4
एईकाजे ए मोचो भाईमन, मोचो हरिक आउर मुकुट तुमी आहास, तुमके दखतो काजे जीव उखड़ेसे। ए मोचो मया चो लोग, परभु के पतेयातोने असने ची चमकट राहा।
नंगत चलनी-बुलनी काजे सिखिया
2 मय जहूदिया आउर संतुखे के बले गुहारेंसे कि हुनमन परभु ने गोटकी सोर ने रओत।
3 मोचो सत संगवारी, मय तुके गुहारेंसे कि तुय हुन बायलेमन के साहरा कर, जोन नंगत खबर सुनातो काजे, मोचो आउर कलईमेस आउर मोचो संगी बीतामन संगे बले खुबे मसागत करला, जोनमन चो नाव महापरभु चो, जीव चो किताप* ने लिखलोर आसे।
4 परभु ने अमदेया हरिक राहा, मय फेर बलेंसे, हरिक राहा।
5 तुमचो नंगत चलनी-बुलनी सपाय लोग के दखा देओ। परभु चो फेर एतो बेरा लगे अमरलीसे।
6 काईची गोट काजे फिकिर नी करा, मानतर सपाय गोटमन के पारथना बाटले महापरभु के गुहारा, आउर हुनचो करलो दया काजे धन-धन करा।
7 तेबे महापरभु देतो अस्तिर, जेके कोनी समजुक ची नी सकोत, तुमचो मन आउर बुद के किरिस्त जीसु ने रखेया करेदे।
8 सरासरी ने, ए मोचो भाईमन, जोन-जोन गोटमन सत, मान-लाईक, नंगत, पवितर, सुंदर, मन-भावतो असन, सत-गुन आउर सहरातो लाईक आय, हुनी गोटमन उपरे धियान करा।
9 जोन गोटमन तुमी मोचो ले सीखलास, आउर मानलास, आउर सुनलास, आउर मोके करतो के दखलास, हुन गोटमन असन चला-बुला, तेबे महापरभु, जोन अस्तिर चो उबजास आय तुमचो संगे रयदे।
दान दिलो काजे धन-धन करतोर
10 मय परभु ने खुबे हरिक आंसे कि इतरो दिन चो पाछे, तुमी मोचो फेर सूरता करलास। तुमी मूर ले मोचो फिकिर करते रलास, मानतर तुमके दखातो मोहका नी मिरली।
11 मय मोचो चिपा काजे असन नी बलेंसे, कसनबलले कसने हाल ने रले बले मय हरिक रउक सीखलेसे।
12 मय, नानागती बेरा आउर सपाय बानी रलो बेरा बले; पेट भोरलो बेरा आउर भूके रलो बेरा बले हरिक रउक रंहटलेसे बललोने, कसने हाल ने रले बले।
13 जोन मोके सकत देयसे, हुनचो ले मय काईची होओ करुक सकें।
14 तेबले बले मोचो चिपा बेरा साहरा करुन तुमी नंगत करलास।
15 ए फिलिपियामन, तुमी खुदे जानास कि जिदलदांय मय मकिदुनिया ले नंगत खबर सांगतो काजे निकरले हुदलदांय तुमचो मंडली के छांडुन आउर कोनी मंडली चो लोग दिया-ठोआ नी करला।
16 उसनेची मय थिसलुनीके ने चिपा ने रलो बेरा बले, गोटोक हार नाई मानतर दुय हार तुमी काई-काई पठाउन देउ रलास।
17 मय तुमचो ले सोजे दान के ची मन नी करे मानतर मय असन मन करेंसे कि पुन-फर पावतोने तुमी बाड़ते जाहा।
18 मय जमाय के पावलेसे, आउर खुबे ले पावलेसे, जोन जिनीसमन तुमी इपफरुदीतुस चो हाथे पठाउन दिलास, हुनके पाउन मोचो मन भोरली, आउर हुन खुबे नंगत बास देतो आउर भावतो जतरा असन आय जेके महापरभु खुबे मन करेसे।
19 आउर मोचो महापरभु बले किरिस्त जीसु बाटले आपलो खुबे मयमा चो धन हिसाब ले, तुमचो जमाय उना के पुरा करेदे।
20 एदांय आमचो बुआ महापरभु चो मयमा जुग-जुग होते रओ। आमीन।
सरासरी जुहार
21 जीसु किरिस्त के मानतो सपाय पवितर लोगमन के जुहार बला। जोन भाईमन मोचो संगे आसोत, तुमके जुहार बलसोत।
22 सपाय पवितर लोग, जुगे करुन जोन कयसर चो कुटुम चो आत, तुमके जुहार बलसोत।
23 आमचो परभु जीसु किरिस्त चो दया तुमचो संगे रओ।