5
सपाय बड़े पुजारी के मनुकमन ले ची बाछुआत। हुनमन के महापरभु ले मनुकमन चो नाता संगातो काजे आउर बोदना चेगातो आउर पाप चो जतरा करतो काजे बाछुआत।
बड़े पुजारी चो पींदा-वाड़ा (5:1)
2 हुन आपने बले आपलो निमलमन ले घेरी होलोसे, एईकाजे हुन भुलकलो-भटकलो आउर महापरभु के नी जानलो लोगमन संगे सुसारे बेबार करुआय।
3 एईकाजे हुन, जसन लोगमन काजे चेगाउआय असने चे आपलो काजे बले पाप चो जतरा करो।
4 ए मान चो पन कोनी आपने नी पाए, जिदलदांय ले महापरभु, हारुन* के बाछलो असन नी बाछे।
5 असने ची किरिस्त बले बड़े पुजारी चो मयमा चो पन आपने नी धरलो, मानतर हुनके महापरभु दिलो, जोन हुनके बलु रये,
“तुय मोचो बेटा आस,
आजी मय ची तुके जनमाले।”†
6 एचई असन बचन, दुसर थाने बले बललोसे,
“तुय मलकिसिदक चो नीती ने
जुग-जुग काजे पुजारी आस।”†
7 जीसु, मंजपुर ने रलो दिनमन ने जोर ले किरकिरुन-किरकिरुन आउर आंसू बोहाउन-बोहाउन जोन हुनके मोरना थान ले बचाउक सकते रलो, हुनके पारथना आउर गुहार करलो, आउर भक्ति चो किरता हुनचो गुहार के सुनलो।
8 बेटा होउन बले हुन, डंड पाउन-पाउन हुकुम मानुक सीखलो,
9 आउर सिद बनुन, आपलो सपाय हुकुम मानतो लोगमन काजे जुग-जुग चो मुक्ति देउ होलो,
10 आउर हुनके महापरभु बाटले मलकिसिदक चो नीती ने बड़े पुजारी चो पन मिरली।
नी पतेयातो लोग चो भुगततोर
11 एई गोट चो बारे ने आमके खुबे गोटमन सांगतोर आसे। मानतर तुमी समजुक मन नी करसास, एईकाजे तुमके समजातो ने खट-खट होयसे
12 समया चो हिसाब ने तुमी तो गुरु होतोर रली, तेबले बले एबे असने आय कि कोनी तुमके महापरभु चो बचन चो मूर सिखिया के फेर सिखातोर आय। तुमी असन होलासाहास कि तुमके साग-भात चो पलटा गोरस चे होतोर आय।†
13 गोरस पीवतो पिला नंगत-अडरा गोट के नी जाने, कसनबलले हुन पिला आय।
14 मानतर साग-भात सियानमन काजे आय, जोनमन चो बुद घन-घन जाचुन-परखुन नंगत आउर अडरा के नंगत ले जानुआय।