फिलिपी चो मंडली
काजे पठालो-बीता पउलुस चो चिटी
1
जीसु किरिस्त चो कमेयामन, पउलुस आउर तीमुथियुस बाटले, किरिस्त जीसु के पतेयातो सपाय पवितर लोगमन, धरम मुखियामन आउर सेवकमन बले जोन फिलिपी सहर ने रयसोत, हुनमन काजे चिटी:
2 आमचो बुआ महापरभु आउर परभु जीसु किरिस्त बाटले तुमके दया आउर अस्तिर मिरते रओ।
पउलुस, पारथना आउर धन-धन करेसे
3 मय तुमके सूरता करलो पीची, महापरभु के धन-धन करेंसे,
4 मय तुमी सपाय काजे करतो पारथना, सरलगा हरिक ले करेंसे,
5 कसनबलले तुमी मूर दिन ले धरुन आजी बले नंगत खबर सुनातोने मोचो संगी होलासाहास।
6 मोके ए गोट चो पक्का भोरसा आसे कि जोन तुमचो ने नंगत बुता मुरियालो, हुनीची जीसु किरिस्त फेर एतो दिन ले हुनके पुरा करेदे।
7 मोके जयल होलो के आउर नंगत खबर चो रखेया करतोने तुमी सपाय पक्का गवई होउन, महापरभु चो दया पावतोने मोचो संगी होलास। एईकाजे मोचो मन ने तुमी सपाय आसास आउर मय तुमी सपाय चो बारे ने असन बिचारतोर नंगत आय।
8 जीसु किरिस्त असन मय तुमके मया करुआंय गुने, तुमके भेटतो काजे खुबे मन करेंसे आउर एचो गवई महापरभु आय।
9 गियान आउर सपाय बरन चो अकल-बुद संगे तुमचो मया, खुबे बाड़तो काजे मय पारथना करेंसे।
10 कसनबलले तुमी नंगत-अडरा के चिताउन नंगत ले नंगत गोटमन के धरा कि किरिस्त चो फेर एतो दिन ले पवितर आउर दोख नोहलोर राहा;
11 आउर जीसु किरिस्त चो बाटले मिरतो भलई आउर धरम बुतामन ने समपुरन होते जाहा, जेचोले महापरभु चो मयमा आउर जय-जय होते रयदे।
पउलुस चो जयल जातो के नंगत खबर बिगरतोर
12 ए भाईमन, मय मन करेंसे, तुमी ए गोट के जाना कि जोन बले गराहांमन मोचो संगे होली, हुनचो ले नंगत खबर चो बाड़ती ची होली,
13 कयसर राजा चो माहाल रखवारीमन आउर सपाय दुसर लोगमन बले जानला कि मय किरिस्त चो कमेया होलो किरता जयल ने आंसे।
14 मोके जयल होलो किरता, खुबे किरिस्त भाईमन एदांय परभु के भोरसा करुन महापरभु चो गोट के डर नोहलोर सुनायसोत।
15 कोनी-कोनी ईरका-कुचर आउर बईर किरता, आउर कोनी-कोनी सत-मन ले किरिस्त चो नंगत खबर सुनायसोत।
16 सत-मन ले नंगत खबर सुनातो लोगमन जानला कि मोके नंगत खबर चो रखेया करतो काजे परभु बाछलोसे, एईकाजे खुबे मया ले नंगत खबर सुनायसोत।
17 आउर कोनी-कोनी सत-मन ले नाई मानतर मोके बईर करुन, जयल घरे आउर तकलीस होओ बलुन, किरिस्त चो कहनी के सांगसोत।
18 हुनचो ले काय होली गुने? कुचर मन ले होओ नोहले सत-मन ले होओ, किरिस्त चो नंगत खबर के चे सुनायसोत - एईकाजे मय हरिक आंसे, आउर हरिक रयंदे बले।
जीव रतोर किरिस्त आय
19 कसनबलले मय जानेंसे, तुमचो पारथना ले, आउर जीसु किरिस्त चो आत्मा साका होतो ले, मोचो छंडाव होयदे।
20 मय खुबे मन करेंसे आउर आसा बले करेंसे कि मोके काई गोट ने लाज पड़ुक नी होओ, मानतर आगे चो असन एबे बले मोचो देहें ले किरिस्त चो मयमा अमदेया होओ, भले मय जीव रयें नोहले मोरे।
21 मोचो काजे जीव रतोर किरिस्त आय, आउर मोरतोर नफा आय।
22 मानतर देहें संगे रलोने बललोने, जीव रलोने, मोचो सेवा-बुता काजे नफा आय जाले; काय के बाछतोर आय, एके मय नी जाने।
23 मय ए दुनो ने कोके बाछतोर आय बलुन गुपलेसे। मय मोरुन किरिस्त संगे रतो काजे खुबे मन करेंसे, कसनबलले ए खुबे नंगत आय,
24 मानतर तुमचो काजे मय देहें संगे रतोर बललोने, जीव रतोर ची आय।
25 मय पक्का पतेयायंसे आउर जानेंसे, तुमचो बिसवास आउर हरिक चो बाड़ती काजे ची मय जीव रयंदे आउर तुमी सपाय संगे रयंदे बले,
26 तेबे जोन गुमान तुमी मोचो उपरे करसास, मय तुमचो लगे फेर ईलोने किरिस्त जीसु ने आउर आगर करुक सकास।
27 मोके एउक होओ नोहले नी होओ, तुमी गोटकी आत्मा ने चमकट रउन गोटकी मन ले नंगत खबर सुनातोने मसागत करतो बाटले, मोके सुनुक होओ कि तुमचो चलनी-बुलनी किरिस्त चो नंगत खबर लाईक आसे।
28 तुमी काई गोट ने बयरीमन ले नी डरसास, ए महापरभु बाटले हुनमन काजे सत्यानास चो आउर तुमचो काजे मुक्ति चो पक्का चीना आय।
29 कसनबलले सोजे किरिस्त के पतेयातो काजे ची नोआय मानतर हुनचो काजे डंड पावतो काजे बले तुमके बर दिलोर आसे।
30 आउर नंगत खबर सुनातो काजे जसन मसागत मोचो करतो के तुमी दखलासाहास आउर एबे बले सुनसाहास, उसनेची तुमी बले करा।