मलकिसिदक पुजारी
7
मलकिसिदक सालेम चो राजा, आउर सबुले बड़े महापरभु चो पुजारी रलो। अबराहम, राजामन के लड़ई ने मारुन भाति बोहड़तो बेरा, मलकिसिदक हुनके भेटुन बर दिलो।
2 हुनकेई अबराहम सपाय जिनीसमन चो दसवां बाटा दिलो। मलकिसिदक चो अरथ “धरम चो राजा” आय, आउर “सालेम चो राजा” बललोने “अस्तिर चो राजा” आय।
3 जेचो आया-बुआ आउर पुरखा-पाटीमन बले नीआत, जेचो जनम-मरन के जानलोर नीआय; मानतर महापरभु चो बेटा असन मलकिसिदक, अमदेया काजे पुजारी बनुन रउआय।†
दसवां बाटा
4 एदांय दखा, मलकिसिदक कसन खुबे मान बीता रलो, एईकाजे आमचो पुरखा अबराहम लड़ई ने जीतुन झीकलोर नंगत ले नंगत धन-माल चो दसवां बाटा हुनके दिलो।
5 लेवी चो बेटामन ले जोन पुजारी चो पन पावलासोत, हुनमन के मोसा चो नियम-कानुन बाटले दसवां बाटा धरतो चो हुकुम मिरलीसे, बललोने आपलो भाईमन ले, जोनमन अबराहम चो बंस ले जनमलासोत।
6 मानतर मलकिसिदक, जोन लेवी बंस चो बले नी रलो अबराहम ले दसवां बाटा धरलो। मलकिसिदक हुनके बर दिलो जेके महापरभु बाटले बायदा मिरुन रली।
7 आमी जानुंसे कि नानी, बड़े ले बर पायसे।
8 एता, लेवी बंस चो पुजारीमन मोरतो लोगमन होउन बले दसवां बाटा धरसोत, मानतर मलकिसिदक हुनमन ले बड़े आय, जेचो गवई आसे कि हुन जीव आसे।
9 लेवीमन, लोगमन ले दसवां बाटा धरसोत। आमी असन बले बलुक सकुं कि जेबे अबराहम मलकिसिदक के दसवां बाटा दिलो, तेबे लेवीमन बले अबराहम बाटले दसवां बाटा दिला।
10 कसनबलले जिदलदांय मलकिसिदक अबराहम के भेटलो, हुदलदांय लेवीमन, हुनमन चो पुरखा अबराहम चो लोउ ने रला, बललोने जनमुन नी रला।
मलकिसिदक असन दुसर पुजारी
11 लेवीमन पुजारी पन बाटले सिद होउक सकुआत जाले फेर काय काजे मलकिसिदक असन दुसर पुजारी लागुआय, आउर हुन हारुन* चो नीती चो नी बलाय होए? (मोसा बाटले मिरलो नियम-कानुनमन ले लोगमन सिद होउक नी सकला आउर हुनचेई बाटले लेवीमन के पुजारी पन मिरुन रली)
12 कसनबलले पुजारी पन बदललोने नियम-कानुनमन बले बदलु ची आय।
13 आमचो परभु जीसु चो बारे ने असन गोटेयालासोत कि हुन दुसर बंस चो आय, जोनमन ले कोनी बले पुजारी बनुन बेदी चो सेवा-बुता नी करलासे,
14 आमी नंगत ले जानुंसे कि आमचो परभु, जहूदा बंस ले जनमलोसे, आउर ए बंस चो पुजारी पन काजे मोसा काई गोट-बात नी करलो।
नियम-कानुनमन चो मेटतोर
15 आमचो गोट ले ए पक्का जानुक होयसे, मलकिसिदक असन दुसर गोटोक पुजारी दखा देयदे,
16 परभु जीसु, पुरखा-पाटी चो नियम हिसाब ने नाई, मानतर अमर जीव रतो सकत हिसाब ने पुजारी बनलोसे।
17 कसनबलले हुनचो बारे ने असन गवई दिलासे,
“तुय मलकिसिदक असन
जुग-जुग चो पुजारी आस”।†
18 एचई असन, पुजारी पन चो पईल हुकुम निमल आउर काई काम चो नी रलो किरता मेटुन गेली।
19 एईकाजे कि मोसा चो नियम ले कोनी सिद नी होला, मानतर एबे हुनचो पलटा ने महापरभु गोटोक असन खुबे नंगत आसा चो बाट दखालोसे जेचोले आमी महापरभु लगे जाउक सकुंसे।
पक्का किरिया
20 आउर लेवीमन के तो किरिया नोहलो पुजारी बनाला,
21 मानतर जीसु, किरिया बाटले पुजारी होलो, जेचो बारे ने बललोसे,
“महापरभु किरिया खादलो,
आउर हुन नी पसताये कि
तुय जुग-जुग चो पुजारी आस”।†
22 कसनबलले महापरभु चो किरिया बाटले जीसु खुबे नंगत बायदा चो जुमे होलो।*
अमदेया चो पुजारी पन
23 आगे जुगे खुबे लोग पुजारी बनते रला, कसनबलले मोरना हुनमन के रउक नी देते रये;
24 मानतर जीसु जुग-जुग ले रतो किरता हुनचो पुजारी पन बले जुग-जुग काजे आय।
25 एईकाजे जोन बले हुनचो बाटले महापरभु लगे एउआत, हुन, हुनमन के समपुरन मुक्ति देउक सके। कसनबलले हुन, हुनमन काजे गुहारतो काजे अमदेया जीव आसे।
26 असन बड़े पुजारी आमके होतोर आय जोन पवितर, आउर कपट नोहलो, आउर सुद-मन, आउर पापीमन ले अलग, आउर जेचो मान सरग ले बले आगर आसे।
27 आउर हुनके दुसर बड़े पुजारीमन असन चिपा नीआय कि रोजे दिने आगे आपलो पापमन काजे आउर फेर लोगमन चो पापमन काजे जतरा चेगाओ; कसनबलले हुन आपने जतरा होउन अमदेया काजे गोटकी चे हार ने पुरा करलोसे।
28 कसनबलले मोसा चो नियम-कानुन तो, निमल मनुकमन के बड़े पुजारी बनायसे, मानतर हुन किरिया खादलो गोट, जोन महापरभु नियम-कानुनमन चो पाछे करुन रलो, हुन महापरभु चो बेटा के जुग-जुग काजे सिद पुजारी बनाली।