महापरभु चो लोगमन बिसातोर
4
मानतर आमचो काजे हुनचो बिसातो थाने ओलतो बायदा एबले आसे, एईकाजे आमके डरुक लागेदे, असन नी होओ कि तुमीमन ले कोनी हुनचो बिसातो थाने ओलुक नी सका।
2 कसनबलले जोन लोगमन मिसर देस ले मोसा बाटले निकरला, हुनीमन असन आमके बले नंगत खबर सुनालासे, मानतर सुनलो गोट ले हुनमन के काई नफा नी होली; कसनबलले सुनलो लोगमन नी पतेयाला।*†
3 मानतर आमीमन जोन, महापरभु के पतेयाउंसे, हुनचो बिसातो थाने ओलुक सकुं; जसन महापरभु संवसार बनातो मूर बेरा ले आपलो बिसातो ठान निबड़ाउन हुनमन चो बाट दखते रलो, तेबले बले हुन नी पतेयातो लोगमन काजे बललो:
“मय रीस ने किरिया खादले कि
हुनमन मोचो बिसातो थाने नी ओलुक सकदे।”†
4 कसनबलले सातवां दिन चो बारे ने असन बललोर आसे, “महापरभु आपलो सपाय बुतामन के सारुन सातवां दिने† बिसालो।”
5 मानतर महापरभु पाछे बललो, “हुनमन मोचो बिसातो थाने नी ओलुक सकदे।”
6 महापरभु चो किरिया खादलो गोट बरसक आसे, तेबले बले लोगमन बिसातो थाने ओलते रला। मानतर जोनमन आगे ले हुनचो नंगत खबर सुनुन रला, हुनमन हुकुम नी मानतो किरता हुन थाने ओलुक नी सकला।
7 एईकाजे फेर महापरभु कोनी खास दिन के “आजी चो दिन” ठेबालो, जसन खुबे दिन चो पाछे दाउद राजा चो किताप ने लिखलोर आसे,
“आजी तुमी महापरभु चो गोट के सुनलास जाले,
आपलो मन के कटुर नी करा।” †
8 (मोसा चो पाछे जहोसू लोगमन के कनान देस अमरालो) मानतर जहोसू, हुनमन के बिसातो थाने ओलियातो जाले, फेर “आजी चो दिन” चो गोट-बात महापरभु नी करतो।
9 एचोले तुमी जाना कि महापरभु चो लोगमन काजे बिसातो दिन बाचलीसे;
10 कसनबलले जोन बले हुनचो बिसातो थाने ओललोसे, हुन बले महापरभु चो असन आपलो बुतामन के सारुन बिसालोसे।
11 एईकाजे आमी हुन बिसातो थाने ओलतो काजे मसागत करुं, आउर असन नी होओ कि कोनी मनुक इसराएलिमन असन हुकुम नी मानुन महापरभु ले लापी होउन जाओत।
12 कसनबलले महापरभु चो बचन जीवता, तीरतिरा आउर सपाय दुय-धारी खांडा ले बले आगर लागन आय; आउर हुनचो बचन जीव आउर आत्मा के, गठ-गठ आउर गुदा-गुदा के, अलगे करुन मन चो भावतो के आउर बिचारमन के जाचुन दखाउ आय।
13 आउर तीनपुर चो कोनी तीज हुनचो ले नी लुकलीसे जेचोले आमचो बुता आसे, हुनचो पुरे सपाय तीज उगाड़ा आउर दखा देयसे।
आमचो बड़े पुजारी
14 आमचो बड़े पुजारी, महापरभु चो बेटा जीसु बादरीमन बाटले होउन गेलोसे, एईकाजे इआ, आमी हुनके पतेयातोने बरसक थामुन रउं।
15 आमचो बड़े पुजारी आमचो निमल बेरा ने आमके जीव दुखुआय; कसनबलले हुनके बले सपाय गोटमन ने आमचो असन परखला, तेबले बले हुनचो ले काई पाप नी होली।
16 एईकाजे इआ, महापरभु चो दया मिरतो गादी लगे ढाढ़ुस ले जाउं कि आमचो उपरे दया होओ, जेचोले आमी बर पाउं आउर आमचो चिपा बेरा आमके साका होओ।