6
एईकाजे इआ, किरिस्त चो सिखियामन चो मूर गोट के छांडुन आमी सिद होते जाउं। जसन कि पाप बुतामन ले मन बोहड़ाउन महापरभु के पतेयातोर,
2 आउर बरन-बरन चो बपतिस्मा देतोर आउर हाथ थापुन बर देतोर, आउर मोरलोमन ले जीव उठतोर, आउर सरासरी नियाव, असन मूर सिखियामन के फेर ले नी सिखाते रउं।
3 महापरभु मन करेसे जाले आमी सिद होते जाउंदे।
4 महापरभु चो बिसवास के कोनी बले छांडला जाले, हुनमन चो मन के बोहड़ातोर आउर फेर नवा बनातोर होउक चे नी सके। कसनबलले हुनमन गोटोक हार उजर पावलासे, आउर सरगपुर चो बर चो सुवाद चाकलासे आउर पवितर आत्मा चो बाटा पावलासे,
5 आउर महापरभु चो नंगत बचन आउर एतो जुग चो सकत के जानलासे,
6 फेर बले हुनमन बिसवास के छांडला जाले हुनमन महापरभु चो बेटा के फेर कुरूस ने चेगायसोत आउर सपाय चो पुरे हुनके बदी देयसोत।
कुरूस ने चेगालो जीसु (6:6)
7 जोन भुंय, चमास चो घन-घन घसरतो पानी के सोकुन-सोकुन, जोनमन भुंय के जोपसोत आउर पेरसोत हुनमन काजे साग-पान अखरायसे, हुन भुंय महापरभु ले बर पायसे।
8 मानतर हुन भुंय काटा-बुटामन अखरायसे जाले, काई काम चो नोआय आउर सराप बले पाउक सकेदे, आउर हुनचो सरासरी डसातोर आय।
9 ए मोचो मीतमन, आमी असन गोटमन बलुंसे, तेबले बले तुमचो बारे ने आमी मुक्ति पावलो लोगमन असन नंगत बुता करतो चो भोरसा करुंसे।
10 कसनबलले महापरभु ओधरमी नोआय, हुन तुमचो बुता आउर मया के नी भूलके, जोन तुमी हुनचो नाव काजे करलास, आउर हुनचो पवितर लोगमन चो सेवा करलास आउर एबे बले करसास।
11 मानतर आमी खुबे मन करुंसे कि तुमी सपाय लोगमन आपलो आसा पुरा होतो काजे सरासरीदांय ले मसागत करते राहा।
12 कसनबलले तुमी ठगरा नी होआ; मानतर हुनमन चो असन करा जोन बिसवास आउर धीरजा ले महापरभु चो बायदा चो हकदार होयसोत।
महापरभु चो नी बदलतो बायदा
13 महापरभु, अबराहम के बायदा करतोदांय किरिया खातो काजे आपलो ले बड़े कोकई नी पावलो किरता आपलेची किरिया खाउन बललो,
14 “मय सत्ते तुके खुबे बर देयंदे, आउर तुचो बंस के बड़ाते जायंदे।”†
15 आउर ए नीती ने हुन धीरजा धरुन बायदा करलो गोट के पावलो।
16 लोगमन तो आपलो ले कोनी बड़े चो नाव ने किरिया खाउआत, आउर सपाय झगड़ा हुन किरिया ले बुतुआय।
17 एईकाजे जेबे महापरभु, बायदा चो हकदारमन के समजातो काजे मन करलो कि हुनचो मन बदलुक नी सके, तेबे किरिया के मंजारे आनलो।
18 कसनबलले दुयठन नी बदलतो गोटमन - हुनचो बायदा आउर हुनचो किरिया, जेचोले महापरभु, केबई फंदी होउक चे नी सके, एईकाजे आमी जोन महापरभु चो सरन ने ईलुसे, हुन आसा के जोन पुरे संगालोर आसे पावतो काजे चमकट ले ढाढ़ुस बांधुन रउं।
19 हुन आसा आमचो जीव काजे बिल्लईकल* असन चमकट धरु रउआय, आउर आमके मंदिर चो पड़दा भीतरे अमराउआय,
20 जोन थाने जीसु, मलकिसिदक चो नीती ने जुग-जुग काजे बड़े पुजारी बनुन, आमके बाट दखातो बीता होउन ओललोसे।