जीसु आमचो बड़े पुजारी
8
एदांय जोन गोटमन आमी बलुंसे, हुनचो ले बड़े गोट ए आय, आमचो असन बड़े पुजारी आसे, जोन सरग ने महापरभु चो राजगादी चो उजा बाटे मयमा-मान चो ठान ने जाउन बसलोसे,
2 आउर हुन, सत तम्बु आउर पवितर ले पवितर ठान ने सेवा करु होलो जेके बनाउ कोनी मनुक नोआय, मानतर महापरभु आय।
3 कसनबलले सपाय बड़े पुजारी के भेंट आउर जतरा चेगातो काजे बनाउआत, एईकाजे ए पुजारी लगे बले काई चेगातो काजे होतोर ची आय।
4 हुन, मंजपुर ने रलोने केबई पुजारी नी बनतो, कसनबलले मोसा चो नियम-कानुन बाटले भेंट चेगातो बीतामन आसोत।
5 हुनमन सरगपुर चो तीजमन चो रंग-रूप आउर छांय चो सेवा करसोत; जसन जेबे मोसा तम्बु बनातो काजे होते रलो, तेबे हुनके तिकारलो, “दख, जोन घटन तुके डोंगरी ने दखाउन रले, उसनेचे सपाय बानी के बनाव।”†
6 मानतर हुन पुजारीमन ले, नंगत सेवा-बुता जीसु के मिरली कसनबलले हुन, आउर बले नंगत बायदामन चो मंजी होलो, जोन खुबे नंगत बायदा ले बनलीसे।
7 कसनबलले हुन पईल बायदा दोख नोहलो होलोने, फेर दुसर बायदा के नी डगराता।
8 मानतर हुन, हुनमन के बदी देउन बलेसे,
“परभु बलेसे, दखा, हुन दिनमन एयसे,
जेबे मय इसराएल चो कुटुम संगे,
आउर जहूदा चो कुटुम संगे नवा बायदा करेंदे।
9 ए बायदा, हुन बायदा असन नी होयदे, जोन मय हुनमन चो पुरखा-पाटीमन संगे हुदलीदांय करुन रले।
जेबे मय हुनमन चो हाथ धरुन मिसर देस ले निकराउन आनले।
कसनबलले परभु बलेसे, हुनमन मोचो बायदा के नी मानला,
आउर एई किरता मय हुनमन के मुरे सूरता नी करले।
10 महापरभु आउर बलेसे, जोन बायदा मय इसराएल चो कुटुम संगे पाछे चो दिनमन ने करेंदे,
ए असन आय कि
मय आपलो नियम-कानुन हुनमन चो मने भरेंदे,
आउर हुनके हुनमन चो बुद ने लिखेंदे,
मय हुनमन चो महापरभु रयंदे
आउर हुनमन मोचो लोग होदे।
11 आउर नानी ले धरुन बड़े सपाय मोके जानदे।
एईकाजे तुमीमन ले सपाय, आपलो देस चो लोग के आउर आपलो भाई के असन नी सिखादे कि तुय परभु के चिताव।
12 कसनबलले मय हुनमन चो
ओधरम के खेमा करेंदे, आउर हुनमन चो पापमन के केबई सूरता नी करेंदे।”†
13 महापरभु नवा बायदा के बनालोके, हुन पईल बायदा के जुना ठेबालो; आउर जोन तीज जुना आउर नसु रउआय हुनचो मेटतोर ची आय।