कुलुसी चो मंडली
काजे पठालो-बीता पउलुस चो चिटी
मूर चो गोट
1
महापरभु चो मन-इछा ले, जीसु किरिस्त चो पठालो-बीता पउलुस आउर भाई तीमुथियुस बाटले:
2 कुलुसी ने रतो, पवितर आउर पतेयातो किरिस्ती भाईमन काजे चिटी:
आमचो बुआ महापरभु बाटले तुमके दया आउर अस्तिर मिरते रओ।
धन-धन करतो काजे पारथना
3 तुमचो काजे पारथना करतो बेरा, आमी परभु जीसु किरिस्त चो बुआ महापरभु के अमदेया धन-धन बलुंसे,
4 कसनबलले आमी सुनलुसे, तुमचो बिसवास जीसु किरिस्त ने आसे आउर तुमी सपाय पवितर लोगमन के मया करसास।
5 असन तुमी हुनी नंगत आसा ले करासाहास, जोन आसा तुमचो काजे सरग ने जगारित संगालोसे, जेचो बारे ने तुमी आगे ले नंगत खबर चो सत बचन ने सुनलासाहास।
6 जोन नंगत खबर तुमचो लगे अमरलीसे, हुनी ए जमाय संवसार ने बले अमरलीसे; आउर जसन ए संवसार ने हुन फर धरेसे आउर फर बाड़ेसे, उसनेची जेबे ले तुमी ए नंगत खबर चो बचन सुनलास आउर सत महापरभु चो दया के जानलास, तुमचो मंजिगता बले फर धरेसे।
7 हुनी सिखानी के तुमी आमचो मीत भाई इपफरास ले सुनलास, जोन आमचो हिसाब ले किरिस्त चो पतेयातो लाईक कमेया आय।
8 इपफरास, पवितर आत्मा बाटले तुमके मिरलो मया चो बारे ने आमके सांगलो।
9 एईकाजे, ए गोट के सुनलो दिन ले, आमी बले तुमचो काजे अमदेया पारथना आउर गुहार करुंसे कि तुमी सपाय बरन चो आत्मिक गियान आउर समज ले महापरभु चो इछा के जानतोने सिद होआ।
10 भलई बुतामन ने बाड़ती करुन महापरभु चो गियान ने संपुरन होउन जाहा। तेबे तुमचो चलनी-बुलनी परभु के भावतो लाईक होयदे, तुमी सबु बरन ले परभु के हरिक करुक सकासे।
11 हुनचो मयमा चो सकत हिसाब ले, सबु बरन चो सकत ने चमकट होआ कि हरिक ले ढाढ़ुस आउर धीरजा करुक सकासे।
12 आउर बुआ महापरभु के धन-धन करा, जोन आमके उजर ने रतो पवितर लोगमन संगे भागी होतो लाईक बनालो।
13 महापरभु आमके अंधार चो हक ले छंडाउन आपलो लाडरा बेटा चो राज ने अमरालो,
14 जोन थाने आमके छंडावा मिरेसे बललोने, पापमन ले खेमा।
किरिस्त आउर हुनचो बुता
15 जीसु किरिस्त, नी दखा देतो महापरभु चो घटन आय आउर हुन, तीनपुर चो बनालो जमाय जिनीसमन ले पईलात आय।
16 हुनचो ले सपाय जिनीसमन बनली; सरग चो आउर मंजपुर चो, दखतो आउर नी दखतो जिनीसमन, राजगादीमन, राजामन, मुखियापन, हक आउर सपाय तीज के हुनी बनालो आउर हुनचेई काजे बनालो।
17 सपाय ले पईल हुनी आय आउर सपाय तीजमन हुनचोने चमकट रयसे।
18 हुनी, देहें बललोने, मंडली चो मुंडी आय आउर हुनी मूर, आउर मोरलोमन ले जीव उठतोमन ले पईलात आय कि हुन सपाय चो मुखिया होओ।
19 कसनबलले बुआ महापरभु के एई नंगत लागली कि हुन संपुरन सिद होओ,
20 आउर जीसु किरिस्त चो कुरूस ने बोहालो लोउ बाटले सपाय के अस्तिर करुन हुनचेई बाटले सपाय के आपलो संगे मिला-मिसा करालो; मंजपुर चो होओ नोहले सरग चो होओ।
21 आगे तुमी महापरभु ले लापी रते रलास, कसनबलले तुमचो अडरा बुतामन आउर बिचारमन ले तुमी हुनचो बयरी रलास।
22 मानतर एबे आपलो बेटा चो संवसारिक देहें चो मोरना बाटले महापरभु तुमीमन के आपलो संगे मिला-मिसा करालो। एईकाजे कि तुमके पवितर, दोख नोहलो आउर दाग नोहलो बनाउन हुनचो पुरे उबा करुक सको,
23 मानतर तुमी बिसवास चो पाया ने अमदेया बरसक राहासे आउर हुन नंगत खबर चो आसा के नी छांडासे, ए नंगत खबर बादरी चो खाले गुलाय संवसार ने सुनाला आउर हुनी नंगत खबर सुनातोने मय पउलुस, हुनचो सेवक होले।
मंडली काजे पउलुस चो सेवा-बुता
24 एदांय मय, तुमचो काजे सहलो दुख-तकलीस काजे हरिक होयंसे, कसनबलले मय बले, किरिस्त चो देहें बललोने, मंडली काजे आपलो देहें ने डंड पाउन किरिस्त चो डंड ने भागी होयंसे।
25 महापरभु चो हुन हुकुम हिसाब ले, तुमीमन काजे मोके सोपलो बुता असन, मय गोटोक सेवक बनले कि मय महापरभु चो खबर सपाय के पुरा-पुरा सुनायंदे।
26 हुन भेद के, जोन मूर बेरा ले आउर जुग-जुग ले मनुकमन ले लुकुन रली। मानतर एदांय हुनचो पवितर लोगमन के पक्का दखा दिली।
27 महापरभु एईकाजे हुनमन के दखाउक मन करलो कि हुनमन जानोत बिजातीमन काजे हुन मयमा चो भेद चो मोल कितरो आसे; हुन भेद ए आय कि किरिस्त तुमचो भीतरे रयसे आउर महापरभु चो मयमा पावतो चो हुनी गोटकी आसा आय।
28 आमी सपाय लोगमन के तिकारुंसे आउर समपुरन गियान ले सिखाउंसे कि आमी सपाय लोगमन के किरिस्त ने सिद करुन महापरभु चो पुरे अमराउक सकुं।
29 एईकाजे मय, किरिस्त देतो सकत ले हुनचो काजे मन लगाउन खुबे मसागत करेंसे।