जीसु किरिस्त चो फेर-एतो काजे तियार रतोर
5
ए भाईमन, समया आउर जुग चो बारे ने तुमचो काजे लिखुक नी लागे,
2 कसनबलले तुमी पक्का जानेसाहास, जसन राती चोर एउआय उसनेची परभु चो फेर-एतो दिन खुसनाय एयदे।
3 जिदलदांय लोगमन काई डर-भय नीआय आउर अस्तिर ने आसुं बलते रदे, तेबे जसन पेटेहारिन के दुखा उठु आय, उसने हुनमन उपरे उधापड़े बिपती पड़ेदे आउर हुनमन ले कोनी नी बाचदे।
4 मानतर ए भाईमन तुमी अंधार चो लोग नोआहास, एईकाजे हुन दिन चोर असन तुमचो उपरे नी एये,
5 कसनबलले तुमी सपाय उजर आउर मंजन चो बेटा-बेटी आहास, आउर आमके रात आउर अंधार ले काई नाता नीआय।
6 एईकाजे आमी दुसर लोगमन असन सोवते नी रउं, मानतर चेत ले आपने के लेक करते रउं।
7 कसनबलले सोवतो लोग राती ची सोयसोत आउर मतवारमन बले राती ची पीउन मातसोत,
8 मानतर आमी दिन चो आंव, एईकाजे बिसवास आउर मया चो झिलम, आउर मुक्ति चो आसा चो लोहा-टोप पींदुन लेक ने रउं।
9 कसनबलले आमके महापरभु चो रीस भोगतो काजे नाई, मानतर परभु जीसु किरिस्त बाटले मुक्ति पावतो काजे बाछलोसे,
10 हुन आमचो काजे एईकाजे मोरलो कि आमी सोउं नोहले चेता रउं, सपाय मिसुन हुनचो संगे जीउं।
11 एईकाजे गोटोक-दुसर चो बाड़ती काजे उकसाहा आउर अस्तिर करा, जसन तुमी आगतले करसाहास बले।
मंडली काजे सिखिया
12 ए भाईमन, आमी तुमके गुहारुंसे जोन तुमचो मंजी सेवा-बुता करसोत आउर परभु बाटले तुमचो गुरु आत आउर तुमके सला सिखाउआत, हुनमन चो इजित-मान करा।
13 हुनमन के, तुमचो काजे करतो मसागत किरता, मया ले खुबे इजित-मान करतो लाईक समजा। गोटोक-दुसर संगे मिलुन-मिसुन राहा।
14 ए भाईमन, आमी तुमके सला देउंसे कि जेचो अडरा चलनी-बुलनी आसे, हुनमन के समजाहा, डराहामन के भोरसा दिया, निमलमन के थामा, आउर सपाय संगे धीरजा ने राहा।
15 दखा, कोनी अडरा चो पलटा अडरा नी करा मानतर भलई करतोने अमदेया पुरे राहा। गोटोक-दुसर ले आउर सपाय ले बले भलई करतो काजे डगराहा।
16 अमदेया हरिक ने राहा,
17 सरलगा पारथना करते राहा,
18 तुमचो काजे किरिस्त जीसु ने महापरभु चो एई मन-इछा आय कि तुमी सबु गोट ने धन-धन करा।
19 पवितर आत्मा चो बिरुद नी करा,
20 अगमगोटमन के हेला नी पतेयाहा,
21 सपाय गोटमन के परखा आउर नंगत गोटमन के धरा,
22 सबु बरन चो अडरा बुता ले बाचुन राहा।
बर देतोर
23 अस्तिर देतो महापरभु खुदे तुमके सबु बरन ले पवितर करो कि आमचो परभु जीसु किरिस्त एतोदांय तुमचो आत्मा, जीव आउर देहें, लंग-लंगा आउर दोख नोहलोर दखा देओ।
24 तुमके हागदेउ महापरभु सत आय आउर हुन उसनेची करेदे।
25 ए भाईमन, आमचो काजे पारथना करा।
26 सबु भाईमन के पवितर चूमा ले जुहार करा।
27 मय तुमके परभु चो नाव ने हुकुम देयंसे, ए चिटी के सबु भाईमन के पढ़ुन सुनाहा।
28 आमचो परभु जीसु किरिस्त चो दया तुमचो उपरे होते रओ।