3
तुमके किरिस्त संगे जीव उठालोसे जाले, सरग चो जिनीसमन के डगराते राहा, जोन थाने किरिस्त महापरभु चो उजा हाथ बाटे बसलोसे।
2 मंजपुर चो जिनीसमन चो उपरे नाई, मानतर सरग चो जिनीसमन चो उपरे मन लगाहा।
3 कसनबलले तुमी मोरलास आउर तुमचो जीव, किरिस्त संगे महापरभु ने मिसलीसे।
4 किरिस्त आमचो जीव आय, जेबे हुन फेर एयदे, तेबे तुमी बले हुनचो संगे मयमा ने दखा दियासे।
जुना आउर नवा जीवना
5 एईकाजे तुमचो भीतर चो हुन सपाय संवसारिक बिचारमन के छांडा बललोने, बेबिचार, असुद, होस-नंजरेया, अडरा बिचार आउर लालचमन, जोन मूरत सेवा कटार आय।
6 एई गोटमन किरता हुकुम नी मानतो लोगमन उपरे महापरभु चो रीस पड़ेसे।
7 जेबे तुमी बले ए अडरा बिचारमन ने दिन काटते रलास, तेबे तुमचो जीवना बले असने रली।
8 मानतर एबे तुमी दागा देतोर, रीस होतोर, बईर, बदी देतोर आउर झगड़ा खीजतोर ए सपाय गोटमन के छांडा।
9 गोटोक-दुसर ले फंद गोट नी गोटेयाहा, कसनबलले तुमी जुना मनुक गुन के हुनचो बुतामन संगे छांडलासाहास,
10 आउर नवा मनुक गुन के हुनचो बुतामन संगे पावलासाहास, जोन आपने के बनालो महापरभु चो घटन हिसाब ले गियान पावतो काजे नवा बनते जायसे।
11 हुनी ने कोनी जूनानी नाई, कोनी जहूदी नाई, कोनी खतना करलो बीता नाई, खतना नी करालो बीता बले नाई। कोनी परगांया नोहले गांवरेया, कमेया नोहले छुट नाई। मानतर किरिस्त चे सपाय आय आउर सपाय ने आसे।
12 एईकाजे महापरभु चो बाछलो, पवितर आउर मया चो लोग असन जीव-दुखुक, दया करुक, नानी बनुक, सोज होउक आउर कटलाउक जाना।
13 आउर कोकई, कोचई उपरे काई दोस देतोर आसे जाले, तुमी गोटोक-दुसर के कटलाहा, आउर गोटोक-दुसर चो पाप के खेमा करा, जसन परभु तुमचो पाप के खेमा करलो, उसनेची तुमी बले खेमा करा।
14 आउर ए सपाय गुन ले बड़े गुन मया आय। मया चे सपाय के मिला-मिसा कराउन समपुरन बनायसे।
15 किरिस्त चो अस्तिर तुमचो मन भीतरे राज करो, जेचो काजे महापरभु तुमके गोटोक देहें बनाउन हागदिलोसे। आउर तुमी धन-धन बलते राहा।
16 किरिस्त चो बचन के जुगे ले जुगे आपलो मन ने धरा, गोटोक-दुसर के सिद गियान ले सिखाउन उकसाहा, आउर आपलो मन ले धन-धन बलते महापरभु काजे भजन, जय-जय गीत आउर आत्मिक गीत गाहा।
17 बचन सांगतो ने नोहले बुता करतोने, जोन बले करासे, सपाय परभु जीसु चो नाव ले चे करा, आउर हुनचो बाटले बुआ महापरभु के धन-धन करा।
किरिस्ती जीवना काजे सिखानी
18 ए मेहरारमन, आपलो-आपलो मनुकमन चो हक ने राहा, ए परभु ने नंगत आय।
19 ए मनुकमन, आपलो-आपलो मेहरारमन के मया करा आउर हुनमन संगे झगड़ा-टंटा नी करा।
20 ए पिलामन, सपाय गोटमन ने आपलो-आपलो आया-बुआमन चो हुकुम के माना, कसनबलले परभु एचोले हरिक होयसे।
21 ए बुआमन, आपलो पिलामन के फोकाहा असकट नी करा, असन नी होओ कि हुनमन चो मन मुरुसनाय होउन जाओ।
22 ए कमेयामन, मंजपुर ने जोन तुमचो मालिक आय, सपाय गोटमन ने हुनचो हुकुम माना, लोगमन चो पुरे ढोंग दखाउन हुनमन के हरिक करतो काजे नाई, मानतर सत मन ले आउर महापरभु के डरुन माना।
23 आउर जोन बले तुमी करासाहास सपाय के सत मन ले करा, असन समजुन भाति कि ए मनुकमन काजे नोआंय मानतर परभु काजे आय।
24 कसनबलले तुमी जानासाहास, तुमी परभु किरिस्त चो सेवा करसाहास आउर तुमके एचो इनाम परभु ले मिरेदे;
25 मानतर जोन ओनियाव करेसे, हुन आपलो अडरा बुतामन चो पलटा पायदे। कसनबलले महापरभु कोचई पाटेया नी होए।