महापरभु के हरिक करतो जीवना
4
ए भाईमन, आमी तुमके परभु जीसु ने समजाउंसे आउर गुहारुंसे, जसन तुमी आमचो ले नंगत चलनी-बुलनी आउर महापरभु के हरिक करुक सीखलासाहास, उसने तुमी चलेसाहास बले, असने ची तुमी नंगत चलनी-बुलनी ने बाड़ते जाहा।
2 तुमी जानेसाहास, परभु जीसु बाटले आमी तुमके काय-काय हुकुम दिलुसे,
3 कसनबलले महापरभु मन करेसे कि तुमी पवितर होआ, बललोने बेबिचार ले बाचुन राहा,
4 आउर तुमी सपाय पवितर आउर इजित-मान ले आपने के* समालुक जाना,
5 आउर ए बले अडरा मन-इछा ले नाई, जसन महापरभु के नी जानतो बिजातीमन करुआत।
6 ए गोट ने कोनी आपलो भाई के नी ठगो आउर काई दांव बले नी टाको कसनबलले परभु ए सपाय गोटमन चो पलटा धरुआय जसन आगे ची आमी तुमके सांगुन-तिकारुन रलु।
7 कसनबलले महापरभु आमके असुद होतो काजे नाई, मानतर पवितर होतो काजे हागदिलोसे।
8 एई किरता जोन ए गोट के हेला पतेयायसे हुन मनुक के नाई, मानतर महापरभु के हेला पतेयायसे, जोन आपलो पवितर आत्मा तुमके देयसे।
9 मानतर दादा-भाई चो मया चो बारे ने तुमके लिखुक नी लागे, कसनबलले गोटोक-दुसर ले मया करतोर खुदे तुमी महापरभु ले सीखलासाहास,
10 आउर मकिदुनिया राज चो सबु किरिस्त भाईमन के असनी मया करसास बले, मानतर ए भाईमन, आमी तुमके समजाउंसे, मया करतोने आउर बाड़ते जाहा।
11 आउर जसन आमी तुमके हुकुम दिलुसे उसनेची ओगाय रउन आपलो-आपलो बुता-भयना करते राहा आउर आपलाहान कमानी के खाहा।
12 तेबे तुमी मंडली-बाहरेया लोगमन ले मान पाहासे आउर तुमके काई जिनीस चो घटी नी होए।
जीसु चो फेर-एतोर
13 ए भाईमन आमी मन करुंसे कि जोनमन मोरलासोत हुनमन चो बारे ने तुमी नंगत ले जाना, तेबे तुमके आसा नोहलो लोगमन असन फिकिर करुक नी पड़े।
14 कसनबलले जीसु मोरलो आउर जीव उठलो बलुन आमी पतेयाउंसे जाले उसनेची महापरभु, जीसु के पतेयाउन मोरलोमन के बले जीव उठाउन हुनचो संगे आनेदे।
15 कसनबलले परभु चो बचन हिसाब ले आमी तुमके सांगुसे, परभु एओतले आमीमन ले जोन जीव आसुं, केबई मोरलोमन ले आगे हुनचो लगे जाउक नी सकुं।
16 कसनबलले जेबे परभु खुदे सरग ले जय-जय संगे उतरेदे, मुखिया सरगदूत चो राग सुना देयदे आउर महापरभु चो तोड़ी फूकदे, तेबे जोन किरिस्त के पतेयाउन मोरलासोत, हुनमन आगे जीव उठदे।
17 एचो पाछे आमीमन जोन जीव आसुं, आमके हुनमन संगे परभु के भेटतो काजे बादरी ने उठाउन नेयदे आउर असन बरन ले आमी अमदेया सरगपुर ने परभु संगे रवां।
18 एई गोटमन ले गोटोक-दुसर के अस्तिर दियास।