जिदलदांय ले बायदा-करु बीता जीव रयदे, हुदलदांय ले हुन बायदा फोकाहा आय।
18 एईकाजे पईल बायदा बले लोउ नोहलोर नी करला।
19 कसनबलले जेबे मोसा सपाय लोगमन के नियम चो सपाय हुकुम सुनालो, तेबे हुन बाछामन आउर बोकड़ामन चो लोउ धरुन, पानी आउर लाल ऊन आउर जुफा* संगे कितापमन आउर सपाय लोगमन उपरे छीचलो।
लोउ छीचतो जुफा बुटा चो खंदी (9:19)
20 आउर बललो, “ए हुन बायदा चो लोउ आय, जेचो हुकुम के मानतो काजे महापरभु तुमके दिलोसे।”
21 आउर असनी नीती ले हुन तम्बु आउर सेवा चो सपाय जिनीस उपरे लोउ छीचलो।
22 ए सते आय कि नियम-कानुन चो हिसाब ने: सपाय जिनीस के लोउ ले ची सुद करेसोत, आउर लोउ नी थिपालोर पापमन चो खेमा नी होए।
किरिस्त चो लोउ बाटले पाप चो खेमा
23 एईकाजे होतोर चे आय कि सरगपुर चो जिनीसमन चो घटन जतरामन बाटले सुद करसोत, मानतर सरगपुर चो असली जिनीसमन एचोले खुबे नंगत जतरा बाटले सुद होयसोत।
24 कसनबलले किरिस्त हुन मनुक चो बनालोर पवितर ठान ने, जोन सते पवितर ठान चो घटन आय, हुता नी ओललो, मानतर सरग ने ची ओललो, कि एदांय महापरभु चो पुरे आमचो काजे दखा देओ।
25 बड़े पुजारी रोजे बरक गोटोक हार जनावर चो लोउ धरुन पवितर ले पवितर ठान ने ओलुन सेवा-सासन करुआत, मानतर किरिस्त आपने के घन-घन जतरा नी चेगालो।†
26 असन होलोने संवसार चो मूर ले धरुन हुनके घन-घन दुख उठाउक पड़ती; मानतर एदांय हुन जुग चो सरासरी ने अमदेया काजे गोटकी हार दखा दिलो, कसनबलले खुदे जतरा होउन पाप के गुचाउन देओ।
27 आउर जसन मनुकमन काजे गोटकी हार मोरतोर आउर हुनचो पाछे नियाव होतोर ची आय,
28 उसनेची किरिस्त बले लोगमन चो पाप के बोउन, जुग-जुग काजे जतरा होउन गोटकी हार ने पुरा करलोसे; आउर दुसर हार पाप बोओतो काजे नाई, मानतर जोन लोग हुनचो बाट दखसोत, हुनमन के सरग ने नेतो काजे दखा देयदे।