जीसु, मोसा ले बले बड़े आय
3
ए पवितर भाईमन, तुमी बले महापरभु चो हागदिलो लोगमन आहास, एईकाजे तुमी, जीसु जोन पठालो-लोग आउर बड़े पुजारी आय, जेके आमी मानुंसे, हुनके धियान करा।
2 जीसु खुद के बाछलो बीता काजे पतेयातो लाईक रलो, जसन मोसा बले महापरभु चो घर-भर ने पतेयातो लाईक रलो।
3 मानतर जीसु, मोसा ले आगर मयमा पावतो लाईक आय, जसन कि घर बनाउ बीता घर ले आगर मान पायसे।
4 कसनबलले गोटोक-गोटोक घर के बनाउ बीता कोनी-कोनी होउ आत, मानतर जोन जमाय के बनालो हुन महापरभु आय।
5 मोसा तो महापरभु चो घर-भर ने पतेयातो लाईक कमेया रलो कि हुन, जोन अगमगोट गोटेयातोर रली, हुनमन चो गवई देओ।
6 मानतर किरिस्त, बेटा असन महापरभु घर चो मुखिया आय; आउर आमी धीरजा धरुन आउर आसा चो गुमान ने सरासरी ले बरसक रलोने, आमी हुनचो घर आंव।
नी पतेयातो लोग के चेतानी
7 एईकाजे जसन पवितर आत्मा बलेसे:
“आजी तुमी महापरभु चो गोट के सुनलास जाले,
8 आपलो मन के कटुर नी करा,
जसन कि तुमचो पुरखा-पाटीमन गोट नी धरुन रीस चेगातो बेरा
आउर परखतो दिने राने करुन रला।
9 जोन थाने तुमचो पुरखा-पाटीमन मोके जाचुन-परखुन
चालीस बरक ले मोचो बुतामन के दखला।
10 एईकाजे मय हुदलदांय चो लोगमन ले
रीस ने रले, आउर बलले,
‘एमन चो मन रोजे इसु-हेंव होते रउआय,
आउर एमन मोचो बाटमन के नी चिताला।’
11 तेबे मय रीस होउन किरिया खादले,
‘हुनमन मोचो बिसातो थाने ओलुक नी सकदे’।”†
12 ए भाईमन, चेत ने राहा कि तुमीमन ले कोकई, असन अडरा आउर नी पतेयातो मन नी होओ, जोन तुमके हुन जीवता महापरभु ले गुचाउन लापी नेयदे।
13 तुमीमन ले कोनी मनुक पाप चो छंद ने फसुन मन के कटुर नी करा, एईकाजे जोन दिनमन ले आजी चो दिन बलसोत, रोजे दिने गोटोक-दुसर के उकसाते राहा।
14 कसनबलले आमी आपलो पईल भोरसा ने सरासरीदांय ले चमकट रलु जाले आमी बले किरिस्त करलो बुता चो बाटा पावां।
15 धरमसास्तर असन बलेसे,
“आजी तुमी महापरभु चो राग सुनलास जाले,
आपलो मन के कटुर नी करा,
जसन तुमचो पुरखा-पाटीमन
महापरभु के रीस चेगातोदांय करुन रला।”†
16 कोन लोगमन आत सुनुन बले रीस चेगाला? हुन सपाय लोग आत, जोन मोसा बाटले मिसर देस* ले निकरला।
17 आउर हुन चालीस बरक ले कोन लोगमन ले रीस धरुन रलो? हुन लोगमन ले आय जोन पाप करुन रला, आउर हुनमन चो मोड़ीमन राने पड़ुन रली।
18 आउर हुन कोचो ले किरिया खादलो कि तुमीमन मोचो बिसातो थाने ओलुक नी सकासे़? हुनी लोगमन ले आय जोनमन हुकुम के नी मानला।
19 असन ने आमी दखुंसे कि हुनमन नी पतेयातो किरता ओलुक नी सकला।