2
मय मन करेंसे, तुमी ए गोट के जाना, मय तुमचो काजे, लवदीकिया ने रतो लोग काजे आउर मोके केबई नी दखलो सपाय लोगमन काजे कितलो मसागत करेंसे
2 कि हुनमन चो मन के अस्तिर मिरो आउर मया चो बांधन ने रउन गोटोक-दुसर के उकसाओत। हुनमन संपुरन ले सत गियान पाउन बुआ महापरभु चो भेद बललोने, किरिस्त के चिताओत,
3 जेचो भीतरे गियान आउर बुद चो भंडार आसे।
4 मय ए गोटमन के एईकाजे सांगेंसे कि कोनी तुमके फोबानी गोटमन ले फुसियाउन नी ठगोत।
5 मय देहें चो हिसाब ले तुमचो ले लापी आंसे, मानतर आत्मा चो हिसाब ले तुमचो संगे आंसे। तुमचो नंगत जीवना आउर किरिस्त उपरे तुमचो चमकट बिसवास के दखुन मय हरिक होयंसे।
किरिस्त ने समपुरन जीवना
6 तेबे जसन तुमी किरिस्त जीसु के, परभु बलुन मानलास, उसनेची हुनचो बाट ने चला,
7 आउर हुनचेई ने जड़ धरते आउर बाड़ते जाहा आउर जसन तुमके सिखालासे उसनेची पतेयातोने पक्का होते जाहा आउर महापरभु के खुबे धन-धन करते राहा।
8 तुमी चेत ने राहा कि कोनी तुमके संवसारिक गियान आउर फोकाहा गोटमन ले धोका नी देओत। ए सपाय मनुकमन चो नीती-नियम आउर मूर सिखिया बाटले आय, मानतर किरिस्त बाटले नोआय।
9 कसनबलले महापरभु चो समपुरन गुन, किरिस्त चो देहें ने रयसे,
10 आउर तुमी हुनचेई ने समपुरन आसास, जोन सपाय राजामन आउर हकदारमन चो मुखिया आय।
11 हुनचेई ने तुमचो खतना होलीसे जोन मनुकमन चो नीती असन हाथ ले करलोर नोआय, मानतर किरिस्त चो खतना बाटले संवसारिक देहें चो पाप इछामन छंडाय होयसे।
12 कसनबलले बपतिस्मा बाटले तुमके किरिस्त संगे गाड़ला आउर हुनके, मोरलोमन ले जीव उठालो महापरभु चो सकत के पतेयातो बाटले, तुमके बले हुनचेई संगे जियालो।
13 आगे तुमी बले पापमन आउर किरिस्त ने मन चो खतना नी होलोर मरु रलास, मानतर महापरभु तुमचो सपाय पापमन के खेमा करलो आउर तुमके बले किरिस्त संगे जियालो,
14 हुन नीती नियम आउर आमचो बिरुद लिखलो डंड के, किरिस्त संगे कुरूस ने खुटी ठेचुन मेटालो।
15 आउर हुन मुखियापन आउर हकमन के केहेंके नोहलोर करुन सपाय के जीतलो आउर सपाय चो पुरे हुनमन चो सुआंग बनालो, आउर कुरूस बाटले हुनमन के जय-जय चो राग सुनालो।
16 खातो-पीवतो तीजमन नोहले तिहार-बाहारमन, ‘नवा जोन’ चो तिहार आउर बिसातो दिन के नी मानतो किरता कोनी तुमचो फासला नी करोत।
17 ए सपाय एतो गोटमन चो छांय आय मानतर जोन असली आय हुन किरिस्त आय।
18 कोनी मनुक मेलाय काजे सोज होउन, सरगदूतमन चो सेवा कराउन तुमके मिरतो बाटा के चुकाउक नी दियास। हुनमन आपलो पावलो दरसन चो ढोंग करसोत, मानतर हुनमन संवसारी गियान उपरे ची फोकाहा गुमान करसोत,
19 आउर हुनमन, मुंडी बललोने, किरिस्त ने चमकट नी रयसोत, जेचोले पुरा देहें, सपाय गठमन आउर नसमन ले जोड़ुन भाति चमकट होयसे, आउर महापरभु चो सकत ले बाड़ते जायसे।
किरिस्त संगे मोरतोर आउर जीवतोर
20 जिदलदांय तुमी किरिस्त संगे संवसार चो मूर सिखियामन काजे मोरलास, तेबे फेर काय काजे हुनी संवसारिक लोगमन असन नीती नियम चो तलेया ने रयसास?
21 बललोने, एके नी धर, हुनके नी चाक आउर हुनके नी छींव।
22 मानतर ए सपाय जिनीसमन बाहारते-बाहारते सरुन जायदे। कसनबलले ए सपाय मनुक चो हुकुममन आउर सिखानी हिसाब ले आय।
23 ए सपाय नियममन ने आपलो मन-इछा ले घड़लो धारनिक नीती, तप करतोर आउर उपास-पियास करतो ले गियान चो नाव तो आसे, मानतर एचोने, देहें चो लालचमन के ठेबातो काई सकत नीआय।