कुलुसी चो मंडली
काजे पठालो-बीता पउलुस चो चिटी
आगे एके पढ़ा
कुलुसी नाव चो चिटी के पउलुस एसिया खंड ने रलो कुलुसी चो मंडली काजे लिखु रये। ए चिटी ने पउलुस मंडली चो मुंडी, जोन किरिस्त आय हुनचो उपरे धियान देतो काजे सांगेसे। ए चिटी चो पईल भाग अध्या 1, 2 ने आत्मिक नीती नियम चो बारे ने आउर दुसर भाग अध्या 3, 4 ने संवसारिक जीवना चो नीती नियम चो बारे ने लिखलोर आसे।
पउलुस ए चिटी ले, एई सांगेसे कि किरिस्त सबुले बड़े आय आउर किरिस्तीमन आपलो जीवना ने, हुनके खुबे मान करतोर आय।
हुनके सतपतेयातो लोगमन हुनचोने जड़ धरुन, हुनचोने बाड़ुन, हुनचोने मोरुन, हुनचोने जीव पड़ुन आउर हुनचोने मिसुन, हुनचोने समपुरन होयसोत। किरिस्तीमन, किरिस्त चो मया ले भोरुन आउर सोज होउन किरिस्त के आपलो जीवना चो सबुले बड़े मानतोर आय।