इबरानी 1

इबरानीमन

काजे चिटी

महापरभु चो गोट बेटा बाटले

आगे जुगे महापरभु आमचो पुरखा-पाटीमन संगे खिंडिक-खिंडिक आउर बरन-बरन चो गोटमन के अगमजानीमन बाटले गोटेयाउन रये,

2 मानतर सरासरी दिनमन ने, महापरभु आमके बेटा बाटले गोटेयालो, जेके हुन, सपाय जिनीसमन उपरे हकदार बनालो आउर हुनचेई बाटले संवसार के बनालो।

3 महापरभु चो बेटा जीसु, हुनचो मयमा चो उजर आउर हुनचो असली रूप आय, आउर सपाय जिनीसमन के आपलो बचन चो सकत ले समालेसे। हुन आमचो पापमन के सुद करुन सरगपुर ने महापरभु चो उजा बाटे बसलोसे;

4 ए दखायसे कि महापरभु चो बेटा जीसु, सरगदूतमन ले खुबे बड़े आय, कसनबलले महापरभु हुनके सरगदूतमन चो पन ले खुबे बड़े पन दिलो।

जीसु, सरगदूतमन ले बड़े आय

5 कसनबलले महापरभु केबई कोनी सरगदूतमन के नी बललो,

“तुय मोचो बेटा आस,

आजी तुय मोचो ले जनमलिसीस।” ^†

फेर हुन बललो,

“मय हुनचो बुआ होयंदे,

आउर हुन मोचो बेटा होयदे।”^†

6 आउर जिदलदांय महापरभु, पईलात बेटा^* के संवसार ने आनेसे, तेबे बलेसे,

“महापरभु चो सपाय सरगदूतमन हुनके डंडासरन करोत।”

7 सरगदूतमन चो बारे ने महापरभु असन बलेसे,

“हुन आपलो दूतमन के लेहरा,

आउर कमेयामन के ढग-ढकतो आईग असन बनायसे।”^†

8 मानतर बेटा चो बारे ने बलेसे,

“ए महापरभु, तुचो राजगादी जुग-जुग रयदे:

तुय धरम ले नियाव करसे।

9 तुय तो धरम के मया आउर ओधरम के बईर करुआस;

एईकाजे ए महापरभु, तुचो महापरभु,

तुचो मुंडे हरिक चो तेल रिकाउन

तुके, तुचो संगवारीमन ले बड़े बनालो।”^†

10 फेर बलेसे,

“ए परभु, तुय तो मूर ने भुंय चो पाया बनालीस,

आउर सरग तुचो हाथ चो बनालोर आय।

11 हुनमन तो नास होउन जादे, मानतर तुय रसे चे;

आउर हुनमन फटई असन जुना होदे,

12 आउर तुय हुनके कामरा असन गुंडियासे,

आउर हुनमन जुना फटई असन पलटुन जादे:

मानतर तुय तो केबई नी पलटुआस

आउर तुय जुग-जुग रसे।”^†

13 हुन सरगदूतमन ले कोकई केबई नी बललो,

“मय तुचो बयरीमन के तुचो पांय खाले करुन देओतले

तुय मोचो उजा बाटे बस?”^†

ए दखायसे कि जीसु, सरगदूतमन ले खुबे बड़े आय।

14 काय, ए सपाय सरगदूतमन सेवा-सुस्‍तारा करतो आत्‍मामन नोआत, जोनमन के महापरभु, मुक्‍ति पावतो लोगमन चो सेवा करतो काजे पठायसे?