किरिस्त असन सोज होतोर
2
तुमी जोन, किरिस्त ने आसास, तुमके काई भोरसा, मया चो काई चीना, आत्मा चो काई संगत, खिंडिक बले जीव दुखतोर आउर दया आसे जाले,
2 तुमी गोटकी मन, गोटकी मया, गोटकी बिचार आउर गोटकी सोर ने रउन मोचो हरिक के पुरा करा।
3 ईरका-कुचर नोहले आपलो फंद-बड़ाई काजे काई नी करा, मानतर आपने के नानी बनाउन दुसर के आपलो ले नंगत समजा।
4 तुमी सपाय आपलेची भलई काजे नाई, मानतर दुसर चो भलई काजे बले धियान दियास।
5 तुमचो मन-बिचार बले किरिस्त जीसु असन सोज होओ।
6 किरिस्त, महापरभु चो रूप होउन बले, आपने के महापरभु चो कटार होउक मन नी करलो।
7 मानतर आपने के इतलो नानी बनालो कि कमेया चो रूप धरुन मनुक असन होलो।
8 आउर मनुक रूप धरुन आपने के नानी बनालो, आउर बुआ चो हुकुम मानुन मोरना, हव, कुरूस चो मोरना बले सहलो।
9 एईकाजे महापरभु हुनके सबुले बड़े पन दिलो आउर हुनके बड़े ले बड़े नाव दिलो,
10 कि जोनमन सरगपुर ने, मंजपुर ने आउर तलपुर ने आसोत, हुनमन सपाय जीसु चो नाव ने मांडिखुटा देउन पांय पड़ोत।
11 आउर बुआ महापरभु चो मयमा काजे सपाय मानुन बलोत कि जीसु किरिस्त ची परभु आय।
तुमी संवसार ने दीया असन बरा
12 एईकाजे ए मोचो मीतमन, जसन तुमचो संगे रलो बेरा रोजे तुमी हुकुम मानते रलास, उसनेची एबे बले, जुगे करुन मय तुमचो ले लापी रलो बेरा बले माना आउर आपलो मुक्ति पक्का होतो काजे तुमी डरुन-थरथरुन मसागत करते राहा।
13 कसनबलले महापरभु चे, आपलो नंगत इछा किरता तुमचो मन ने इछा आउर बुता करतो काजे बल देयसे।
14 सपाय बुता के, नी गुरमुरुन आउर हिंगसा-तोहला नोहलो करा,
15 तेबे तुमी फंदी आउर एड़जा लोगमन चो पुरे, महापरभु चो दोख नोहलो आउर सोज बेटा-बेटी बनासे, जोनमन के काई दाग नीआय। तुमी हुनमन चो मंजिगता जीव देतो बचन धरुन संवसार चो बरतो दीयामन असन दखा दियासे।
16 तेबे मय गुमान करुक सकेंदे कि किरिस्त चो फेर एतो दिने मोचो रात-मंजन करलो बुता आउर मसागत फोकाहा नी होली।
17 मानतर मोके तुमचो बिसवास चो जतरा चेगातो सेवा ने मोचो लोउ बोहाउक पड़ले बले, मय हरिक आंसे, आउर तुमी सपाय संगे हरिक ने रयंदे।
18 उसने तुमी बले हरिक ने राहा, आउर मोचो संगे हरिक होआ।
तीमुथियुस आउर इपफरुदीतुस
19 मोके परभु जीसु उपरे आसा आसे कि मय झपके तीमुथियुस के तुमचो लगे पठायंदे, तेबे तुमचो गती के सुनुन मोके अस्तिर लागेदे।
20 कसनबलले मोचो लगे हुनके छांडुन, मोचो असन तुमचो काजे सत मन ले फिकिर करतो लोग आउर कोनी नीआत।
21 सपाय लोगमन जीसु किरिस्त चो इछा ले नाई, आपलाहान मन-इछा ले चलसोत।
22 मानतर तुमी, तीमुथियुस के परखुन जानलासाहास कि जसन बेटा, बुआ संगे बुता करुआय उसने नंगत खबर सुनातो सेवा ने मोचो संगे सिद होलोसे।
23 एईकाजे मोचो संगे काय होयदे, ए गोट के जानलोने तूरते हुनके तुमचो लगे पठातो काजे मन करेंसे।
24 आउर मोके परभु उपरे भोरसा आसे कि मय बले झपके तुमचो थाने एयंदे।
25 तेबले बले इपफरुदीतुस के तुमचो थाने पठातोर ची आय समजले, हुन मोचो भाई, संगे सेवा-बुता करु बीता, नंगत खबर चो रखेया काजे मोचो बाटले लड़तो बीता, तुमचो दूत आउर मोचो सेवा-सुस्तारा करु बीता आय।
26 कसनबलले तुमी हुनचो बेमार होलो गोट के सुनलास बलुन मुरमुरा होलो आउर हुन तुमके भेटतो काजे खुबे जीव उखड़ायसे।
27 सत्ते हुन मोरतो असन बेमार पड़ु रलो, मानतर महापरभु हुनचो उपरे दया करलो। हुनचो उपरे चे नाई, मोचो उपरे बले दया करलो कि मोके दुख उपरे दुख नी होओ।
28 एईकाजे मय हुनके तुमचो लगे पठातो काजे खुबे मन करले कि तुमी हुनके फेर भेटुन हरिक होआ आउर मोचो फिकिर बले कम होओ।
29 एईकाजे तुमी हुनके परभु ने भाई असन खुबे हरिक मन ले भेट करा, आउर असन लोगमन चो मान-गुन करा।
30 कसनबलले हुन किरिस्त चो सेवा काजे आपलो जीव के गराहां ने पाड़ुन मोरतो असन होउन रलो कि जोन उना तुमचो बाटले मोचो सेवा काजे रली हुनके पुरा करो।