महापरभु बाटले धारनिक होतोर
3
ए मोचो भाईमन, तुमी परभु ने हरिक राहा। ए गोट के घन-घन लिखतो काजे मोके काई असकट नी लागे, आउर ए तुमचो नफा काजे आय।
2 कुकुरमन असन बेबार करतो हुन लोगमन ले, अडरा बुता करतो लोगमन ले आउर फंदी खतना करतो लोगमन ले बाचुन राहा।
3 कसनबलले आमी चे सत खतना पावलो लोग आंव; आमी महापरभु चो आत्मा ले हुनचो सेवा करुंसे आउर किरिस्त जीसु ने गुमान करुंसे आउर आपलो देहें चो भोरसा ने नी रउं
4 मानतर मय आपलो देहें उपरे भोरसा करुक सकते; आउर कोनी आपलो देहें उपरे भोरसा करुक सके बलुन बिचार करेसे जाले, मय हुनचो ले बले आगर भोरसा करुक सकें।
5 जनम चो आठवां दिने मोचो खतना होली, मय इसराएल बंस चो आउर बिनयामीन थर चो आउर इबरानी आया-बुआ ले जनमलो पक्का इबरानी आंय। नियम-कानुन मानतोने मय पक्का फरीसी आंय।
6 मय आपलो धरम* मानतोने पुरे रले, एईकाजे जीसु के मानतो मंडली के डाटा-टेवा करते रले। नियम-कानुन चो धारनिक ने मय दोख नोहलो रले।
7 मानतर जोन गोटमन मोचो नफा चो रली, हुनीमन के किरिस्त चो किरता घाटा मानले।
8 एदांय मय, मोचो परभु जीसु किरिस्त चो गियान के सबुले नंगत आय जानलो किरता आउर सपाय तीज के कचरा-कुड़ा समजले, जेचोले मय किरिस्त के पाउक सकें।
9 आउर हुनचोने रउन, सोजे नियम-कानुन ले खुदे धारनिक होतो बाटले नाई, मानतर किरिस्त के पतेयालोने महापरभु बाटले धारनिक होउक सकें।
10 आउर जीसु के आउर हुनचो जीव उठलो चो सकत के जानुक होओ आउर हुनचो दुखमन ने संगी होउन हुनचेई मोरना असन मोके बले होओ,
11 आउर कसने बरन ले बले मोके मोरलोमन ले जीव उठतो चो पन मिरो।
सोरिक ने परातोर
12 मय इनाम पावले नोहले पक्का होले बलुन नी बलें, मानतर हुन इनाम पावतो काजे परातोने मय खुबे मसागत करेंसे, जेचो काजे किरिस्त जीसु मोके बाछलोसे।
13 ए मोचो भाईमन, मय इनाम पावले बलुन नी बिचारें, मानतर आगे चो गोटमन के भूलकुन एदांय इनाम मिरतो बाटे सोरिक ने परायंसे,
14 कि हुन इनाम पाउक होओ, जेचो काजे महापरभु मोके किरिस्त जीसु बाटले सरगपुरे हागदिलोसे।
15 एईकाजे आमीमन ले सिद होलो लोग गोटकी बिचार ने रउं, मानतर काई गोट ने तुमचो दुसर बिचार आसे जाले, महापरभु हुनके बले तुमके दखायदे।
16 एईकाजे जोन सत गियान आमी पावलुसे, हुनचेई हिसाब ने चलते रउं।
17 ए मोचो भाईमन, तुमी मोके दखुन मोचोई असन चला-बुला होआ आउर हुनमन के धियान दिया जोन आमचो असन चला-बुला होयसोत।
18 कसनबलले खुबे लोग असन बले आसोत जोन आपलो चलनी-बुलनी ले किरिस्त आउर हुनचो कुरूस चो बयरी आत। एमन चो बारे ने मय आगे घन-घन सांगुन रये आउर एबे बले गागुन-गागुन सांगेसे।
19 हुनमन चो सरासरी सत्यानास आय, हुनमन चो महापरभु हुनमन चो पेट आय, लाज पड़तो गोटमन ने हुनमन गुमान करसोत, आउर संवसारिक तीजमन चो धियान ने रयसोत।
20 मानतर आमी सरग राज चो रयत आंव, आउर आमी आमके मुक्ति देउ परभु जीसु किरिस्त के, सरग ले फेर एतो बाट दखुंसे।
21 परभु आपलो सकत ले सपाय तीजमन के आपलो आकुस ने करुक सके, आउर आमचो निमल देहें के आपलो मयमा देहें असन पलटुन देयदे।