बड़े भारी मुक्ति
2
एईकाजे असन होतोर आय कि जोन सत-गोटमन के आमी जीसु चो बारे ने सुनलुसे, हुन थाने खुबे मन लगाउं, आउर असन नी होओ कि आमी चरकुन हुनचो ले लापी जाउं।
2 कसनबलले जोन गोट सरगदूतमन बाटले पुरखामन के सांगुन रलो, हुन गोट चमकट रली आउर सपाय पाप आउर हुकुम नी मानतो किरता हुतली ची डंड मिरली।
3 तेबे आमीमन असन बड़े भारी मुक्ति चो फिकिर नी करलु जाले कसन बाचुक सकवां? जेचो गोट-बात आगे जुगे परभु जीसु बाटले होली, आउर सुनतो लोगमन बाटले आमके ए गोट पक्का होली।
4 आउर एचई संगे महापरभु बले आपलो मन भावलो असन चीनामन, आउर अचरित बुतामन, आउर बरन-बरन चो सकत बुतामन, आउर पवितर आत्मा चो बरमन के बाटतो बाटले एचो गवई देते रलो। एईकाजे आमी सुनलो सत-गोटमन ने खुबे मन लगाउं, आउर असन नी होओ कि आमी चरकुन हुनचो ले लापी जाउं।
आमके मुक्ति देउ
5 हुन एतो बिती संवसार, जेचो गोट-बात आमी करुंसे महापरभु, सरगदूतमन चो हक ने नी सोपलो (मानतर जीसु चो हक ने सोपलो)।
6 आउर धरमसास्तर ने कोनी महापरभु के असन बललोसे:
“मनुक काय आय
कि तुय हुनचो सूरता करसीस?
आउर निमल मनुक चो बेटा, काय आय
कि तुय हुनचो फिकिर करसीस?
7 तुय तो हुनके सरगदूतमन ले
डंडिक काजे नानी बनालीस;
मानतर तुय हुनचो उपरे
मयमा आउर मान चो मुकुट संगालीस,
आउर तुय आपलो सपाय के
हुनके सोपुन दिलीस।
8 आउर तुय आपलो सपाय चो
उपरे हुनके हक दिलीस।”†
जेबे हुन सपाय के हुनचो हक ने करुन दिलो, तेबे हुन काई चे नी छांडलो जोन हुनचो हक ने नी रली। मानतर आमी एदांय सपाय के मनुक चो हक ने नी दखुंसे।
9 मानतर एबे जीसु के डंडिक काजे सरगदूतमन ले खिंडिक असन नानी बनालोर दखुंसे, कसनबलले महापरभु चो दया ले हुन सपाय मनुक काजे मोरना चो सुवाद चाको, आउर जीसु मोरना चो दुख पावलो किरता मयमा आउर मान चो मुकुट पींदलो,
10 कसनबलले महापरभु, जेचो काजे आउर जेचो बाटले सपाय आय, हुनके ए नंगत लागली कि खुबे बेटामन के मयमा ने अमरातो काजे, मुक्ति करु जीसु दुख पाउन सिद होओ।
11 पवितर करु जीसु आउर जोनमन पवितर होयसोत, सपाय गोटकी बाप चो आत; एईकाजे हुन, हुनमन के भाई बलतो काजे लाज नी होए।
12 जीसु बलेसे,
“मय तुचो नाव मोचो भाई-बंधमन के सुनायंदे;
आउर मंडलीमन ने मय तुचो भजन गीत गायंदे।”
13 आउर फेर बलेसे,
“मय हुनचो उपरे भोरसा करेंदे।”†
आउर फेर असन बलेसे,
“दख, मय हुन पिलामन संगे
जेके महापरभु मोके दिलो।”†
14 एईकाजे जेबे महापरभु चो पिलामन मास आउर लोउ चो बनलासे, तेबे जीसु बले हुनमन चो असन बनलो, कसनबलले जीसु आपलो मोरना बाटले हुन सयतान के जीतो, जेके लोगमन के महापरभु ले लापी नेतोर सकत आसे, बललोने सयतान के हराओ;
15 आउर जितरो लोगमन मोरना चो डर किरता जीवता जीव भर फसुन रला, हुनमन के छंडाओ।
16 जीसु, सरगदूतमन के नाई, मानतर अबराहम चो बंस के साका होउक ईलोसे।
17 एईकाजे हुनके असन होतोर रली कि सपाय गोटमन ने आपलो भाईमन असन बनो कि हुन, महापरभु ले नाता संगातो सपाय गोटमन ले, गोटोक जीव दुखतो आउर पतेयातोर लाईक चो बड़े पुजारी बनो। कसनबलले हुन लोगमन चो पापमन काजे जतरा चेगाय होउक सको
18 परखतो बेरा जीसु दुख पावलो, एईकाजे हुन, हुनमन चो बले साका होउक सके जेके परखसोत।